શાહિદ, ક્રિતી અને રશ્મિકા ઓગસ્ટથી કોકટેલ ૨ માટે શૂટિંગ શરૂ કરશે

૨૦૨૬ના અંત સુધીમાં ફિલ્મ રિલીઝ કરવાની ગણતરી

૨૦૧૨ની કોકટેલમાં દિનેશ વિજને ઈમ્તિયાઝ અલી સાથે પાર્ટનરશીપ કરી હતી

જે આ વખતના ભાગમાં લવ રંજન સાથે કરવાના છે

મુંબઈ,વર્ષ ૨૦૧૨ની સૌથી લોકપ્રિય રોમાન્સ કોમેડી હિન્દી ફિલ્મમાંની એક ફિલ્મ કોકટેઇલ હતી. આ ફિલ્મનાં ફેન્સ માટે સારા સમાચાર છે. હવે આ લોકપ્રિય ફિલ્મની સિક્વલ માટે. દિનેશ વિજાન અને લવ રંજન એકસાથે આવી રહ્યા છે. તેમની ગણતરી આ સિક્વલ બાદ એક ફ્રેન્ચાઇઝી બનાવવાનો છે. વધુ એક રસપ્રદ વાત એ પણ છે ‘તેરી બાતો મેં ઐસા ઉલજા જીયા’ ની સફળ જોડી શાહિદ કપૂર અને ક્રિતિ સેનન ફરી આ ફિલ્મમાં લીડ રોલમાં જોવા મળશે. સુત્રો દ્વારા મળતી અનુસાર ‘કોકટેલ ૨’નું શૂટિંગ ઓગસ્ટ મહિનામાં શરૂ થશે. આ ફિલ્મનું શૂટિંગ ભારતમાં અને યુરોપના કેટલાક સ્થળો પર કરવામાં આવશે.

તેમજ જાન્યુઆરી ૨૦૨૬માં ફિલ્મનું શૂટિંગ પુરૂ થઇ જશે એવો અંદાજ છે . શાહિદ અને ક્રિતી સાથે હવે રશ્મિકા પણ આ ફિલ્મમાં જોડાઈ છે. આ ત્રણ મુખ્ય કલાકારો સિવાય બીજા અનેક કલાકારોનું કાસ્ટીંગ અત્યારે ચાલી રહ્યું છે.પહેલા ભાગની જેમ આ વખતે પણ હોમી અડજાણિયા ફિલ્મને ડાયરેક્ટ કરશે. ૨૦૧૨ની કોકટેલમાં દિનેશ વિજને ઈમ્તિયાઝ અલી સાથે પાર્ટનરશીપ કરી હતી જે આ વખતના ભાગમાં લવ રંજન સાથે કરવાના છે. કોકટેલ ૨ની વાર્તા લવ રંજને લખી છે, જેઓ પોતાની વાર્તા દર્શાવાની રીત અને લાગણીઓને બારીકાઈથી દર્શાવવા પ્રખ્યાત છે.

કોકટેલ ૨નું કામ શરુ કરતાં પહેલા શાહિદ કપૂર વિશાલ ભારદ્વાજની ફિલ્મનું કામ પહેલાં પુરું કરશે. જેનું નામ હાલ પૂરતું ‘અર્જુન ઉસ્ત્રા’ રાખવામાં આવ્યું છે. બીજી બાજુ ક્રિતી સેનન પહેલા આનંદ એલ. રાયની ‘તેરે ઇશ્ક મૈં’નું શૂટિંગ પૂરું કરશે. કોકટેલ ૨ની બીજી હિરોઇન રશ્મિકા મંદાના આયુષ્માન ખુરાના સાથેની ફિલ્મ ‘થામા’માં પોતાના ભાગનું શૂટિંગ કરી જલ્દી જ બીજા કલાકારો સાથે જોડાશે. કોકટેલના પહેલા ભાગની વાત કરીએ તો સૈફ અલી ખાન, દિપીકા પાદુકોણ અને ડાયના પેન્ટી લીડ રોલમાં હતાં. આ ફિલ્મને ખુબ સફળતા મળી હતી. ત્રણેય કલાકારની એક્ટિંગ સાથે જ આ ફિલ્મના ગીતોને પણ લોકો દ્વારા ખુબ સહકાર મળ્યો હતો, જેની આશા દર્શકોને આવનારા ભાગમાં પણ રહેશે.