ગુજરાતીઓનું એક જૂથ યુએસ, બીજું નિકારાગુઆ પહોંચી ગયું

અમદાવાદ, વાયા નિકારાગુઆ થઈને લોકોને ઈલીગલી અમેરિકા પહોંચાડવાના એજન્ટોના કાંડનો ભાંડો ફુટ્યા બાદ ગુજરાત પોલીસે ૧૪ એજન્ટો સામે ફરિયાદ નોંધી તેમની શોધખોળ કરી છે. જાેકે, પોલીસની ભીંસ વધ્યા બાદ પણ જાણે ગુજરાતીઓ સહિતના ઈન્ડિયન્સને હજુય નિકારાગુઆ મોકલવામાં આવી રહ્યા હોવાની માહિતી બહાર આવી છે.

સૂત્રોના જણાવ્યા અનુસાર ગુજરાત પોલીસે એજન્ટો સામે ફરિયાદ નોંધી હતી તે જ અરસામાં અલગ-અલગ ગ્રુપમાં લગભગ સાડા ત્રણસો જેટલા ઈન્ડિયન્સને નિકારાગુઆ પહોંચાડવામાં આવ્યા છે, જેમાંના મોટાભાગના ગુજરાતી અને તે પણ ઉત્તર ગુજરાતના છે.

આ તમામ લોકો છેલ્લા ઘણા દિવસોથી દુબઈમાં રોકાયેલા હતા, અને ફ્રાંસમાં ડોંકી ફ્લાઈટ પકડાઈ ગયા બાદ એજન્ટોએ પોતાનું કામકાજ પણ થોડા દિવસો માટે અટકાવી દીધું હતું. જાેકે, હવે ફરી એજન્ટો એક્ટિવ થયા હોવાની ચર્ચા છે, અને તેમણે દિવસોથી દુબઈમાં અટવાયેલા એક ગ્રુપને તાજેતરમાં જ નિકારાગુઆ પહોંચાડ્યું છે.

સૂત્રોનું માનીએ તો દુબઈથી નિકારાગુઆ પહોંચતા ગુજરાતીઓના આ ગ્રુપને લગભગ ચાર-પાંચ દિવસ જેટલો સમય લાગ્યો હતો અને તેમને દુબઈથી સીધા નિકારાગુઆ લઈ જવાને બદલે કેટલાક દેશોમાં ફેરવીને નિકારાગુઆ લઈ જવામાં આવ્યા હતા, અને હવે તેમને ત્યાંથી મેક્સિકો લઈ જવાશે.

એક તરફ ગુજરાતીઓનું એક ગ્રુપ હાલમાં જ નિકારાગુઆ પહોંચ્યું છે તો બીજી તરફ, ચાર-પાંચ દિવસ પહેલા જ બીજા કેટલાક ગુજરાતીઓ પણ મેક્સિકો બોર્ડર ક્રોસ કરી અમેરિકા પહોંચી ગયા હોવાનું પણ જાણવા મળી રહ્યું છે.

અમેરિકા પહોંચી ગયેલા આ તમામ ગુજરાતીઓને પણ નિકારાગુઆ જ લઈ જવાયા હતા અને ત્યાંથી તેઓ દસથી પંદર દિવસમાં મેક્સિકો બોર્ડર સુધી પહોંચ્યા હતા. એટલું જ નહીં, પોલીસની ભીંસ વધતા હાલ એજન્ટો અંડરગ્રાઉન્ડ થઈ ગયા હોવાથી કેટલાક ગુજરાતીઓ દુબઈમાં ઘણા સમયથી અટવાયા હોવાનું સૂત્રોનું કહેવું છે.

દિવસો સુધી દુબઈમાંથી બહાર નીકળવાનો મેળ ના પડતાં ત્યાં ફસાયેલા અમુક લોકોએ તો એજન્ટો સાથે ઝઘડા કરીને પોતાને પાછા ઈન્ડિયા મોકલી દેવા માટે પણ જણાવ્યું હતું, પરંતુ હવે તો ઘણા એજન્ટોએ જ લોકોના ફોનનો જવાબ આપવાનું બંધ કરી દીધું છે.

ફ્રાંસમાં નિકારાગુઆની જે ફ્લાઈટ પકડાઈ તે વખતે ત્રીસેક ગુજરાતીઓને એજન્ટોએ દુબઈથી ઈન્ડિયા મોકલ્યા હતા, અને આ સિવાય બીજા પણ કેટલાક લોકો મુંબઈથી અમદાવાદ પાછા આવી ગયા હતા. ડોંકી ફ્લાઈટ્‌સનો ભાંડો ફુટી જતાં એજન્ટોએ હાલ તો પોતાના આ કામકાજ પર બ્રેક મારી દીધી છે, પરંતુ તેઓ બીજી ટ્રીક્સથી તેમનો આ બેનંબરી ધંધો તો ચલાવી જ રહ્યા છે.

તાજેતરમાં જ એવી માહિતી બહાર આવી હતી કે ડોંકી ફ્લાઈટ અરેન્જ કરવાનું મુશ્કેલ થઈ જતાં હવે એજન્ટો અલગ-અલગ એરલાઈન્સમાં બલ્ક બુકિંગ કરાવીને પોતાના ક્લાયન્ટ્‌સને નિકારાગુઆ પહોંચાડી રહ્યા છે. ઉલ્લેખનીય છે કે, એજન્ટો માટે પોતાના પેસેન્જર્સને મેક્સિકો કરતાં નિકારાગુઆ મોકલવા ખૂબ જ સરળ રહે છે અને નિકારાગુઆમાં એરપોર્ટથી લઈને બોર્ડર ક્રોસ કરાવવા સુધી તમામ જગ્યાએ દિલ્હીના એજન્ટોના મજબૂત સેટિંગ છે.

સૂત્રોનો ત્યાં સુધી દાવો છે કે સપ્ટેમ્બર ૨૦૨૨થી જ એજન્ટો ડોંકી ફ્લાઈટ ચલાવી રહ્યા છે, જેનાથી અત્યારસુધી હજારો ગુજરાતીઓને અમેરિકા પહોંચાડી પણ દેવાયા છે. જાેકે, આ બધાનું જડબેસલાક સેટિંગ હોવા છતાંય દુબઈથી નિકારાગુઆ જવા નીકળેલી ડોંકી ફ્લાઈટને ૨૧ ડિસેમ્બરે ફ્રાંસે પકડી લેતા એજન્ટો દોડતા થઈ ગયા હતા. SS2SS