પ્રજ્ઞાચક્ષુનું પગનું ઓપરેશન કરાવી પગભર કરી પરિવાર સાથે મેળાપ કરાવ્યો
ભરૂચની સેવાયજ્ઞ સમિતિએ મહારાષ્ટ્રના ચીખલીના યુવકના પગનું ઓપરેશન
(પ્રતિનિધિ) ભરૂચ, ભરૂચની સેવાયજ્ઞ સમિતિએ એક પ્રજ્ઞાચક્ષુનું પગનું ઓપરેશન કરાવી પગભર કરી પરિવાર સાથે મેળાપ કરાવતા પ્રજ્ઞાચક્ષુમાં ખુશી પ્રસરી હતી.
મહારાષ્ટ્રના ચીખલી શહેરના વતની શિવદાસ જયગુડે જેમની ઉંમર ૩૮ વર્ષ છે.જેઓ પ્રજ્ઞાચક્ષુ હોય અને મુંબઈના ફૂટપાથ પર રમકડાં વેચીને પોતાના ઘરનું ગુજરાન ચલાવતા હતા.
ગત જાન્યુઆરી મહિનાની શરૂઆતમાં કામ કરતાં.કરતાં તે પડી જતા તેઓ બેભાન હાલતમાં રોડની સાઈડ પર પડેલા હતા.એમના જમણાં પગમાં ફ્રેકચર પણ થયું હતું.એમની સ્થિતિ જોઈ ત્યાંની સેવાભાવી સંસ્થા ‘જલારામ સેવા’ શિવદાસને ભરૂચ સ્થિત સેવાયજ્ઞ સમિતિના અનાથ ઘરડાઘરમાં આશ્રય માટે મૂકી ગયા હતા.
સેવાયજ્ઞ સમિતિના કાર્યકર હિમાંશુ પરીખે શિવદાસનું કાઉન્સિલિંગ કર્યું ત્યારે શિવદાસ માનસિક રીતે થોડા પરેશાન જણાતા હતા અને પથારી માંથી ઊભા થઈ શકવા અસમર્થ હતા. આથી શિવદાસને સિવિલ હોસ્પિટલ ભરૂચમાં એડમિટ કરાવ્યા હતા અને ત્યાં શિવદાસનું ડાબા પગના ફેક્ચરનું ઓપરેશન ડૉ.કૃણાલ ચાંપાનેરિયા દ્વારા સફળતા પૂર્વક કરાયું હતું.ત્યાર બાદ ત્રણ મહિનાની સારવાર પછી શિવદાસ પોતાના પગભર થતા તેને પરત તેના ઘરે મોકલવા આવ્યો હતો.
પ્રજ્ઞાચક્ષુ શિવદાસ જયગુડે ત્રણ મહિના બાદ હવે પોતાનો પરિવાર પાસે જઈ પોતાના પરિવારનું ગુજરાન ચલાવી શકવા સમર્થ છે.જેના પગલે તેને સેવાયજ્ઞ સમિતિ દ્વારા તેને પરત તેના ઘરે મોકલવામાં આવતા તે પરિવાર સાથે મળી પોતાનું ગુજરાન ચલાવવા સમર્થ થતા ખુશી વ્યક્ત કરવા સાથે તેની સારી સંભાળ રાખવા બદલ આ ઉમદા કાર્ય બદલ શિવદાસની પત્ની અને તેના બે બાળકોએ ભરૂચની સેવાયજ્ઞ સમિતિનો, ઓર્થોપેડિક સર્જન ડૉ.કૃણાલ ચાંપાનેરીયા અને ફિઝિયોથેરાપીસ્ટ ડૉ.રિંકલનો આભાર વ્યક્ત કર્યો છે.
