Western Times News

Latest News in Gujarat

બિહાર પોલીસે સુશાંતની એક્સ ગર્લફ્રેન્ડ અંકિતા લોખંડેની પૂછપરછ કરી

બોલિવૂડ એક્ટર સુશાંત સિંહ રાજપૂતની મોતના મામલે બિહાર પોલીસે ગુરુવારે સુશાંત સિંહ રાજપૂતની ગર્લફ્રેન્ડ અને એક્ટ્રેસ અંકિતા લોખંડેની પૂછપરછ કરી. પોલીસે અંકિતા લોખંડેના ઘરે જઈને લગભગ ૧ કલાક પૂછપરછ કરી અને તેનું નિવેદન નોંધ્યું. આ મામલે બિહાર પોલીસ અત્યાર સુધીમાં ૬ લોકોની પૂછપરછ કરી ચૂકી છે.

આ મામલે ગુરુવારના રોજ બિહાર પોલીસની ટીમ બાંદ્રા વેસ્ટ વિસ્તારમાં કોટક મહિન્દ્રા બેંક પણ પહોંચી હતી. પોલીસની ટીમ આ બ્રાંચમાં સુશાંતના અકાઉન્ટની માહિતી અંગે તપાસ કરી રહી છે. સુશાંત સિંહ રાજપૂતના પિતાએ પોલીસ ફરિયાદમાં આરોપ લગાવ્યો છે કે તેમના દીકરા સુશાંતના ખાતામાં ૧૭ કરોડ રૂપિયા હતા. જેમાંથી ૧૫ કરોડ રૂપિયા એવા અકાઉન્ટમાં ટ્રાન્સફર થયા છે કે જેની સાથે સુશાંતને કોઈ સંબંધ નથી.

અહીં નોંધનીય છે કે આ પહેલા જ્યારે બિહાર પોલીસે અંકિતા લોખંડેનો સંપર્ક કર્યો હતો ત્યારે તેણે જણાવ્યું હતું કે ફિલ્મ ‘મણિકર્ણિકા’ના પ્રમોશન દરમિયાન સુશાંતે તેને શુભેચ્છા માટે ફોન કર્યો હતો. અંકિતાના જણાવ્યા મુજબ ત્યારે તેમની વચ્ચે ઘણી વાતચીત થઈ હતી. આ દરમિયાન સુશાંત ઘણો ઈમોશનલ થઈ ગયો હતો અને જણાવ્યું હતું કે તે રિયાની સાથે રિલેશનશિપમાં છે અને ખૂબ પરેશાન છે. સુશાંત સિંહ રાજપૂતના પિતાએ રિયા ચક્રવર્તી વિરુદ્ધ પોલીસ ફરિયાદ નોંધાવ્યા બાદ અંકિતા લોખંડેએ તેના ઈન્સ્ટાગ્રામ અકાઉન્ટ પર એક પોસ્ટ શેર કરી હતી. જેમાં લખ્યું હતું કે સત્યની જીત થાય છે.