મુંબઈમાં હોટલ બિઝનેસમાં ભાગીદારીનું વચન આપી મહિલા સાથે 53 લાખની છેતરપિંડી

પોલીસે યુવક અને તેના અન્ય પાંચ સાથીદારો સામે અંધશ્રદ્ધા વિરોધી કાયદા હેઠળ ગુનો નોંધી તપાસ શરૂ કરી-યુવકે જ્યોતિષી હોવાનો ડોળ કરીને મહિલા સાથે કરી ૫૩ લાખની છેતરપિંડી

(એજન્સી)મુંબઈ, મુંબઈમાં છેતરપિંડીનો એક ચોંકાવનારો કિસ્સો પ્રકાશમાં આવ્યો છે. અહીં જ્યોતિષી તરીકે ઓળખાવતા એક વ્યક્તિએ તેના સહયોગીઓ સાથે મળીને એક મહિલા સાથે છેતરપિંડી કરી હતી. જ્યારે મહિલાને ખબર પડી કે તેની સાથે છેતરપિંડી થઈ છે, તેણે પોલીસને આ અંગે જાણ કરી. મહિલાની ફરિયાદના આધારે પોલીસે જ્યોતિષી હોવાનો દાવો કરનાર વ્યક્તિ અને અન્ય પાંચ સામે કેસ નોંધીને તપાસ શરૂ કરી છે.

એજન્સીના જણાવ્યા અનુસાર, ૨૮ વર્ષીય જ્યોતિષી વિજય બાલુ જોશી અને તેના સહયોગીઓ જાન્યુઆરી ૨૦૨૦ થી ઉપનગરીય બોરીવલીમાં રહેતી ૫૭ વર્ષીય મહિલા અને તેના પરિવાર સાથે છેતરપિંડી કરી રહ્યા હતા. આરોપીએ મહિલાને મુંબઈમાં હોટલ બિઝનેસમાં ભાગીદારીનું વચન આપ્યું હતું. આ સાથે તેણે રૂ. ૫૨.૮૦ લાખ અને ૨૬૮ ગ્રામ સોનાના દાગીનાની છેતરપિંડી કરી હતી.

પોલીસનું કહેવું છે કે આરોપી જ્યોતિષીએ મહિલાને ખોટા વચનો આપ્યા અને હોટલ બિઝનેસમાં રોકાણ માટે પૈસાની માંગણી કરી. આરોપીએ લોન ચૂકવવા માટે મહિલા પાસેથી પૈસા પણ લીધા હતા. ધીરે ધીરે આરોપીએ મહિલા પાસેથી ૫૨.૮૦ લાખ રૂપિયા અને ૨૬૮ ગ્રામ વજનના સોનાના દાગીના પડાવી લીધા. આ પછી તે પોતાના વચન પર પાછો ફર્યો.જ્યારે મહિલાએ પૈસા પરત કરવાનું કહ્યું ત્યારે તેણે જવાબ આપ્યો ન હતો.

આ પછી પીડિતાએ બોરીવલી પોલીસ સ્ટેશનમાં આ અંગે ફરિયાદ નોંધાવી હતી. ફરિયાદના આધારે, પોલીસે જ્યોતિષી અને અન્ય પાંચ લોકો સામે છેતરપિંડી અને અંધશ્રદ્ધા વિરોધી અને કાળા જાદુ અધિનિયમ હેઠળ કેસ નોંધ્યો છે. પોલીસનું કહેવું છે કે આ સમગ્ર મામલાની તપાસ કરવામાં આવી રહી છે.