ફિલ્મ બેલબોટમનું ટીઝર રિલિઝ કરવામાં આવ્યું
મુંબઈ: બેલબોટમ વિશ્વની પહેલી ફિલ્મ છે જેનું શૂટિંગ કોરોના મહામારી વચ્ચે શરૂ થયું અને પૂર્ણ પણ થયું. આટલું જ નહીં ફિલ્મના મેકર્સે થ્રિલર મૂવીનો પહેલો લૂક પણ દર્શકો સામે મૂકી દીધો છે. અક્ષય કુમારે જાસૂસી થ્રિલર ફિલ્મનો પહેલો લૂક સોશિયલ મીડિયા પર મૂકી દીધો છે. ૩૦ સેકંડની આ ક્લિપ પરથી અક્કીના ફેન્સ સમજી જ ગયા હશે કે આ રેટ્રો ડ્રામા ફિલ્મમાં પણ તેણે પોતાનો એક્શન અવતાર જાળવી રાખ્યો છે. આ ફિલ્મમાં અક્ષય કુમાર ૮૦ના દાયકાના રૉ એજન્ટના લૂકમાં જોવા મળશે. અક્ષય કુમારે ફિલ્મનું ટીઝર શેર કરતાં લખ્યું, ગો બેલબોટમ. ૮૦ના દશકાનો થ્રિલિંગ થ્રોબેક. તમારી સામે રજૂ કરું છું બેલબોટમનું ટીઝર. આ પોસ્ટ સાથે જ અક્ષય કુમારે ફિલ્મની કાસ્ટ અને ડાયરેક્ટર-પ્રોડ્યુસરને ટેગ કર્યા છે. રણજિત એમ તિવારીના ડાયરેક્શનમાં બનેલી બેલબોટમ સ્કોટલેન્ડમાં શૂટ થઈ છે.
ફિલ્મમાં વાણી કપૂર અક્ષયની સાથે લીડ રોલમાં છે. અક્ષય અને વાણી ફિલ્મમાં રહસ્ય ઉકેલતા જોવા મળશે. આ થ્રિલર ફિલ્મમાં હુમા કુરેશી અને લારા દત્તા પણ મહત્વના રોલમાં છે. થોડા દિવસ પહેલા જ અક્ષય કુમારના રેટ્રો લૂકના ફોટોગ્રાફ સોશિયલ મીડિયા પર વાયરલ થયા હતા. ટર્ટલનેક પુલઓવર, જેકેટ અને ગોગલ્સમાં અક્ષય કુમારે હેન્ડસમ લાગતો હતો. અગાઉ અક્ષય કુમારે ફિલ્મનું પોસ્ટર શેર કરતાં લખ્યું હતું, એકલા હાથે તમે થોડું જ કરી શકો છો પરંતુ સાથે મળીને ઘણું બધું કરી શકીએ છીએ.
આ ટીમવર્ક છે અને હું કાસ્ટ અને ક્રૂના દરેક સભ્યનો આભારી છું. ઉલ્લેખનીય છે કે, હાલમાં જ બેલબોટમની ટીમ સ્કોટલેન્ડથી શૂટિંગ પૂરું કરીને ભારત આવી છે. અક્ષય કુમાર પત્ની અને બંને બાળકો સાથે સ્કોટલેન્ડ ગયો હતો અને અહીં જ પોતાનો જન્મદિવસ પણ ઉજવ્યો હતો. જણાવી દઈએ કે, બેલબોટમ ફિલ્મ વાસુ ભગનાની, જેકી ભગનાની, દીપશિખા દેશમુખ, મોનિશા અડવાણી, મધુ ભોજવાની અને નિખિલ અડવાણીએ પ્રોડ્યુસ કરી છે. થિયેટરો સંપૂર્ણ કેપેસિટી સાથે ખુલવાની રાહ જોઈને બેઠેલી ટીમ આ ફિલ્મ ૨ એપ્રિલ ૨૦૨૧ના રોજ રિલીઝ કરશે.
