રૂ.૧૦ લાખથી વધુ કિંમતની લક્ઝરી ચીજવસ્તુઓ પર હવે ૧% ટીસીએસ
નવી દિલ્હી, હવેથી રૂ.૧૦ લાખથી વધુ કિંમતના હેન્ડબેગ, કાંડા ઘડિયાળ, ફૂટવેર અને સ્પોર્ટસવેર પર એક ટકા ટેક્સ કલેક્ટેડ એટ સોર્સ લાગુ પડશે. હાલમાં રૂ.૧૦ લાખથી વધુ કિંમતના મોટર વ્હિકલ પર આ ટેક્સ લાગુ પડે છે, પરંતુ હવે આવકવેરા વિભાગે એક નોટિફિકેશન જારી કરી આ ટેક્સ હેઠળ બીજી લક્ઝરી પ્રોડક્ટ્સને પણ આવરી લીધી છે.
આવકવેરા વિભાગે ૨૨ એપ્રિલે કેટલીક લક્ઝરી પ્રોડક્ટ્સ અને સંગ્રહલાયક વસ્તુઓની યાદી જાહેર કરી હતી, જેના પર હવેથી ૧ ટકા ટેક્સ કલેક્ટેડ એટ સોર્સ લાગુ થશે.
આ યાદીમાં આ યાદીમાં કાંડા ઘડિયાળો, ચિત્રો, શિલ્પો અને પ્રાચીન વસ્તુઓ જેવી કલા વસ્તુઓ, સિક્કા અને સ્ટેમ્પ સહિતની સંગ્રહયોગ્ય વસ્તુઓ, યાટ્સ, હેલિકોપ્ટર, લક્ઝરી હેન્ડબેગ, સનગ્લાસ, ફૂટવેર, હાઇ એન્ડ સ્પોર્ટસવેર અને ઇક્વિપમેન્ટ, હોમ થિયેટર સિસ્ટમ્સ તથા રેસિંગ અથવા પોલો હોર્સનો સમાવેશ થાય છે.
સામાન્ય રીતે પ્રોડક્ટ્સના વેચાણ સમયે ખરીદનાર પાસેથી ટેક્સ કલેક્ટેડ એટ સોર્સ વસૂલવામાં આવતો હોય છે અને તેને આઈટી રિટર્ન ફાઇલ ખરીદદાર તેના પર રિફંડ માગી શકે છે. ટેક્સ કલેક્ટેડ એટ સોર્સથી સરકારને કોઈ વધારાની આવક થતી નથી, પરંતુ ખરીદી સમયે પાન વિગતો સબમિટ કરવાની હોવાથી કર વિભાગને ઊંચા મૂલ્યના વસ્તુઓની ખરીદી કરતા લોકો પર નજર રાખવામાં મદદ મળે છે.
બજેટના ભાગ રૂપે લક્ઝરી ચીજવસ્તુઓ તેમજ રૂ. ૧૦ લાખથી વધુ કિંમતના મોટર વાહનો માટે ટેક્સ કલેક્ટેડ એટ સોર્સજોગવાઈ ફાઇનાન્સ એક્ટ, ૨૦૨૪માં કરાઈ હતી.
નાંગિયા એન્ડરસન એલએલપીના ટેક્સ પાર્ટનર સંદીપ ઝુનઝુનવાલાએ જણાવ્યું હતું કે આ નોટિફિકેશન દર્શાવે છે કે સરકાર ઊંચા ભાવની લક્ઝરી પ્રોડક્ટ્સની ખરીદી કરતાં લોકો પર નજર રાખવા માગે છે. તેનાથી કરપાયામાં અને નાણાકીય પારદર્શકતામાં પમ વધારો થશે.SS1MS
