ફ્રાન્સના રાષ્ટ્રપતિ મેક્રોન સહિત ભારતીયોને મળ્યા PM મોદી

વડાપ્રધાન નરેન્દ્ર મોદીનું ફ્રાન્સમાં ભવ્ય સ્વાગત-ફ્રાન્સથી PM મોદી અમેરિકા પહોંચશેઃ ટ્રમ્પને મળવા ઉત્સાહીત છુંઃ મોદી

(એજન્સી)નવી દિલ્હી, પ્રધાનમંત્રી મોદી ફ્રાન્સ અને અમેરિકાની મુલાકાત માટે રવાના થયા હતા અને ફ્રાંસ પહોંચ્યા ત્યારે તેમનું ભવ્ય સ્વાગત કરવામાં આવ્યું હતું. આ ઉપરાંત તેમણે ફ્રાંસમાં પ્રતિનીધિ મંડળ સાથે ઔપચારિક વાતચીત કરી હતી. તેઓ ૧૦ થી ૧૪ ફેબ્રુઆરી સુધી વિદેશ પ્રવાસ પર રહેશે.

આ સમયગાળા દરમિયાન તેઓ આજથી ૧૨ ફેબ્રુઆરી સુધી ફ્રાન્સ અને ૧૨ થી ૧૪ ફેબ્રુઆરી સુધી અમેરિકાની મુલાકાત લેશે. જતા પહેલા પ્રધાનમંત્રીએ કહ્યું કે, તેઓ અમેરિકાના રાષ્ટ્રપતિ ડોનાલ્ડ ટ્રમ્પને મળવા માટે ખૂબ જ ઉત્સાહિત છે. મારા પહેલા કાર્યકાળ દરમિયાન તેમની સાથે કામ કરવાની યાદો ખૂબ જ મધુર છે.

તેમણે પોતાની મુલાકાતને ભારત-અમેરિકા સંબંધોને મજબૂત બનાવવાની એક મહત્ત્વપૂર્ણ તક ગણાવી. પીએમએ કહ્યું કે બંને દેશો વચ્ચે ભાગીદારીને પ્રોત્સાહન આપવાનો મુદ્દો તેમની યુએસ મુલાકાત દરમિયાન એજન્ડામાં સામેલ કરવામાં આવશે.

આ તેમની ફ્રાન્સની છઠ્ઠી મુલાકાત છે. ત્રીજી વખત વડા પ્રધાન બન્યા પછી તેઓ પહેલી વાર ફ્રાન્સ જઈ રહ્યા છે. પીએમ છેલ્લે ૨૦૨૩માં રાષ્ટ્રીય દિવસ (બેસ્ટિલ ડે) કાર્યક્રમમાં હાજરી આપવા માટે ફ્રાન્સની મુલાકાતે ગયા હતા. તેમજ પીએમ ફ્રાન્સ પહોંચી ગયાનું જાણવા મળે છે. તેમજ પ્રધાનમંત્રીના માનમાં ફ્રેન્ચ સરકારે પ્રખ્યાત એલિસી પેલેસ ખાતે વીવીઆઈપી ડિનરનું આયોજન કર્યું હતું.

તેમાં ફ્રાન્સના રાષ્ટ્રપતિ મેક્રોન સહિત કેટલાક અન્ય દેશોના નેતાઓ હાજર રહ્યાં હતા. ૧૧ ફેબ્રુઆરીના રોજ પીએમ પેરિસના ગ્રાન્ડ પેલેસ ખાતે રાષ્ટ્રપતિ મેક્રોન સાથે આર્ટિફિશિયલ ઇન્ટેલિજન્સ (એઆઈ) એક્શન સમિટ ૨૦૨૫ની સહ-અધ્યક્ષતા કરશે. આ સમિટ ૨૦૨૩માં બ્રિટનમાં અને ૨૦૨૪માં દક્ષિણ કોરિયામાં યોજાઈ હતી.

સમિટમાં એઆઈ ના જવાબદાર ઉપયોગ પર ચર્ચા કરવામાં આવશે, જેથી તે લોકોના કલ્યાણ માટે ઉપયોગી થઈ શકે અને તેના જોખમોને નિયંત્રિત કરી શકાય. આ સમય દરમિયાન વૈશ્વિક રાજકારણ પર પણ ચર્ચા થઈ શકે છે. પીએમ મોદી ફ્રાન્સના ઉદ્યોગપતિઓને મળી શકે છે.

અમેરિકાના ઉપરાષ્ટ્રપતિ જેડી વાન્સ અને ચીનના નાયબ વડા પ્રધાન પણ એઆઈ એક્શન સમિટમાં હાજરી આપશે. રોઇટર્સના જણાવ્યા અનુસાર, ઓપનએઆઈના સીઈઓ સેમ ઓલ્ટમેન પણ આ કાર્યક્રમમાં હાજરી આપી શકે છે. આ કાર્યક્રમમાં ગુગલ અને માઈક્રોસોફ્‌ટના ટોચના અધિકારીઓ પણ હાજરી આપી શકે છે.

મોદીની આ મુલાકાત બંને દેશો વચ્ચેના સંરક્ષણ સંબંધોને મજબૂત બનાવવાની અપેક્ષા છે. હકીકતમાં, આ મુલાકાત દરમિયાન ભારત અને ફ્રાન્સ વચ્ચે ૨૬ રાફેલ મરીન ફાઇટર જેટ અને ૩ સ્કોર્પિયન ક્લાસ સબમરીનની ખરીદી સહિત ઘણા મહત્ત્વપૂર્ણ સોદાઓને અંતિમ સ્વરૂપ આપવામાં આવી શકે છે.

પશ્ચિમી દેશોથી વિપરીત ફ્રાન્સે ભારતને પરમાણુ પ્લાન્ટ સ્થાપવામાં મદદ કરી. રશિયા પછી, ફ્રાન્સ એકમાત્ર એવો દેશ છે જેણે ભારતને તેની પરમાણુ ક્ષમતા વધારવામાં મદદ કરી. આ પ્લાન્ટ અંગે બંને દેશો વચ્ચે હજુ પણ વાતચીત ચાલી રહી છે. મહારાષ્ટ્રના જૈતાપુરમાં સ્થાપિત પરમાણુ પ્લાન્ટ ફક્ત ફ્રાન્સની મદદથી જ શક્ય બન્યો હતો.