Western Times News

Latest News in Gujarat

માત્ર 23 વર્ષનો છોકરો હોંગકોંગનું આંદોલન ચલાવે છે અને ચીનને હંફાવે છે

જેને મુંછનો દોરો પણ ઉગ્યો નથી તેવો માત્ર 23 વર્ષનો છોકરો ચીનને હંફાવી રહ્યો છે.  હોંગકોંગમાં દેખાવો  ટોચ પર છે. શેરીઓ જામ થઈ ગઈ છે. તમામ એરપોર્ટ પર ફ્લાઇટ્સ  રદ કરવામાં આવી છે. બે દિવસ પહેલા પણ વિરોધીઓએ એરપોર્ટ કબજે કર્યું હતું. છેલ્લા ઘણા દિવસોથી લાખો લોકો અહીંના રસ્તાઓ પર દેખાવો કરી રહ્યા છે અને આ વિરોધીઓનું નેતૃત્વ, જે તેમના હાથમાં છે, તે ફક્ત 23 વર્ષનો નાજુક છોકરો છે, પરંતુ તેની હિંમતની દાદ માંગી લે તેવી છે. ચીન સરકારના અધિકારીઓને હંફાવી દીધા છે.

હોંગકોંગ અને ગુજરાતના સુરત વચ્ચે વેપારી સંબંધો પર પણ તેની અસર જોવા મળી રહી છે.  હોંગકોંગના એરપોર્ટ પર ફલાઈટો રોકી દેવાના કારણે હીરા ઉદ્યોગને અસર થઈ છે. આમ પણ હીરા ઉદ્યોગ મંદીની મારને કારણ મૃતપાય હાલતમાં છે. તેવા સમયે હોંગકોંગના આંદોલનને કારણે હીરા ઉદ્યોગને મોટી અસર થઈ શકે તેમ છે.

2014 માં, જોશુઆ વાંગ વિશ્વની નજરમાં આવ્યો જ્યારે તેણે ‘ચીન સામે અમબ્રેલા આંદોલન’ શરૂ કર્યું.  તેમાં હોંગકોંગમાં લોકશાહી અને મતદાનના અધિકારોમાં વધારો કરવાની હાકલ કરી હતી. તે સમયે, તે માત્ર 19 વર્ષનો હતો. આ આંદોલનને કારણે જ પ્રતિષ્ઠિત આંતરરાષ્ટ્રીય મેગેઝિન ટાઇમે જોશુઆને 2014 ના સૌથી અસરકારક કિશોરોમાં  તેનું નામ આપ્યું હતું.

એટલું જ નહીં, 2015 માં ફોર્ચ્યુન મેગેઝિનએ તેમને ‘વિશ્વના મહાન નેતાઓ’ ની શ્રેણીમાં શામેલ કર્યો હતો. આ સિવાય વાંગને વર્ષ 2018 માં શાંતિના નોબેલ પુરસ્કાર માટે પણ નોમિનેટ કરાયો હતો.  તે સમયે, તે ફક્ત 22 વર્ષનો હતો. જોશુઆ હાલમાં હોંગકોંગના રાજકીય પક્ષ ડેમોસિસ્ટોના જનરલ સેક્રેટરી  છે. તેમણે ફક્ત 19 વર્ષની ઉંમરે આ પાર્ટીની રચના કરી.

તાજેતરમાં, હોંગકોંગના વહીવટીતંત્રે એક ખરડો પસાર કરવામાં આવ્યો હતો,  જે મુજબ જો હોંગકોંગનો કોઈ વ્યક્તિ ચીનમાં ગુનો કરે છે અથવા વિરોધ પ્રદર્શન  કરે, તો તેની સામે હોંગકોંગમાં નહીં પરંતુ ચીનમાં કાર્યવાહી કરવામાં આવશે.

આ ઉપરાંત, જોશુઆ વાંગ (23) ના નેતૃત્વમાં હોંગકોંગના યુવાઓએ બિલ વિરુદ્ધ રણશિંગુ ફૂંક્યું અને ચીન સામે વિરોધ પ્રદર્શન કરવા શેરીઓમાં ઉતરી ગયા. લાખો યુવાનો હોંગકોંગના માર્ગો પર એકઠા થયા હતા.

હકીકતમાં, હોંગકોંગની યુવાન વસ્તીને લાગ્યું કે ચાઇનાની કમ્યુનિસ્ટ પાર્ટી આ બિલ દ્વારા હોંગકોંગ પર પ્રભુત્વ મેળવવા માંગે છે. જો કે હોંગકોંગ સરકારે સતત અને જોરદાર પ્રદર્શનને ધ્યાનમાં રાખીને બિલ પાછું ખેંચી લીધું, યુવા આંદોલનનો અંત આવ્યો નહીં. વિરોધ કરનારાઓની માંગ છે કે હોંગકોંગમાં લોકશાહી વ્યવસ્થાને વધુ મજબુત બનાવવામાં આવે.