ટોલનાકા નજીક કારમાંથી પિસ્તોલની ચોરી કરનાર યુવાન ઝડપાયો
(પ્રતિનિધિ) ભરૂચ, ભરૂચ નજીક નેશનલ હાઈવે નંબર ૪૮ ઉપર કેબલ બ્રિજના ટોલનાકા નજીક કાર માંથી પિસ્તોલ અને કારતુસની ચોરી કરનાર યુવાનની ભરૂચ એસોજીની ટીમે આર્મ્સ એક્ટ હેઠળ ધરપકડ કરી કાયદેસરની કાર્યવાહી હાથધરી હતી.
પ્રાપ્ત માહિતી અનુસાર દેવગઢબારીયા ખાતે રહેતા નીલ સોની રવિવારના રોજ ભરૂચ નજીક નેશનલ હાઈવે નંબર ૪૮ ઉપરથી પસાર થઈ રહ્યા હતા.તે દરમ્યાન કેબલ બ્રિજના ટોલનાકા પાસે તેઓએ તેમની કાર ઉભી રાખી કોઈ કામ અર્થે ગયા હતા.આ સમયે તેમની કારના ડેસબોર્ડ પર સ્વ રક્ષણ માટે મુકેલ લાયસન્સ વાળી પિસ્તોલ અને કારતુસની અજાણ્યો ઈસમ ચોરી કરી ફરાર થઈ ગયો હતો.
આ અંગે તેઓએ અંકલેશ્વર શહેર બી ડિવિઝન પોલીસ માટે ફરિયાદ નોંધાવી હતી.આ બાદ ભરૂચ એસોજીની ટીમે તપાસ હાથ ધરતા તેઓને ચોક્કસ બાતમી મળી હતી જેના આધારે પોલીસે માંડવા ગામ નજીક આવેલ સાંઈવાટિકા સોસાયટીમાં દરોડા પાડતા મૂળ મધ્યપ્રદેશના ગ્વાલિયરના રહેવાસી પ્રિન્સ રાય નામના યુવાનના મકાન માંથી પિસ્તોલ અને છ નંગ કારતુસ મળી આવ્યા હતા.
આથી પોલીસે યુવાન સામે આર્મ્સ એક્ટ હેઠળ ગુનો નોંધી તેની ધરપકડ કરી છે.ફરિયાદી સરદાર બીજના ટોલનાકા પાસે ગાડી પાર્ક કરી કામ અર્થે ગયા હોવાથા કારનો કારનો દરવાજો ખુલ્લો જ હતો.તે દરમ્યાન નજર ચૂકવી યુવાને ચોરી કરી હોવાનું બહાર આવ્યું છે.આ મામલાની વધુ તપાસ અંકલેશ્વર શહેર બી ડિવિઝન પોલીસ ચલાવી રહી છે.
