લૂંટફાટની ઘટનાઓ પછી યુએનએ ગાઝામાં રાહતસામગ્રી અટકાવી

દેર અલ-બલાહ, પેલેસ્ટિનિયન શરણાર્થીઓ માટેની યુએન એજન્સીએ સશસ્ત્ર ગેંગ દ્વારા લૂંટફાટની ઘટના પછી ગાઝાના મેઇન ક્રોસિંગ મારફત રાહત સામગ્રી પહોંચડાવાનું અટકાવી દીધું છે. તાજેતરમાં રાહત સામગ્રી જઈ જતાં ટ્રકોના કાફલા પર હુમલો કરીને લૂંટફાટ કરાઈ હોવાની કેટલીક ઘટનાઓ બની હતી.

શિયાળાની શરૂઆત વચ્ચે યુએનના આ નિર્ણયથી યુદ્ધગ્રસ્ત ગાઝામાં માનવતાવાદી કટોકટી વધુ ઘેરી બનવાની ધારણા છે. હાલમાં હજારો પેલેસ્ટિનિયનો કેમ્પમાં રહે છે અને આંતરરાષ્ટ્રીય ખાદ્ય સહાય પર નિર્ભર છે.

યુએનએ જણાવ્યું હતું કે ઇઝરાયેલની નીતિઓને કારણે ગાઝામાં કાયદો અને વ્યવસ્થાની સ્થિતિ ભાંગી પડી છે અને તેનાથી સહાય સામગ્રીને અસર થઈ રહી છે. ગાઝામાં સહાય સામગ્રી પહોંચાડતી યુએનની મુખ્ય એજન્સી યુએનઆરડબ્લ્યુએના વડા ફિલિપ લાઝારિનીએ જણાવ્યું હતું કે કેરેમ શાલોમ ક્રોસિંગ તરફ જતો માર્ગ ગાઝા બાજુએ ખૂબ જોખમી બન્યો છે.

સશસ્ત્ર ગેંગે નવેમ્બરમાં આ રૂટ પર મુસાફરી કરતી લગભગ ૧૦૦ ટ્રકોને લૂંટી હતી, અને ગેંગોએ શનિવારે પણ લૂંટફાટ કરી હતી. ઇજિપ્તે રફાહ ક્રોસિંગ બંધ કર્યા પછી કેરેમ શાલોમ ક્રોસિંગ રાહત સામગ્રી પહોંચવાનો મુખ્ય રસ્તો બન્યો હતો. ગયા મહિને ગાઝામાં પ્રવેશતી લગભગ ૬૬ ટકા સહાય સામગ્રી કેરેમ શાલોમ દ્વારા આવી હતી.

ગાઝામાં માનવતાવાદી કામગીરીના અટકી જવા માટે ઇઝરાયલની દોષિત ગણાવતા લાઝારિનીએ જણાવ્યું હતું કે સહાયને મર્યાદિત કરવાના રાજકીય નિર્ણયો, સહાય માર્ગાે પર સલામતીનો અભાવ અને હમાસ સંચાલિત પોલીસ દળ પર ઇઝરાયેલના હુમલાને કારણે સહાય સામગ્રીને અસર થઈ છે.

ઇઝરાયેલે ગાઝાના મુવાસી વિસ્તારોમાં કરેલા હુમલામાં બે બાળકો સહિત ઓછામાં ઓછા છ વ્યક્તિના મોત થયા હતાં. મુવાસી વિસ્તારમાં એક વિશાળ ટેન્ટ કેમ્પ છે, જેમાં હજારો વિસ્થાપિત લોકો રહે છે. આ હુમલામાં મૃતક બાળકોની માતા અને તેમની ૮-મહિનાની બહેનને પણ ઈજા થઈ હતી. દરમિયાન ઇજિપ્તની સરહદ પર આવેલા રફાહમાં શહેરમાં ઇઝરાયેલના હુમલામાં બીજા ચાર વ્યક્તિના મોત થયાં હતાં.SS1MS