કૈલાસ-માનસરોવર યાત્રા ફરીથી શરૂ કરવા ભારત-ચીન નક્કર પગલાં ભરશે

બેઇજિંગ, ભારત-ચીને લદ્દાખ સરહદ વિવાદ ઉકેલ્યા પછી સંબંધો સુધારવાની દિશામાં વધુ એક પગલું ભરવા તત્પરતા દર્શાવી છે. આ દિશામાં એક મોટું પગલું ભરીને બંને દેશોએ કૈલાશ-માનસરોવર યાત્રાને ફરીથી શરૂ કરવા માટે નક્કર પગલાં ભરવાનો નિર્ણય લીધો છે.

કૈલાશ-માનસરોવર યાત્રા ૨૦૨૦થી કોવિડ-૧૯ મહામારી અને જરુરી વ્યવસ્થાઓને લઈને ચીન તરફથી ઉચિત સહયોગ નહીં મળવાને લઈને સ્થગિત કરવામાં આવી હતી. જોકે, કેન્દ્ર સરકાર સતત ચીનના અધિકારીઓ સાથે કૈલાશ-માનસરોવર યાત્રા ફરીથી શરુ કરવા માટે કૂટનીતિક વાતચીત કરી રહી હતી.

આ દરમિયાન, ૨૩મી ભારત-ચીન વિશેષ પ્રતિનિધિ બેઠકમાં રાષ્ટ્રીય સુરક્ષા સલાહકાર(એનએસએ) અજિત ડોભાલ અને ચીનના વિદેશ મંત્રી વાંગ યીએ સરહદ વિવાદ ઉકેલવા અને સરહદ પર શાંતિ જાળવી રાખવા પર સહમતી વ્યક્ત કરી છે. આ બેઠક પાંચ વર્ષ પછી યોજાઈ છે. બંને દેશોએ છ પોઈન્ટ પર સહમતી વ્યક્ત કરી, જેમાં સરહદ વિવાદના ઉકેલને પ્રાથમિકતા આપવી મુખ્ય બાબત હતી.

ડોભાલ અને વાંગ યીએ સરહદ વ્યવસ્થાપનની સાથે-સાથે નાથૂલા સરહદ વ્યાપાર અને સરહદ પાર નદી સહયોગ વધારવા પર પણ સહમતી વ્યક્ત કરી છે. તેમણે કૈલાશ-માનસરોવર યાત્રા ફરીથી શરુ કરવા જરુરી પ્રક્રિયાઓ ઝડપી કરવાનો નિર્ણય લીધો છે. ચીનના વિદેશ મંત્રાલયે પણ અજિત ડોભાલ સાથેની બેઠકને રચનાત્મક ગણાવી છે.SS1MS