મીરા રાજપૂતે ઈન્સ્ટાગ્રામ પર પોતાની તસવીર પોસ્ટ કરી
મુંબઈ: શાહિદ કપૂરની પત્ની મીરા રાજપૂત સોશિયલ મીડિયા પર ખાસ્સી એક્ટિવ રહે છે. મીરા પોતાના બાળકો, ફ્રેન્ડ્સ, પતિ અને પરિવાર સાથેની તસવીરો અને વિડીયો સોશિયલ મીડિયા પર શેર કરતી રહે છે. મીરા રાજપૂત ફિલ્મ ઈન્ડસ્ટ્રીમાં સક્રિય ના હોવા છતાં તેના ફોલોઅર્સ કોઈ એક્ટ્રેસથી ઓછા નથી. તેના લૂકની અવારનવાર સોશિયલ મીડિયા પર ચર્ચા થતી રહી છે. ૨૬ વર્ષની મીરા બે બાળકોની મમ્મી છે અને થોડા દિવસ પહેલા જ દીકરાનો ઝૈનનો બર્થ ડે સેલિબ્રેટ કર્યો તેની તસવીર શેર કરી હતી. જો કે, હવે મીરા તેની લેટેસ્ટ પોસ્ટના કારણે સોશિયલ મીડિયા યૂઝર્સના નિશાને આવી છે.
મીરા રાજપૂતે હાલમાં જ ઈન્સ્ટાગ્રામ પર પોતાની એક તસવીર પોસ્ટ કરી છે. જેમાં તે બે રંગના શર્ટમાં દેખાય છે. આ તસવીરની સાથે મીરાએ કેપ્શનમાં સ્પ્લીટ પર્સનાલિટી શબ્દનો ઉપયોગ કર્યો જેની સામે સોશિયલ મીડિયા યૂઝર્સને વાંધો પડ્યો છે. મીરાએ હેર કટ બાદની પોતાની તસવીર શેર કરી હતી પરંતુ કેટલાક લોકોને તેનું કેપ્શન પસંદ ના આવ્યું. મીરાએ તસવીર શેર કરતાં લખ્યું, સ્પ્લીટ પર્સનાલિટી. મેં મારા વાળ પણ કાપ્યા છે. આ કેપ્શનમાં મીરાએ રમૂજ કરી છે એવો પણ ઉલ્લેખ કર્યો હતો. ઘણાં લોકો મીરાની આ તસવીર જોઈને ઓવારી ગયા પરંતુ એક સોશિયલ મીડિયા યૂઝરે કેપ્શન માટે તેને આડેહાથ લીધી.
તો તેના સમર્થનમાં અન્ય લોકો પણ જોડાયા. યૂઝરે લખ્યું, સ્પ્લીટ પર્સનાલિટી વાસ્તવિક ડિસઓર્ડર છે અને આ કેપ્શન જરાય રમૂજી નથી. આ યૂઝરના સમર્થનમાં અન્ય એક યૂઝરે લખ્યું, હું આ જ લખવાની હતી. લોકોને સમજવાની જરૂર છે કે બીપીડી, સ્પ્લીટ પર્સનાલિટી, ડીઆઈડી, એમપીડીએ ખરેખરી સમસ્યા છે અને કોઈ મજાક નથી. આ વાત ઉઠાવવા માટે આભાર. ઉલ્લેખનીય છે કે, સ્પ્લીટ પર્સનાલિટી એક મેન્ટલ ડિસઓર્ડર છે, જેમાં એક જ વ્યક્તિની બે એકદમ અલગ પર્સનાલિટી હોય છે. તેના વિચારો, વર્તન અને ક્રિયાઓ દરેક પર્સનાલિટીથી સંપૂર્ણપણે જુદી પડે છે. આપણા સમાજમાં માનસિક સ્વાસ્થ્યને ગંભીરતાથી લેવામાં નથી આવતું ત્યારે મીરા રાજપૂતની આ કેપ્શનથી સોશિયલ મીડિયા યૂઝર્સને માઠું લાગ્યું છે.
