ક્રાઇમ બ્રાંચ હવે વણઉકેલાયેલા ચકચારી કેસોનું રિઇન્વેસ્ટિગેશન કરીને ભેદ ઉકેલશે

અમદાવાદ, અમદાવાદ ક્રાઇમ બ્રાંચે વર્ષ ૨૦૧૦માં થયેલા ચકચારી હત્યા કેસનો વર્ષ ૨૦૨૪માં ભેદ ઉકેલ્યો હતો. ૧૪ વર્ષ બાદ મર્ડર મિસ્ટ્રીનો ભેદ ઉકેલ્યા બાદ હવે ફરી ક્રાઇમ બ્રાંચે આ થિયરી પર તપાસ શરૂ કરી છે.

અમદાવાદ ક્રાઇમ બ્રાંચે શહેરમાં છ બાર મહિનામાં બનેલા ચકચારી કેસોનું રિઇન્વેસ્ટિગેશન શરૂ કર્યું છે. આ તમામ વણઉકેલાયેલા કેસોનું રિઇન્વેસ્ટિગેશન કરીને આરોપીઓ સુધી પહોંચવા પ્રયાસ હાથ ધર્યા છે. જેમાં શહેરમાં થયેલી હત્યા કેસની તપાસથી શરૂઆત કરવામાં આવી છે.

જ્યારે ઉચ્ચ અધિકારીઓનું માનીએ તો હત્યા કેસની સાથે સાથે આપઘાત અને અકસ્માતના પણ કેટલાક શંકાસ્પદ કિસ્સાની તપાસ કરાશે. ગુનેગાર ગમે તેટલો શાતિર હોય પરંતુ પોલીસ ધારે તો અનેક વર્ષાે બાદ પણ તેને ઝડપી શકે છે તેવા અનેક ઉદાહરણરૂપી કિસ્સા છે.

આ જ થિયરી પર હવે અમદાવાદ ક્રાઇમ બ્રાંચે એક ઓપરેશન હાથ ધર્યુ છે. ક્રાઇમ બ્રાંચના ઉચ્ચ અધિકારીઓ દ્વારા તાજેતરમાં બનેલા વણઉકેલાયેલા ગુનાની ફરી તપાસ શરૂ કરાઇ છે. ક્રાઇમ બ્રાંચે વણઉકેલાયેલા મર્ડર, શંકાસ્પદ આપઘાત કેસ કે અકસ્માતના કેસોનું રિઇન્વેસ્ટિગેશન શરૂ કર્યુ છે.

શહેરમાં અનેક એવા હત્યા સહિતના કેસ છે જેનો ભેદ ન ઉકેલાયો હોવાના કારણે ફાઇલ દફતરે થઇ ગઇ હતી. અગાઉ કેટલાક કિસ્સામાં પૂર્વઆયોજિત કાવતરું ઘડીને આરોપીઓએ દુશ્મનને મોતને ઘાટ ઉતારીને અકસ્માત મોતમાં ખપાવવાની કોશિષ કરી હોવાનું સામે આવ્યું હતું. જેથી આવા ઉદાહરણરૂપી કિસ્સા આધારે વણઉકેલાયેલા કેસોનું રિઇન્વેસ્ટિગેશન શરૂ કરાયું છે.

ઉચ્ચ અધિકારીઓનું કહેવું છે કે જમાલપુરમાં હનીફ દાઢી કેસ, ગોમતીપુરમાં એક બાળકની હત્યા જેવા પાંચેક હત્યા કેસોની પુનઃ તપાસ શરૂ કરાઇ છે. જ્યારે ખાડિયામાં થયેલી લૂંટ, દસેક જેટલા અકસ્માત મોત સહિતના આશરે ૧૫ કેસો પર ક્રાઇમ બ્રાંચે તપાસ આરંભી છે.

આ કેસોમાં પોલીસ દ્વારા ફરીથી હ્યુમન ઇન્ટેલીજન્સ, ટેકનિકલ સર્વેલન્સની મદદ લેવામાં આવશે. ઉલ્લેખનીય છે કે આ પ્રકારના બે જૂના કેસનો ભેદ ઉકેલવામાં ક્રાઇમ બ્રાંચે તાજેતરમાં જ સફળતા પ્રાપ્ત કરી હતી.અમદાવાદ ક્રાઇમ બ્રાંચે વર્ષ ૨૦૧૦માં મનીષ ગુપ્તા ઉર્ફે સહાય નામના યુવકની હત્યાનો વર્ષ ૨૦૨૪માં ભેદ ઉકેલ્યો હતો.

પોલીસે ૧૪ વર્ષ બાદ આરોપીની ધરપકડ કરી હતી. જેની પૂછપરછ સમલૈંગિક સંબંધોમાં હત્યા થઈ હોવાનું સામે આવ્યું હતું. હત્યા બાદ આરોપી ૧૪ વર્ષથી મુંબઇ અને રાજસ્થાનમાં નાસતો ફરતો હતો. જોકે એક કોન્સ્ટેબલ ક્લીનર તરીકે ટ્રકમાં કામ પર લાગ્યો હતો અને ત્રણ દિવસની મહેનત બાદ પોલીસે આરોપીની ધરપકડ કરી હતી.

ક્રાઇમ બ્રાંચે એમ ડિવિઝનની હદમાં થયેલા ફેટલના બનાવનો પણ ભેદ ઉકેલ્યો હતો. અંગત અદાવતમાં એક વ્યક્તિને મોતને ઘાટ ઉતાર્યા બાદ અકસ્માત મોતમાં ખપાવવાની કોશિષ કરાઇ હોવાનો પર્દાફાશ કર્યાે હતો.SS1MS