Western Times News

Latest News from Gujarat

વિમેન્સ આઈપીએલ હવે શારજાહમાં યોજાઈ શકે છે

નવી દિલ્હી: આવતા મહિને યુએઇમાં વિમેન્સ ટી ૨૦ ચેલેન્જ રમાશે. વિમેન્સ ટી ૨૦ ચેલેન્જ, જે છેલ્લા બે વર્ષથી સતત રમાડવામાં આવે છે, તે ઇન્ડિયન પ્રીમિયર લીગ (આઈપીએલ) પ્લેઓફ સપ્તાહ દરમિયાન યોજવામાં આવશે. દરમિયાન, એ વાત સામે આવી છે કે બીસીસીઆઈ તેને કયા મેદાન પર યોજી શકે છે. જોકે, હજી સુધી કોઈ સત્તાવાર ઘોષણા કરવામાં આવી નથી, પરંતુ એવું માનવામાં આવે છે કે વિમેન્સ ટી ૨૦ ચેલેન્જ, જેને મહિલા આઈપીએલ પણ કહેવામાં આવે છે તે શારજાહમાં થઈ શકે છે.

જો કે, બીસીસીઆઈએ ૨ ઓગસ્ટથી મહિલા આઈપીએલ ૨૦૨૦ અંગે કોઈ ઔપચારિક ઘોષણા કરી નથી, પરંતુ આ ટૂર્નામેન્ટની પૃષ્ઠભૂમિ પર સતત કાર્ય ચાલુ છે. બોર્ડે એક સિલેક્શન પેનલની નિમણૂક પણ કરી છે અને તે સમજી શકાય છે કે લગભગ ૩૦-૩૬ ભારતીય ખેલાડીઓ ટૂર્નામેન્ટમાં ભાગ લેશે. ઇએસપીએન ક્રિકઇન્ફોના અહેવાલ મુજબ, આ તમામ ખેલાડીઓ ૧૩ ઓક્ટોબરે મુંબઇમાં એકઠા થવાની સંભાવના છે. મુંબઇના તમામ ખેલાડીઓ અને સપોર્ટ સ્ટાફને ૯ દિવસ માટે ક્વોરેન્ટાઈન રહેવું પડશે અને ત્યારબાદ ૨૧ ઓક્ટોબરે દુબઇ જવા રવાના થવું પડશે.

અગાઉ જણાવ્યા મુજબ, મહિલા ટી ૨૦ ચેલેન્જ ૪ નવેમ્બરથી ૯ નવેમ્બર સુધી રમી શકાય એમ છે, જ્યારે આઈપીએલ પ્લેઓફ્સ પણ રમાડવામાં આવશે. ભારતીય ખેલાડીઓ મુંબઈથી રવાના થશે, જ્યારે વિદેશી ખેલાડીઓ સીધા દુબઈ પહોંચશે. આ ત્રણેય ટીમો એક જ હોટલમાં છ દિવસીય ક્વોરેન્ટાઇનમાંથી પસાર થશે. બધા ખેલાડીઓ અને સપોર્ટ સ્ટાફ દુબઈની હોટલમાં આવેલા ક્વોરેન્ટાઇનમાં સખત રીતે રહેશે. અત્રે ઉલ્લેખનીય છે કે મહિલા આઈપીએલમાં ત્રણ ટીમો છે – ટ્રેલબ્લૈઝર્સ, સુપરનોવાસ અને વેલોસિટી, જે મહિલા ટી ૨૦ ચેલેન્જમાં રમશે. આ વખતે ચાર ટીમો સામેલ કરવાની વાત થઈ હતી,

પરંતુ કોરોના વાયરસના રોગચાળાને લીધે આ શક્ય બન્યું નથી. ગયા વર્ષે હરમનપ્રીત કૌરની આગેવાનીવાળી સુપરનોવાસે મિતાલી રાજની આગેવાનીવાળી વેલોસિટીની ટીમને હરાવીને ટાઇટલ જીત્યું હતું.