સ્ટેટ મોનિટરિંગ સેલ અને અમદાવાદ એસઓજીએ ગાંજાનો જથ્થો ઝડપ્યો

અમદાવાદ, ગુજરાતમાં ડ્રગ્સની સાથે સાથે હવે ગાંજાનું પણ દૂષણ સતત વધી રહ્યું છે ત્યારે જ સ્ટેટ મોનિટરિંગ સેલની ટીમે ઓડિશાથી ટ્રકમાં ગાંજો લઇને આવતા ડ્રાઇવર અને ક્લીનરને ઝડપી લીધા હતા.

બીજી તરફ, એસઓજીની ટીમે પણ રાજસ્થાનથી ગાંજો લાવતા મહિલા સહિત બે જણાને ઝડપી લીધા છે. આ ગાંજો કોના માટે લાવવામાં આવતો હતો તેની તપાસ ચાલી રહી છે.સ્ટેટ મોનિટરિંગ સેલના નિર્લિપ્ત રાય અને કે.ટી. કામરિયાની ટીમને બાતમી મળી હતી કે ઓડિશાથી ટ્રકમાં ગાંજાનો જથ્થો લાવવામાં આવી રહ્યો છે.

તેને પગલે તેમની ટીમના સબ ઇન્સ્પેક્ટર કે.ડી. રવિયા કામે લાગી ગયા હતા. ગાંજો ભરેલી ટ્રક સનાથલ આવવાની વિગતો મળતાં સનાથલ નજીક પોલીસ ગોઠવાઇ ગઇ હતી અને બાતમીવાળી ટ્રક આવતા તેની તપાસ કરાઈ હતી. જેમાં ટ્રકમાંથી ૩૩૧૨૫ કિલો ગાંજો મળી આવ્યો હતો. ટ્રક સાથે મળી પોલીસે ૨૩.૪૪ લાખનો મુદ્દામાલ કબજે લીધો હતો.

ગાંજાના જથ્થા સાથે ટ્રકનો ચાલક રીયાઝશા ઉમરશા ફકીર (રહે. ગોંડલ, રાજકોટ) તથા ટ્રકનો ક્લીનર ઝફર હુસૈન ઉર્ફે ભુરો સોલંકી (રૈયા રોડ, રાજકોટ)ને ઝડપી લેવાયા હતા. તેમની પ્રાથમિક પૂછપરછ કરતાં તેમણે જણાવ્યું હતું કે આ ગાંજો તેઓ ઓડિશાના ગંજામ જિલ્લામાં જંગલ વિસ્તારના અમન પાસેથી લાવ્યા હતા. તેઓ પોતાના ગ્‰પના મોઇન જીકરભાઇ સોલંકી સાથે ગાંજાનો છૂટક વેપાર કરે છે.

તેઓ ટ્રકમાં લોખંડની પાઇપની આડમાં ગાંજો છૂપાવીને લાવ્યા હતા. એસઓજીના જયરાજસિંહ જાડેજા અને બી.સી. સોલંકીની ટીમે બાતમીના આધારે વોચમાં ગોઠવાઇ ગઈ હતી.

દંપતી ગાંજાનો જથ્થો રાજસ્થાનથી ટ્રેનમાં આમદાવાદ લાવ્યા હતા અને લઇને ઇન્દિરાબ્રિજ નજીકથી પસાર થઇ રહ્યા હતા ત્યારે જ પોલીસે કમલેશ ઉર્ફે લતિફ મોતીભાઇ વાઘેલા તથા તેની પત્ની પિન્કી (બન્ને રહે. વસંતનગરના છાપરા, ઠક્કરબાપાનગર)ને ઝડપી લીધા હતા. તેમની પાસેથી પોલીસે સાડા ત્રણ કિલો ગાંજો ઝડપી લીધો હતો. પૂછપરછમાં તેમણે રાજસ્થાનથી ગાંજો લાવીને અમદાવાદમાં વેચતા હોવાની કબૂલાત કરી હતી.SS1MS