સામાન્ય નાગરિકો માટે રેકોર્ડ બ્રેક જનરલ અને નોન-એસી કોચનું ઉત્પાદન કરશે: રેલવેની જાહેરાત

નવી દિલ્હી: સામાન્ય માણસને પરવડે તેવા ભાડામાં આધુનિક સુવિધાઓ સાથે મુસાફરી કરાવવા માટે ભારતીય રેલવેએ કમર કસી છે. રેલવે મંત્રાલય દ્વારા મંગળવારે જારી કરાયેલા નિવેદન અનુસાર, વધતી જતી માંગને પહોંચી વળવા માટે જનરલ અને નોન-એસી કોચનું રેકોર્ડ ઉત્પાદન કરવામાં આવી રહ્યું છે.

આગામી બે વર્ષમાં હજારો નવા કોચ ઉમેરાશે

રેલવેએ ચાલુ અને આગામી નાણાકીય વર્ષ માટે કોચ ઉત્પાદનનો મજબૂત પ્લાન તૈયાર કર્યો છે:

• નાણાકીય વર્ષ 2025-26: અત્યાર સુધીમાં 4,838 નવા LHB GS અને નોન-એસી કોચ બનાવવાનું આયોજન છે.

• નાણાકીય વર્ષ 2026-27: ઉત્પાદનનો લક્ષ્યાંક 4,802 LHB કોચ રાખવામાં આવ્યો છે.

આ આયોજનનો મુખ્ય હેતુ ટ્રેન સેવાઓની સુરક્ષા, આરામ અને ગુણવત્તામાં વધારો કરવાનો છે.

અમૃત ભારત અને નમો ભારત રેપિડ રેલનો વિસ્તાર

• અમૃત ભારત એક્સપ્રેસ: સ્લીપર અને જનરલ ક્લાસ સાથેની આ સંપૂર્ણ નોન-એસી ટ્રેનો સસ્તા ભાડામાં પ્રીમિયમ સુવિધા આપે છે. વર્ષ 2025માં 13 નવી ટ્રેનો શરૂ કરાતા હવે કુલ 30 અમૃત ભારત ટ્રેનો કાર્યરત છે.

• નમો ભારત રેપિડ રેલ: હાલમાં ભુજ-અમદાવાદ અને જયાંનગર-પટના વચ્ચે બે સેવાઓ કાર્યરત છે, જે પ્રાદેશિક કનેક્ટિવિટીને મજબૂત બનાવે છે.

ટિકિટ બુકિંગમાં કડકાઈ: 5.73 કરોડ શંકાસ્પદ એકાઉન્ટ બંધ

ટિકિટિંગ સિસ્ટમમાં પારદર્શિતા લાવવા માટે રેલવેએ મોટા પગલાં લીધા છે:

• આધાર વેરિફિકેશન: હવે માત્ર આધાર વેરિફાઇડ યુઝર્સ જ તત્કાલ ટિકિટ બુક કરી શકશે.

• એકાઉન્ટ ડિલીશન: ઈ-ટિકિટિંગ સિસ્ટમનો દુરુપયોગ રોકવા માટે અત્યાર સુધીમાં 5.73 કરોડ શંકાસ્પદ અને નિષ્ક્રિય IRCTC યુઝર એકાઉન્ટ્સને બંધ અથવા સસ્પેન્ડ કરવામાં આવ્યા છે.

રેલવે સુરક્ષા અને અકસ્માતમાં ઘટાડો

મુસાફરોની સુરક્ષા રેલવેની ટોચની પ્રાથમિકતા છે. રિપોર્ટ મુજબ:

• રેલવે અકસ્માતોની સંખ્યા 2014-15માં 135 હતી, જે ઘટીને 2025-26માં માત્ર 11 (નવેમ્બર 2025 સુધી) થઈ ગઈ છે.

• સુરક્ષા બજેટ ત્રણ ગણું વધારીને Rs 1,16,470 કરોડ કરવામાં આવ્યું છે.

• ધુમ્મસ દરમિયાન સુરક્ષા માટે ‘ફોગ સેફ્ટી ડિવાઇસ’ની સંખ્યા 2014માં 90 હતી, જે 2025માં વધીને 25,939 થઈ ગઈ છે.

તહેવારોમાં ભીડને પહોંચી વળવા ખાસ આયોજન વર્ષ 2025માં રેલવેએ વિક્રમી 43,000 થી વધુ સ્પેશિયલ ટ્રેનો દોડાવી હતી, જેમાં મહાકુંભ માટે 17,340 અને ઉનાળામાં 12,417 ટ્રેનોનો સમાવેશ થાય છે.

નવું ડેવલપમેન્ટ: નવી દિલ્હી રેલવે સ્ટેશનની જેમ દેશભરના 76 સ્ટેશનો પર મુસાફરો માટે ખાસ ‘હોલ્ડિંગ એરિયા’ બનાવવામાં આવશે. અહીં ટોયલેટ, ટિકિટિંગ મશીન અને મફત RO પાણી જેવી સુવિધાઓ હશે, જે 2026ની તહેવારોની સીઝન પહેલા તૈયાર થઈ જશે.