ઉત્તરપ્રદેશઃ મહારાણી લક્ષ્મીબાઈ મેડિકલ કોલેજમાં આગ લાગતા ૧૦ નવજાત બાળકોના મોત

ઝાંસી, ઉત્તરપ્રદેશના ઝાંસીમાં શુક્રવારે મોડી રાત્રે મહારાણી લક્ષ્મીબાઈ મેડિકલ કોલેજના નિયોનેટલ ઇન્ટેન્સિવ કેર યુનિટના એસએનસીયુ વોર્ડમાં ભીષણ આગને કારણે ૧૦ નવજાત શિશુઓ સળગી જવાથી અને ગૂંગળામણને કારણે મૃત્યુ પામ્યા હતા.

જ્યાં આગ લાગી તે વોર્ડમાં ૪૭ નવજાત શિશુઓ દાખલ હતા.વોર્ડમાંથી ૩૧ નવજાત બાળકોને બહાર કાઢવામાં આવ્યા હતા. અકસ્માતની માહિતી મળતા જ ફાયર બ્રિગેડની ગાડીઓ ઘટના સ્થળે પહોંચી ગઈ હતી. સેનાને પણ બોલાવવામાં આવી હતી. સેના અને ફાયર બ્રિગેડની ગાડીઓ આગ ઓલવવામાં વ્યસ્ત છે. દસ નવજાત શિશુઓના મોતથી હોસ્પિટલ પરિસરમાં અફરાતફરીનો માહોલ છે.

ઘટનાની નોંધ લેતા સીએમ યોગીએ નાયબ મુખ્યમંત્રી બ્રિજેશ પાઠકને ઝાંસી મોકલી દીધા છે. તેમના છ મુખ્ય આરોગ્ય સચિવ પણ ઝાંસી આવી રહ્યા છે. સીએમ યોગીએ ૧૨ કલાકમાં ઘટનાની તપાસનો રિપોર્ટ સોંપવા કહ્યું છે. કમિશનર અને ડીઆઈજી અકસ્માતની તપાસ કરી રહ્યા છે.

તપાસ માટે કમિટીની રચના કરવામાં આવી છે.પ્રત્યક્ષદર્શીઓના જણાવ્યા અનુસાર, રાત્રે લગભગ પોણા અગિયાર વાગ્યે એસએનસીયુ વોર્ડમાંથી ધુમાડો નીકળતો જોવા મળ્યો હતો. ત્યાં હાજર લોકોએ હોબાળો મચાવ્યો. કોઈ કંઈ સમજે તે પહેલા આગની જ્વાળાઓ વધવા લાગી હતી.

થોડી જ વારમાં આગ આખા વોર્ડમાં પ્રસરી ગઈ હતી અને નાસભાગ મચી ગઈ હતી.ચીફ મેડિકલ સુપરિન્ટેન્ડેન્ટ સચિન માહોરે જણાવ્યું હતું કે એસએનસીયુ વોર્ડમાં ૫૪ બાળકોને દાખલ કરવામાં આવ્યા હતા. ઓક્સિજન કોન્સેન્ટ્રેટરની અંદર અચાનક આગ ફાટી નીકળી હતી.

આગ ઓલવવાના પ્રયાસો કરવામાં આવ્યા હતા પરંતુ રૂમમાં ઓક્સિજન વધુ હોવાથી આગ ઝડપથી ફેલાઈ હતી. ઘણા બાળકો બચી ગયા. ૧૦ બાળકોના મોત થયા છે. ઘાયલ બાળકોની સારવાર ચાલી રહી છે.વોર્ડના દરવાજા પર ધુમાડો અને જ્વાળાઓને કારણે નવજાત બાળકોને સમયસર બહાર કાઢી શકાયા ન હતા.

થોડા સમય પછી, જ્યારે ફાયર જવાનો પહોંચ્યા, ત્યારે નવજાત બાળકોને બહાર કાઢી શકાયા. વોર્ડમાંથી ૧૦ નવજાત બાળકોના મૃતદેહ બહાર કાઢવામાં આવ્યા હતા. ઘટનાસ્થળે પરિવારજનોના ટોળા ઉમટી પડ્યા.SS1MS