‘તારક મહેતા કા ઉલ્ટા ચશ્મા’માં 7 વર્ષે દયાબેનની એન્ટ્રી થશે એવી ચર્ચા છે

કાજલ પિસલે ડમી એપિસોડ માટે શૂટ શરૂ પણ કરી દીધું

જેઠાલાલને નવી દયા મળી ગઈ હોવાની ચર્ચા

મુંબઈ,
ટેલિવિઝનના ઇતિહાસની સૌથી વધુ લાંબી ચાલનારી લોકપ્રિય કોમેડી સિરીયલ ‘તારક મહેતા કા ઉલ્ટા ચશ્મા’માં સાત વર્ષે દયાબેનની એન્ટ્રી થશે એવી ચર્ચા છે. તારક મહેતા શોમાં જેઠાલાલ અને દયાભાભીનાં પાત્રો સૌથી લોકપ્રિય પાત્રોમાંના બે હતાં, તેમાં દયા ભાભીનું પાત્ર ભજવતાં દિશા વાકાણી ૭ વર્ષથી શોમાંથી બહાર છે અને ગડા પરિવાર સાથે શોના દર્શકો પણ દયાબેનની આતુરતાથી રાહ જુએ છે. ત્યારે હવે બધાની આતુરતાનો અંત આવે તેવી શક્યતા છે.

છેલ્લાં થોડાં દિવસથી ચર્ચા છે કે નવા દયાબેન મળી ગયાં છે અને તેમણે શૂટિંગ પણ શરૂ કરી દીધું છે. ત્યારે હવે કેટલાંક અહેવાલો એવા પણ છે કે આ પાત્ર હવે કોણ ભજવશે તેનું નામ પણ જાહેર થઈ ગયું છે, જોકે હજુ સુધી શોના પ્રોડ્યુસર કે શોની ટીમ પછી કોઈ નામની જાહેરાત કરવામાં આવી નથી. એવી ચર્ચા છે કે ટેલિવિઝનની અનુભવી એક્ટ્રેસ કાજલ પિસલ દયાનું પાત્ર ભજવશે. પ્રોડ્યુસર આસિત મોદી છેલ્લા ઘણા વર્ષથી આ પાત્ર માટે કોઈ કલાકારની શોધમાં હતા.

તેમણે દયાનું પાત્ર કરતાં દિશા વાકાણીને પાછા લાવવાના ઘણા પ્રયત્નો કર્યા, તે અંતે પાછા ન આવતા તેમણે નવા કલાકારની શોધ આદરી હતી. હવે એવી પણ ચર્ચા છે કે કાજલ પિસલે ડમી એપિસોડ માટે શૂટ શરૂ પણ કરી દીધું છે. ત્યારે હવે ઘર ઘરમાં દયા તરીકે જામી ગયેલાં દીશા વાકાણીનું સ્થાન કાજલ પિસલ કઈ રીતે લઈ શકશે અને આ પાત્રને કેટલાં અંશે ન્યાય આપી શકશે તે જોવાનું રહ્યું.ss1