USA બાઈડન સરકારે ૨૦૨૨-૨૩માં 1.42 લાખ લોકોને ડિપોર્ટ કર્યા
ભારતીયોનો આંકડો પણ વધ્યો
બાઈડને ૨૦ જાન્યુઆરી ૨૦૨૧ના રોજ અમેરિકાની સત્તા સંભાળી હતી, અને તે વર્ષમાં અમેરિકાએ ૫૯ હજાર લોકોને ડિપોર્ટ કર્યા હતા
નવી દિલ્હી,અમેરિકામાં ગમે તેમ કરીને એકવાર ઘૂસી જાઓ, પછી તમારૂં કોઈ કશુંય નહીં બગાડી લેપ’ એજન્ટોની બસ આ જ વાત સાચી માનીને દર વર્ષે હજારો ગુજરાતીઓ લાખો રૂપિયા ખર્ચીને વગર કંઈ લાંબુ વિચારે અમેરિકા જવા નીકળી પડે છે. જોકે, ઈમિગ્રન્ટ્સ તરફી વલણ ધરાવતા અમેરિકાના હાલના પ્રેસિડેન્ટ જો બાઈડન પણ હવે દેશમાં ગેરકાયદે રીતે ઘૂસેલા લોકોને ફટાફટ ડિપોર્ટ કરી રહ્યા છે.
અમેરિકન એજન્સી ઈમિગ્રેશન એન્ડ કસ્ટમ્સ એન્ફોર્સમેન્ટના ૨૦૨૨-૨૩ના રિપોર્ટમાં બાઈડનના કાર્યકાળમાં અત્યારસુધી ડિપોર્ટ થયેલા લોકોના આંકડા બહાર પાડવામાં આવ્યા છે, જેમાં સ્પષ્ટ જણાય છે કે સત્તા ગ્રહણ કર્યાના બે વર્ષ સુધી નરમ વલણ અપનાવ્યા બાદ હવે બાઈડનની સરકાર ઈલીગલ ઈમિગ્રન્ટ્સને ફટાફટ ડિપોર્ટ કરી રહી છે, અને ડિપોર્ટ થયેલા લોકોના આંકડામાં પણ ૨૦૨૧ અને ૨૦૨૨ની સરખામણીએ જંગી ઉછાળો આવ્યો છે. બાઈડને ૨૦ જાન્યુઆરી ૨૦૨૧ના રોજ અમેરિકાની સત્તા સંભાળી હતી, અને તે વર્ષમાં અમેરિકાએ ૫૯ હજાર લોકોને ડિપોર્ટ કર્યા હતા, ત્યારપછીના વર્ષમાં આ આંકડો ૭૨,૧૭૭ થયો હતો.
જોકે, ૨૦૨૨-૨૩માં આ આંકડો વધીને સીધો ૧,૪૨,૫૮૦ પર પહોંચી ગયો છે. જેમ ભારતમાં નાણાકીય વર્ષ એપ્રિલથી માર્ચ સુધી ગણાય છે તેમ અમેરિકામાં નાણાંકીય વર્ષનો ગાળો ઓક્ટોબરથી સપ્ટેમ્બર મહિના સુધીનો હોય છે. બાઈડન સત્તા પર આવ્યા ત્યારે કોરોનાને કારણે બોર્ડર પર અને ઈન્ટરનેશનલ ફ્લાઈટ્સ પર ઘણા નિયંત્રણો હોવાથી ઈમિગ્રન્ટસની સંખ્યા પણ પ્રમાણમાં ઓછી હતી.
જોકે, ૨૦૨૧ના અંત સુધીમાં મોટાભાગના નિયંત્રણો હળવા થઈ ગયા હતા, તેમજ ૨૦૨૩ના મધ્યમાં ટાઈટલ ૪૨ પણ એક્સપાયર થતાં અમેરિકામાં બોર્ડર ક્રોસ કરીને આવતા લોકોની સંખ્યા રેકોર્ડ સ્તરે પહોંચી ગઈ હતી. ૨૦૨૩ના વર્ષમાં અમેરિકામાં ક્યારેય ના ઘૂસ્યા હોય તેટલા અનડોક્યુમેન્ટેડ ઈમિગ્રન્ટ્સ આવ્યા છે, જેની સામે ૨૦૨૨-૨૩માં ડિપોર્ટ થયેલા લોકોનો આંકડો દોઢ લાખથી પણ ઓછો છે. બાઈડનની સરખામણીમાં તેમના પુરોગામી ડોનાલ્ડ ટ્રમ્પ અનડોક્યુમેન્ટેડ ઈમિગ્રન્ટ્સને ડિપોર્ટ કરવામાં ઘણા આગળ હતા. ICE દ્વારા જે છ વર્ષના આંકડા બહાર પાડવામાં આવ્યા છે
તેમાં ડોનાલ્ડ ટ્રમ્પના શાસનના ત્રણ વર્ષોનો પણ સમાવેશ થાય છે, જે અનુસાર ૨૦૧૭-૧૮માં અમેરિકાએ ૨.૫૬ લાખ, ૨૦૨૯-૨૦માં ૨.૬૭ લાખ અને કોરોનાવાળા ૨૦૨૦ના વર્ષમાં પણ ૧.૮૫ લાખ ઈમિગ્રન્ટ્સને ડિપોર્ટ કર્યા હતા. અમેરિકા અલગ-અલગ જે દેશોના લોકોને ડિપોર્ટ કરે છે તેનો આંકડો ૧૮૦નો છે, મતલબ કે દુનિયાનો ભાગ્યે જ એવો કોઈ દેશ છે કે જેના નાગરિકને અમેરિકાએ ડિપોર્ટ ના કર્યા હોય. તેમાંય અમેરિકામાં ઘૂસતા સૌથી વધુ લોકો તેની જ આસપાસના મેક્સિકો, ગ્વાટેમાલા, એલ સાલ્વાડોર, કોલંબિયા, ડોમિનિક રિપબ્લિક અને હોન્ડુરાસ જેવા દેશોના લોકો હોય છે, અને ડિપોર્ટ થનારા લોકોમાં પણ આ જ દેશના લોકો સૌથી વધારે હોય છે. હવે વાત કરીએ જો બાઈડનના કાર્યકાળમાં ડિપોર્ટ થયેલા ભારતીયોની સંખ્યાની..
