ચીનમાં નવા વાયરસથી ગભરાટ ફેલાયો સોશિયલ મીડિયા પર તસવીરો વાયરલ

બેઇજિંગ, ચીનમાં જન્મેલા કોરોના વાયરસ અને તેણે વેરેલા વિનાશને દુનિયાભરના દેશો ભૂલી શક્યા નથી. કોરોના મહામારીમાંથી માંડ કળ વળી છે ત્યારે ચીનમાં નવા વાયરસની ચર્ચા છે. સોશિયલ મીડિયા પર છેલ્લા કેટલાક દિવસથી હોસ્પિટલ્સની તસવીરો વાયરલ થઇ છે.

જેમાં દર્દીઓની લાઇનો નજરે પડે છે. જોકે ચીને સ્થિતિ સારી હોવાનો દાવો કર્યાે છે. સૂત્રોનો દાવો છે કે, ચીનના લોકો હ્યુમન મેટાપ્નેયૂમોવાયર (એચએમપીવી) અને અન્ય ઘણા ખતરનાક વાયરસની ઝપટમાં આવી રહ્યા છે. તેને લીધે મોટી સંખ્યામાં લોકો બીમાર થયા છે.

આવા વાયરસમાં ઇન્ફ્લુએન્ઝા અને માઇક્રોપ્લાઝ્માનો સમાવેશ થાય છે. એચએમવીપી વાયરસ શરદી જેવા લક્ષણો ધરાવે છે. તેની સૌથી વધુ અસર નાના બાળકો, વૃદ્ધો અને નબળી રોગપ્રતિકાર શક્તિ ધરાવતા લોકોને થાય છે.

વાયરસથી સંક્રમિત દર્દીઓમાં ખાંસી, તાવ, નાક બંધ થવા જેવી સમસ્યાઓ ઊભી થાય છે. ઉપરાંત, તેનો દર્દી ન્યુમોનિયા અને બ્રોંકિયોલાઇટિસ જેવી ગંભીર બીમારીનો પણ શિકાર બને છે. વાયરસ ઝડપથી ફેલાય છે. તેનું સંક્રમણ ખાંસી કે છીંકથી ફેલાય છે.

ચીનમાં એચએમપીવીના સંક્રમણના તાજેતરના અહેવાલોને પગલે નેશનલ સેન્ટર ફોર ડિસીઝ કંટ્રોલ (એનસીડીસી)ની ભારતમાં સીઝનલ ઇન્ફ્લુએન્ઝા (ફ્લુ) અને શ્વસનતંત્રના કેસ પર ચાંપતી નજર છે. એનસીડીસી આંતરરાષ્ટ્રીય એજન્સીઓ સાથે સંપર્કમાં છે.

એક વરિષ્ઠ અધિકારીએ જણાવ્યું હતું કે, “અમે સ્થિતિ પર સતત નજર રાખીશું અને તેના આધારે માહિતી આપતા રહીશું.” ડિરેક્ટર જનરલ ઓફ હેલ્થ સર્વિસિસ (ડીજીએચએસ) ડો. અતુલ ગોયલે જણાવ્યું હતું કે, “એચએમપીવી શ્વસનતંત્રના અન્ય વાયરસ જેવો છે. તેના લક્ષણો સામાન્ય શરદી જેવા હોય છે.

યુવા અને બહુ વૃદ્ધ લોકોમાં તે ફ્લુ જેવા લક્ષણો દર્શાવે છે.” તેમણે કહ્યું હતું કે, “ડિસેમ્બરના ડેટા મુજબ અમારી કોઇ હોસ્પિટલમાં શ્વસનતંત્રના દર્દીઓની સંખ્યામાં મોટી વૃદ્ધિ નોંધાઈ નથી.”SS1MS