આગામી સપ્તાહે રાજ્યમાં ઠેર-ઠેર વરસાદની આગાહી

અમદાવાદ, ગુજરાતમાં પાછલા વર્ષોની સરખામણીમાં આ વર્ષે વરસાદ ઓછો નોંધાયો છે, પરંતુ સપ્ટેમ્બર મહિનામાં ચોમાસું પૂર્ણ થતાં પહેલા ગુજરાત માટે રાહતની ખબરો આવી રહી છે. પાછલા અઠવાડિયા રાજ્યના સૌરાષ્ટ્ર તથા દક્ષિણ ગુજરાત સહિત ઠેર-ઠેર ઓછા વધતા પ્રમાણમાં વરસાદ નોંધાયો છે.

વરસાદ ખેંચાયા બાદ ફરી મેઘરાજા પ્રગટ થતા ખેડૂતો પણ આનંદની લાગણી અનુભવી રહ્યા છે. હવે આગામી અઠવાડિયા દરમિયાન પણ સ્થાનિક હવામાન વિભાગ દ્વારા રાજ્યમાં વરસાદ થવાની સંભાવના વ્યક્ત કરાઈ છે.

પૂર્વોત્તર અરબી સમુદ્ર તથા સૌરાષ્ટ્ર સાથે સંકળાયેલા સાઈક્લોનિક સર્ક્‌યુલેશનના લીધે રાજ્યમાં હવામાનમાં ફેરફાર થવાની આગાહી વ્યક્ત કરાઈ છે.

રાજ્યના હવામાન વિભાગ દ્વારા અમદાવાદ સહિત વરસાદ થવાની સંભાવના વ્યક્ત કરવામાં આવી છે. જેમાં દક્ષિણ ગુજરાતના વલસાડ, નવસારી, સુરત, વાપી, ડાંગ, ભરુચ, દમણ અને દાદરા નગર હવેલીમાં ભારેથી અતિભારે વરસાદ થવાની સંભાવના છે.

સૌરાષ્ટ્રના ભાવનગર, અમરેલી, ગીર સોમનાથની સાથે આ તરફ દાહોદ, પંચમહાલ, મહિસાગરમાં પણ નવા અઠવાડિયા દરમિયાન વરસાદ થશે. વરસાદની સંભાવના મુજબ આજે અમદાવાદ, પંચમહાલ, દાહોદ, વલસાડ, નવસારી, તાપી, નર્મદા, સુરત અને દમણમાં વરસાદ થવાની સંભાવના છે. આ સાથે ડાંગ, પોરબંદર, દ્વારકા, અમરેલી અને કચ્છમાં પણ હળવાથી ગાજવીજ સાથે વરસાદ થઈ શકે છે.

૫મી તારીખે રાજ્યના દક્ષિણ ભાગમાં આવેલા વલસાડ, નવસારી, તાપી, સુરત સહિત પંચમહાલ, દાહોદ, ડાંગમાં પણ ગાજવીજ સાથે વરસાદ થવાની સંભાવના વ્યક્ત કરવામાં આવી છે. રાજ્યમાં ૬ અને ૭ સપ્ટેમ્બર દરમિયાન આગાહી પ્રમાણે વલસાડ, નવસારી, સુરત,તાપી, ડાંગ, ભરુચ અને દમણમાં ભારે વરસાદ થવાનો છે.

આ તારીખો દરમિયાન સૌરાષ્ટ્રના ભાવનગર, અમરેલી, ગીર સોમનાથ અને કચ્છમાં વરસાદ થશે. જ્યારે ઉત્તર ગુજરાતના દાહોદ, પંચમહાલ, મહિસાગર તથા અમદાવાદમાં પણ વરસાદ થવાનો છે. પાછલા અઠવાડિયા દરમિયાન વલસાડના ઉમરગામ સહિત સૌરાષ્ટ્રના ગીર સોમનાથ, જૂનાગઢ કડાકા-ભડાકા સાથે વરસાદી માહોલ જામ્યો હતો, દુષ્કાળના ભણકારા વચ્ચે ચોમાસાના અંત ભાગમાં થયેલા વરસાદથી રાજ્યમાં આનંદનો માહોલ ઉભો થયો છે.SSS