દાદા અને પૌત્રએ ભેગા મળી 79 લાખના ગાંજાનું વાવેતર કર્યુઃ તીવ્ર દુર્ગધ આવતાં ઝડપાયા

નાડાતોડ ગામેથી રૂ. ૭૯ લાખ ઉપરાંતની કિંમતના ગાંજાના જથ્થા સાથે બેની ધરપકડ

(પ્રતિનિધિ) દાહોદ, દાહોદ એસઓજી પોલીસે ડ્રોન કેમેરાની મદદથી દેવગઢ બારીયાના નાડા તોડ ગામના એક ખેતર તથા ખેતર માલિકના ઘરમાંથી વાવેતર કરેલ રૂપિયા ૭૯ લાખ ઉપરાંતની કિંમતતા પ્રતિબંધિત એવા ગાંજાના છોડ તથા સૂકા ગાંજાનો વિપુલ જથ્થો ઝડપી પાડી કબજે લઈ ખેતર માલિક તથા તેના પૌત્રની ધરપકડ કરી નાર્કોટિક્સનો ગુનો દાખલ કરી બંનેને જેલના સળિયા પાછળ મોકલી આપ્યાનું પોલીસ સુત્રો દ્વારા સત્તાવાર રીતે જાણવા મળ્યું છે.

દાહોદ જિલ્લાના દેવગઢબારિયા તાલુકાના નાડાતોડ ગામે જતા રસ્તા ઉપર કોઈ માદક પદાર્થની તીવ્ર દુર્ગંધ આવે છે. અને તે વિસ્તારોમાં કોઈ માદક પદાર્થના વાવેતરની શક્યતા છે. તેવી ગુપ્ત બાતમી દાહોદ એસ ઓ જી પોલીસને તેના બાતમીદાર તરફથી મળી હતી. જે બાતમીના આધારે દાહોદ એસ ઓ જી પોલીસની અધિકારીઓ તેમજ કર્મચારીઓની ટીમે જે બાતમી હકીકત હ્યુમન સોર્સથી વેરીફાઈ કરવી મુશ્કેલ હોય

જેથી ડ્રોન કેમેરાની મદદથી ચેક કરાવતા નાડા તોડ ગામના પટેલ ફળિયામાં રહેતા પ્રેમાભાઈ પટેલના ઘર પાસે આવેલા તેમના ખેતરમાં એક બાજુ રતાળુના વેલાની આડમાં પ્રતિબંધિત એવા ગાંજાનું વાવેતર કરેલ હોવાનું જણાઈ આવ્યું હતું. અને ગાંજાનું વાવેતર કરેલ ખેતર શોધી કાઢવામાં પોલીસની ટીમને સફળતા મળી હતી. જે બાતમીની ખરાઈ થતાં પોલીસે બાતમી વાળી જગ્યાએ રેડ કરવા વર્કઆઉટ કરી એસોજીના કર્મચારીઓ

તથા પંચો સાથે નાડાતોડ ગામના પટેલ ફળિયામાં રહેતા પ્રેમભાઈ મોતીભાઈ પટેલના ઘરમાં તેમજ ઘર પાસે આવેલા ખેતરમાં રેડ પાડી રૂપિયા ૭૯,૦૪,૦૦૦/-ની કુલ કિંમતના લીલા ગાંજાના છોડ નંગ-૪૫૫ તથા ૭૯૦ કિલો ૪૦૦ ગ્રામ વજનનો સુકો ગાંજો પકડી પાડી કબજે લઈ ખેતર માલિક પ્રેમભાઈ મોતીભાઈ પટેલની ધરપકડ કરી ગાંજાના વાવેતર બાબતે પૂછપરછ કરતા

તેઓએ જણાવેલ કે ગાંજાના વાવેતર બાદ તૈયાર થયેલ સૂકા ગાંજાને પેકિંગ કરીને વેચવાનું કામ તેનો પૌત્ર શૈલેષ રમેશભાઈ પટેલ કરતો હોવાનું જણાવ્યું હતું. જેથી પોલીસે શૈલેષ રમેશભાઈ પટેલની પણ ધરપકડ કરી તેઓની પાસેથી રૂપિયા ૫૦૦/- ની કિંમતનો મોબાઇલ ફોન તથા રૂપિયા ૭૯,૦૪,૦૦૦/-ની કિંમતના ગાંજાના છોડ તથા સુકો ગાંજો મળી કુલ રૂપિયા ૭૯,૦૪, ૫૦૦/-નો મુદ્દામાલ કબજે લઈ આ મામલે દાહોદ એસ ઓ જી પોલીસે

સાગટાળા પોલીસ સ્ટેશનમાં ફરિયાદ નોંધાવતા સાગટાળા પોલીસે આ સંદર્ભે નાડાતોડ ગામના પટેલ ફળિયામાં રહેતા પ્રેમ ભાઈ મોતીભાઈ પટેલ તથા તેમનો પૌત્ર શૈલેષ રમેશભાઈ પટેલ વિરુદ્ધ નાર્કોટિક્સનો ગુનો નોંધી પેકિંગ કરેલ સૂકો ગાંજો શૈલેષ રમેશભાઈ પટેલ ક્યાં ક્યાં સપ્લાય કરે છે અને આ સપ્લાયની પ્રક્રિયામાં અન્ય કોણ કોણ તેને મદદ કરે છે તે બાબતની ઘનિષ્ઠ પૂછપરછ હાથ ધરી આગળની કાર્યવાહી હાથ ધરી છે.