જો વાતચીત થશે તો યુક્રેન-રશિયા યુધ્ધ સમાપ્ત થશેઃ કોઈ પૂર્વશરતો નથીઃ રશિયન પ્રમુખ

રશિયન પ્રમુખ વ્લાદિમીર પુતિન યુક્રેન સાથે સમજૂતી માટે તૈયાર!-પત્રકારોને જવાબ આપતી વખતે, પુતિને ઓરેશ્નિક હાઇપરસોનિક મિસાઇલ વિશે પણ વાત કરી

મોસ્કો,  રશિયન પ્રમુખ વ્લાદિમીર પુતિને ગઈકાલે અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પ સાથે વાત કરી હતી. આ દરમિયાન તેમણે યુક્રેન યુદ્ધ પર સમાધાનની વાત કરી હતી.

તેમણે ભારપૂર્વક જણાવ્યું હતું કે ચર્ચા માટે કોઈ પૂર્વશરતો નથી પરંતુ કોઈપણ સોદામાં કાયદેસર યુક્રેનિયન અધિકારીઓ સામેલ હોવા જોઈએ. રિપોર્ટ અનુસાર, પુતિને કહ્યું કે રશિયા રાષ્ટ્રપતિ વોલોદિમિર ઝેલેન્સકી સહિત કોઈપણ સાથે વાત કરવા તૈયાર છે. પુતિને કહ્યું કે તેમણે ટ્રમ્પ સાથે વર્ષાેથી વાત કરી નથી પરંતુ સંઘર્ષ અંગે ચર્ચા કરવા માટે તેમની સાથે મળવા માટે તૈયાર છે. પુતિને એવા દાવાઓને ફગાવી દીધા હતા કે રશિયા નબળી સ્થિતિમાં છે.

તેમણે કહ્યું કે ૨૦૨૨માં યુક્રેન પર થયેલા હુમલા બાદ દેશ મજબૂત બન્યો છે. જ્યારે પુતિને કહ્યું હતું કે રશિયા વાટાઘાટો માટે તૈયાર છે, તેમણે ભારપૂર્વક જણાવ્યું હતું કે કિવ પણ સમાધાન માટે તૈયાર હોવું જોઈએ. પુતિને કાયમી શાંતિ કરારની તરફેણમાં અસ્થાયી યુદ્ધવિરામની કોઈપણ શક્યતાને નકારી કાઢી હતી.

પત્રકારોને જવાબ આપતી વખતે, પુતિને ઓરેશ્નિક હાઇપરસોનિક મિસાઇલ વિશે પણ વાત કરી, જેનો ઉપયોગ રશિયા યુક્રેનની લશ્કરી ફેક્ટરીમાં કરી ચૂક્યું છે. તેમણે કહ્યું કે તેઓ યુક્રેનમાં બીજું પ્રક્ષેપણ કરવા અને પશ્ચિમી હવાઈ સંરક્ષણ પ્રણાલીઓ તેને શૂટ કરી શકે છે કે કેમ તે જોવા માટે તૈયાર છે.

જો કે, તે સમયે યુક્રેનના પ્રમુખ ઝેલેન્સ્કીએ બ્રસેલ્સમાં યુરોપિયન કાઉન્સિલની બેઠકમાં એક પ્રેસ કોન્ફરન્સ દરમિયાન પુતિનના મિસાઇલ ઉપયોગની ચર્ચા કરી અને પૂછ્યું, “શું તમને લાગે છે કે તે સમજદાર વ્યક્તિ છે?”