મૈતેઈ સંગઠનના નેતા અશેમ કાનન સિંહની ધરપકડથી હિંસા ભડકી, પાંચ જિલ્લામાં કરફ્યુ

સેનાના સંયુક્ત ઓપરેશનમાં ૨૩ ઉગ્રવાદીઓ ઝડપાયા

મણિપુરમાં કરફ્યુ, ઈન્ટરનેટ બાનની અસરથી સામાન્ય જનજીવન ડહોળાયું

ઈમ્ફાલ,મણિપુરમાં રાષ્ટ્રપતિશાસન હોવા છતાં શનિવાર સાંજથી હિંસા ભડકતા કાયદો અને વ્યવસ્થાની સ્થિતિ સામે સવાલો ઊભા થયા હતા. મૈતેઈ ઉગ્રવાદી સંગઠન આરમ્બાઈ ટેંગોલના નેતા અશેમ કાનન સિંહની ધરપકડ બાદ રાજ્યમાં ઠેરઠેર આગચંપી અને હિંસાના બનાવો નોંધાયા હતા. રવિવારે રાજભવન નજીક પણ ટોળાએ હિંસક વિરોધ પ્રદર્શન કરતા પોલીસે ટિયર ગેસનો ઉપયોગ કરવો પડ્યો હતો. સ્થિતિને નિયંત્રણમાં લેવા માટે પાંચ જિલ્લામાં કરફ્યૂ લાગુ કરી દેવામાં આવ્યો હતો. મૈતેઈ સંગઠને પણ દસ દિવસના બંધનું એલાન આપ્યું હોવાથી મણિપુરમાં સામાન્ય જનજીવન ડહોળાયું છે.

રાજ્ય સરકારે મોબાઈલ ઈન્ટરનેટ અને ડેટા સેવા પર પાંચ દિવસનો પ્રતિબંધ મૂક્યો છે. ઈમ્ફાલના ખીણ વિસ્તારના પાંચ જિલ્લાઓ ઈમ્ફાલ પશ્ચિમ, પૂર્વ, થૌબલ, બિષ્નુપુર અને કાકચિંગમાં શનિવારથી પાંચ દિવસનો કરફ્યૂ લાગુ કરાયો હતો. સીબીઆઈએ રવિવારે ઈમ્ફાલ એરપોર્ટ પરથી ૪૬ વર્ષીય કાનન સિંહની ધરપકડ કરી હતી. સંખ્યાબંધ ગુનાહિત પ્રવૃતિઓમાં સામેલ કાનન ઉપરાંત મૈતેઈ સંગઠન સાથે સંકળાયેલા ચાર અન્ય લોકોની પણ સ્થાનિક પોલીસે અટક કરી હતી. કાનન સિંહ મણિપુર પોલીસમાં હેડ કોન્સ્ટેબલ તરીકે ફરજ બજાવતો હતો અને તેની સરહદ પાર હથિયારોની દાણચોરી તથા અન્ય ગુનામાં સંડોવણી ખુલતા તેને ૩ માર્ચ ૨૦૨૫ના રોજ ફરજમાંથી બરતરફ કરાયો હતો.

આરમ્બાઈ ટેંગોલના નેતાની ધરપકડને પગલે તેને બિનશરતી છોડવાની માગ સાથે મોટાપાયે પુરૂષો તથા મહિલાઓ રસ્તા પર ઉતરી આવ્યા હતા. પાંચ જિલ્લામાં દેખાવકારો અને સુરક્ષા જવાનો વચ્ચે ૧૦ જેટલા સ્થળો પર ઘર્ષણ થયું હતું જેમાં સુરક્ષા જવાનો સહિત ૨૦ લોકો ઈજાગ્રસ્ત થયા હતા. ઈમ્ફાલ પૂર્વમાં કલેક્ટર કચેરીને આગ લગાવાતા મહત્વના દસ્તાવેજોને આંશિક નુકસાન થયું હતું. મણિપુરના પૂર્વ મુખ્યમંત્રી એન બિરેન સિંહ તથા ભાજપના રાજ્યસભાના સાંસદ મહારાજા લેઈશેમ્બા સાનાજાઓબા પ્રવર્તમાન સ્થિતિથી કેન્દ્રના નેતાઓને વાકેફ કરવા સોમવારે દિલ્હી જવા રવાના હતા.મણિપુરમાં સેના તથા અન્ય દળોના સંયુક્ત ઓપેરેશનમાં વિવિધ સંગઠન સાથે જોડાયેલા કુલ ૨૩ ઉગ્રવાદીઓને ઝડપી પાડવામાં આવ્યા હતા.

આઠ જિલ્લામાં કરાયેલી કાર્યવાહીમાં આ લોકો પાસેથી ગ્રેનેડ, હથિયારો મળીને ૪૦ પ્રકારના વિસ્ફોટકો ઝબ્બે કરાયા હતા. રક્ષા પ્રવક્તાના મતે કાંગપોપકી, થૌબલ, કાકચિંગ, ટેંગનોપાલ, બિષ્ણુપુર, જિરિબામ, ઈમ્ફાલ પૂર્વ તેમજ પશ્ચિમમાં સંયુક્ત ઓપરેશન હાથ ધરાયું હતું. સેનાએ આ કવાયતમાં વિસ્ફોટક ઝડપી પાડતા શ્વાન સહિતના સંશાધનનો ઉપયોગ કર્યાે હતો. કાર્યવાહી દરમિયાન ઈમ્ફાલ પૂર્વ જિલ્લામાંથી સેનાને પાંચ ઈમ્પ્રોવાઈઝ્ડ એક્સપ્લોઝિવ ડિવાઈસીસ (આઇઈડી) તથા ૩૫ કિલો વિસ્ફોટકો પ્રાપ્ત થયા હતા.SS1