સુરતઃ કામની શોધમાં આવેલા બે યુવકોના ટ્રેન અડફેટે મોત

સુરત, સુરત શહેરના સચિન-ભેસ્તાન રેલવે ટ્રેક પર ગઈકાલે રાત્રે પરપ્રાંતિય બે યુવકોના ટ્રેનની ઝપટે મોત થયું હતું. જ્યારે અન્ય એક યુવક લાપતા હોવાનું મૃતકોના પરિવારનું કહેવું છે.

બંને મૃતકો બે દિવસ પહેલા જ વતન યુપીથી સુરત રોજીરોટીની શોધમાં આવ્યા હતા. અને જરીના કારખાનામાં કામ અર્થે જતા હતા તે વખતે જ આ ઘટના બની હતી.પ્રાપ્ત માહિતી અનુસાર મૂળ યુપીના જોનપૂરના વતની ૨૪ વર્ષીય દીનુ વિશ્રામભાઈ નિશાદ અને ૨૨ વર્ષીય આકાશ ઉર્ફે બડકુ શ્રીપાલ નિશાદ હાલ શહેરના સચિન વિસ્તારમાં આવેલા પાલી ગામ ખાતે શિવાંજલિ સોસાયટીમાં રહેતા હતા.

બંને યુવકો બે દિવસ પહેલા જ વતન યુપીથી સુરત રોજીરોટીની શોધમાં આવ્યા હતા. બંને મિત્રો ગઈકાલે મોડી રાત્રે જરીના કારખાનામાં કામ અર્થે ઘરેથી નીકળ્યા હતા. દરમિયાન સચિન ભેસ્તાન રેલવે ટ્રેક પરથી પસાર થતાં હતા.

ત્યારે વડનગર વલસાડ એક્સપ્રેસ ટ્રેનની ઝપટે ચઢ્યા હતા. સર્જાયેલી આ ઘટનામાં બંનેના સ્થળ પર જ મોત થયા હતા. આ બનાવ અંગે બંને મૃતકોના પરિવારને જાણ કરાતા પરિવારજનો ઉપર દુખનો ડુંગર તૂટી પડ્યો હતો.

બંને મૃતકો સાથે અન્ય એક યુવક પણ સાથે હોવાનું મૃતકના નજીકના લોકોનું કહેવું છે અને તે પણ અકસ્માત પછી લાપતા થયો છે. આ બનાવ અંગે સુરત રેલવે પોલીસે આગળની કાર્યવાહી હાથ ધરી વધુ તપાસ શરૂ કરી છે.SS1MS