૨૦૨૨-૨૩માં અમેરિકામાં લગભગ ૯૭ હજારની આસપાસ ભારતીયો ઈલીગલી પ્રવેશ્યા હોવાનો તાજેતરમાં જ એક રિપોર્ટ બહાર આવ્યો હતો. હવે જો અમેરિકાથી ડિપોર્ટ થયેલા ભારતીયોની સંખ્યા જોઈએ તો ૨૦૨૨-૨૩માં ૩૭૦ ઈન્ડિયન્સ અમેરિકાથી ડિપોર્ટ થયા છે, આ આંકડો ૨૦૨૧માં ૨૯૨ અને ૨૦૨૨માં ૨૭૬નો હતો. જોકે, ઈન્ડિયન્સને ડિપોર્ટ કરવામાં બાઈડન કરતાં ડોનાલ્ડ ટ્રમ્પ ઘણા આગળ હતા. ટ્રમ્પના શાસનમાં ૨૦૧૮માં ૬૧૧, ૨૦૧૯માં ૧૬૧૬ અને ૨૦૨૦માં ૨૩૧૨ ભારતીયોને ડિપોર્ટ કરવામાં આવ્યા હતા. આ આંકડા એ પણ દર્શાવે છે કે ડોનાલ્ડ ટ્રમ્પના શાસનમાં ઈલીગલી બોર્ડર ક્રોસ કરનારા ઈન્ડિયન્સનો આંકડો બાઈડનના કાર્યકાળની સરખામણીએ ઓછો હતો, પરંતુ તેમના ડિપોર્ટેશનનો આંકડો ઘણો મોટો હતો. ભારત સિવાય અમેરિકાએ ૨૦૨૩માં જે બીજા એશિયન દેશોના લોકોને ડિપોર્ટ કર્યા છે
તેમાં ચીન, ઈરાન, ઈરાક, નેપાળ, બાંગ્લાદેશ જેવા દેશોનો પણ સમાવેશ થાય છે.. જોકે, ૨૦૨૩માં ડિપોર્ટ થયેલા એશિયન ઈમિગ્રન્ટ્સમાં ઈન્ડિયા ટોચના સ્થાને છે. અમેરિકાના ડિટેન્શન સેન્ટર્સમાં હાલના દિવસોમાં જગ્યા ના રહી હોવાના કારણે બોર્ડર ક્રોસ કરતાં મોટાભાગના લોકોને એકાદ-બે દિવસ કે પછી અમુક કેસમાં તો ચાર-પાંચ કલાક સુધી ડિટેન્શન સેન્ટરમાં રાખીને રિલીઝ કરી દેવાય છે.
જોકે, તેનો મતલબ એવો નથી કે બોર્ડર ક્રોસ કરી અમેરિકામાં ઘૂસી જનારા તમામ લોકોને રિલીઝ કરી દેવાય છે. જે લોકોનો કેસ શંકાસ્પદ લાગે તેને અમેરિકાના અધિકારીઓ લાંબો સમય પણ ડિટેન્શનમાં રાખી શકે છે. આવા લોકોને એક મહિનાથી લઈને એક વર્ષ સુધી ડિટેન્શનમાં રહેવું પડે છે, અને મોટાભાગે તેમને ડિપોર્ટ થવાનો વારો આવતો હોય છે. ૨૦૨૨-૨૩માં ICE દ્વારા અલગ-અલગ દેશોના ૨૬,૧૬૨ લોકોની આવા મામલામાં અટકાયત કરવામાં આવી હતી, જેમાં ટોપ ટેન દેશોમાં ભારતનો નંબર નવમો હતો અને અમેરિકામાં જેલની હવા ખાવાનો વારો આવ્યો હોય તેવા ભારતીયોની સંખઅયા ૧,૦૬૨ હતી તેમ ICEનો ડેટા જણાવે છે.ss1
