ટ્રમ્પ સરકારનું બિગ બ્યુટિફુલ બિલ તદ્દન નિરાશાજનકઃ મસ્ક

તેના અમલથી યુએસની બજેટ ખાધ વધીને ૨.૫ ટ્રિલિયન ડોલર થશે

એલન મસ્કે ડોનાલ્ડ ટ્રમ્પ સરકારમાંથી વિદાય લીધા બાદ હવે ખુલીને ટ્રમ્પના બિગ બ્યુટિફુલ બિલની ટીકા કરી છે

વોશિંગ્ટન,અમેરિકાના અબજોપતિ બિઝનેસમેન એલન મસ્કે ડોનાલ્ડ ટ્રમ્પ સરકારમાંથી વિદાય લીધા બાદ હવે ખુલીને ટ્રમ્પના બિગ બ્યુટિફુલ બિલની ટીકા કરી છે. મસ્કે ટ્રમ્પ સરકારના કરવેરા છૂટ અને ખર્ચ કાપ અંગેના વિધેયક (બિલ)ને ઘૃણાસ્પદ ગણાવ્યું છે. મસ્કે દાવો કર્યાે છે કે આ બિલ ખર્ચાળ રહેશે અને તેનાથી અમેરિકાની ખાધમાં જંગી વધારો થશે. મસ્કે એક્સ પર પોસ્ટ કરી જણાવ્યું કે, હું હવે વધુ સહન કરી શકું તેમ નથી, કોંગ્રેસનું આ બિલ અત્યંત ખર્ચાળ અને નિરાશાજનક છે.આ બિલ માટે જેમણે મત આપ્યા તેમને શરમ આવવી જોઈએ. તમે ખોટું કર્યું છે, તેનો તમને ખ્યાલ છે. આ બિલને લીધે અમેરિકાની બજેટ ખાધ વધીને ૨.૫ ટ્રિલિયન ડોલર થશે. મસ્કે આરોપ લગાવ્યો કે, કોંગ્રેસનો પ્રયાસ અમેરિકાને દેવાળિયું બનાવવાનો છે.

અન્ય એક પોસ્ટમાં ટ્રમ્પે જણાવ્યું કે, આગામી નવેમ્બરમાં આપણે તે તમામ નેતાઓને પદ પરથી હટાવીશું જેમણે દેશના લોકો સાથે દગો કર્યાે છે. ડોનાલ્ડ ટ્રમ્પ અમેરિકાના રાષ્ટ્રપતિ ચૂંટાયા ત્યારબાદ તેના ખાસ ગણાતા મસ્કને દક્ષતા વિભાગના પ્રમુખ બનાવ્યા હતા. મસ્કે ૨૯મી મેના રોજ આ પદ છોડી દીધું હતું. ટ્રમ્પ સરકાર દ્વારા આ બિલ થકી ૨૦૧૭માં તેમના પ્રથમ કાર્યકાળમાં જાહેર કરાયેલી ટેક્સ છૂટને આગળ લંબાવવા ઉપરાંત ચૂંટણી ઢંઢેરામાં અપાયેલા વચનોને પૂર્ણ કરવાનો પ્રયાસ કરાઈ રહ્યો છે. આ બિલથી લશ્કર તેમજ સરહદી સુરક્ષા ખર્ચમાં વધારો થશે.

બીજીતરફ ગરીબોને મળતી આરોગ્ય સેવા, અન્ન સુરક્ષા સહિત અન્ય યોજનાઓ પર કાપ મૂકાશે.સરકારના ડેટા મુજબ આ બિલથી ૧૦ વર્ષમાં અમેરિકાના ઋણમાં ૩.૮ ટ્રિલિયન ડોલરનો વધારો થશે. હાલમાં અમેરિકાનું ઋણ ૩૬.૨ ટ્રિલિયન ડોલર છે. મસ્કે એક ટીવી ઈન્ટરવ્યૂમાં જણાવ્યું કે, પ્રમુખ ટ્રમ્પ પોતાના પ્રભાવથી સેનેટરોને બિલ પાસ કરવા દબાણ કરે છે. વ્હાઈટ હાઉસના પ્રેસ સચિવ કેરોલિન લિવિટે જણાવ્યું કે, રાષ્ટ્રપતિ પહેલેથી જ આ બિલ અંગે મસ્કનો શું મત છે તેનાથી વાકેફ છે અને તે બિલને યોગ્ય ગણે છે. બિલને લઈને કેટલાક સેનેટરોએ મસ્કનું સમર્થન પણ કર્યું છે જ્યારે મોટાભાગના સેનેટરો બિલ પસાર કરવાની તરફેણમાં છે.SS1