સ્વિસ પ્રેમિકાને ભારત બોલાવી શંકાશીલ પ્રેમીએ હત્યા કરી

નવી દિલ્હી, ગુનાખોરી માટે જાણીતા દિલ્હીમાં હવે એક સ્વિસ મહિલાની હત્યા થઈ છે. સ્વિટ્‌ઝર્લેન્ડની નાગરિક મહિલાની હત્યા તેના ભારતીય પ્રેમી દ્વારા કરવામાં આવી હતી અને તેનો મૃતદેહ એક પ્લાસ્ટિકના કોથળામાં ભરીને કારમાં છુપાવવામાં આવ્યો હતો. આ મહિલાના શરીર પર ઈજાના નિશાન છે અને તેનું ગળું દબાવીને હત્યા કરવામાં આવી હતી.

પોલીસને જ્યારે આ મૃતદેહ મળ્યો ત્યારે તે લોખંડની સાંકળોથી બાંધેલો હતો. શરીર પર ઈજાના નિશાનો પરથી સ્પષ્ટ છે કે હત્યારાએ તેના પર અત્યાચાર કર્યો હતો. દિલ્હી પોલીસને નીના બર્જર નામની મહિલાનો મૃતદેહ મળી આવ્યો છે અને આ કેસમાં તેના પ્રેમી ગુરપ્રિત સિંહની ધરપકડ કરવામાં આવી છે. શુક્રવારે પશ્ચિમ દિલ્હીના તિલક નગર એરિયામાંથી ડેડ બોડી મળી આવી હતી.

પોલીસના જણાવ્યા પ્રમાણે ગુરપ્રિત અને નીનાની મુલાકાત સ્વિટ્‌ઝર્લેન્ડમાં થઈ હતી. ત્યાર પછી તેઓ મિત્ર બની ગયા હતા અને વારંવાર મળતા હતા. આ બંનેની મુલાકાત ડેટિંગ એપ પર થઈ હોવાનું માનવામાં આવે છે. ગુરપ્રિત ઘણી વખત નીનાને મળવા માટે સ્વિટ્‌ઝર્લેન્ડ જતો હતો, પરંતુ તેને શંકા હતી કે તેની ગેરહાજરીમાં નીના બર્જર બીજા કોઈ પુરુષ સાથે સંબંધ ધરાવતી હતી.

ત્યાર પછી ગુરપ્રિતે નીનાને દિલ્હી આવવા માટે કહ્યું. ગુરપ્રિત સિંહની માંગણીને માન આપીને ૧૧ ઓક્ટોબરે નીના બર્જર દિલ્હી આવી હતી. પરંતુ ગુરપ્રિતે તેની હત્યા કરવાનો પ્લાન ઘડી લીધો હતો. ૫ દિવસ પછી ગુરપ્રિત નીનાને એક રૂમમાં લઈ ગયો જ્યાં તેના હાથ-પગ બાંધી દીધા અને ગળું દબાવીને હત્યા કરી નાખી. થોડા સમય માટે તેણે બર્જરના મૃતદેહને એક કારમાં રાખ્યો હતો જે કાર તેણે એક મહિલાની આઈડી પર ખરીદી હતી. પરંતુ કારમાંથી દુર્ગંધ આવવાની શરૂઆત થતા તેણે મહિલાની ડેડ બોડી એક રસ્તા પર ફેંકી દીધી અને ત્યાંથી ફરાર થઈ ગયો હતો.

દિલ્હી પોલીસને આ મૃતદેહ મળી આવ્યા પછી સીસીટીવી ફૂટેજના આધારે ગુરપ્રિત સિંહ સુધી પહોંચી ગઈ હતી. પોલીસે આ બોડી જ્યાં રાખવામાં આવ્યો હતો તે સફેદ રંગની સેન્ટ્રો કાર શોધી કાઢી છે.

આ ઉપરાંત ગુરપ્રિતનું પોતાનું ફોર વ્હીલર પણ જપ્ત કર્યું છે. ગુરપ્રિતના ઘરેથી પોલીસને ૨.૨૫ કરોડ રૂપિયા મળી આવ્યા છે. પોલીસે ગુરપ્રિતની પૂછપરછ કરી ત્યારે જાણવા મળ્યું કે તેઓ ડેટિંગ એપ દ્વારા એકબીજાના સંપર્કમાં આવ્યા હતા. ગુરપ્રિતને જ્યારે લાગ્યું કે સ્વિસ યુવતી કોઈની સાથે અફેર ધરાવે છે ત્યારે તેણે તેને ભારત બોલાવીને હત્યા કરવાનું નક્કી કરી લીધું હતું. ભારતમાં નીના બર્જરને વાતોમાં ભોળવીને તેના હાથપગ બાંધી નાખવામાં આવ્યા અને ત્યાર પછી હત્યા કરવામાં આવી હતી.SS1MS