Western Times News

Latest News from Gujarat India

નોટબંધી- જીએસટીએ લોકો અને નાના વેપારીઓની કમર તોડી નાખી છેઃ રાહુલ ગાંધી

ઉજ્જૈન, કોંગ્રેસના નેતા રાહુલ ગાંધીએ કહ્યું હતું કે, કેન્દ્ર દ્વારા લાગુ કરાયેલ નોટબંધી અને ગુડ્‌સ એન્ડ સર્વિસ ટેક્સ (જીએસટી)એ સામાન્ય લોકોની, ખાસ કરીને નાના વેપારીઓની કમર તોડી નાખી છે. ભગવાન મહાકાલના દર્શન કર્યા બાદ ગાંધી ઉજ્જૈનમાં જનસભાને સંબોધિત કરી રહ્યા હતા. તેમના નેતૃત્વમાં મધ્યપ્રદેશમાં કોંગ્રેસની ‘ભારત જાેડો’ યાત્રા આગળ વધી રહી છે.

કોંગ્રેસના સાંસદે કહ્યું કે કોવિડ-૧૯ વિરોધી લોકડાઉન દરમિયાન લાંબા અંતર સુધી જતા મજૂરો, ખેડૂતો અને નાના વેપારીઓ વાસ્તવિક તપસ્વી છે તેઓ (ભાજપ) નથી.

રાહુલ ગાંધીએ કહ્યું, મેં ભારત જાેડો યાત્રામાં કૂચ કરીને કોઈ તપ કર્યું નથી. કોવિડ-૧૯ લોકડાઉન દરમિયાન લાંબા અંતરની મુસાફરી કરનારા મજૂરો, લોકો માટે અનાજનું ઉત્પાદન કરતા ખેડૂતો અને નાના વેપારીઓ દેશના વાસ્તવિક તપસ્વી છે. તેમણે કહ્યું કે કમનસીબે તે લોકોને લાભ નથી મળી રહ્યો અને માત્ર ચાર-પાંચ ઉદ્યોગપતિઓને જ લાભ મળી રહ્યો છે.

રાહુલે કહ્યું, નાના દુકાનદારો અને વેપારીઓ દેશમાં મોટી સંખ્યામાં લોકોને રોજગારી આપે છે, પરંતુ તેમની મહેનતને માન્યતા આપવામાં આવતી નથી. તેમના ખિસ્સામાંથી પૈસા છીનવીને ચાર-પાંચ ઉદ્યોગપતિઓના હાથમાં આપવામાં આવે છે.

મધ્યપ્રદેશમાં વ્યાપમ કૌભાંડનો ઉલ્લેખ કરતા ગાંધીએ કહ્યું કે આવા છેતરપિંડીઓએ સખત મહેનત કરવા છતાં યુવાનોને રોજગારથી વંચિત રાખ્યા છે. મીડિયા લોકોને વાસ્તવિકતા બતાવવા માંગતો હતો પરંતુ તેના હાથ બંધાયેલા હોવાથી તે તેમ કરી શક્યું ન હતું.

રાહુલ ગાંધી તેમની મહત્વાકાંક્ષી પદયાત્રાના ભાગરૂપે ૨,૦૦૦ કિલોમીટરથી વધુનું અંતર કાપીને રવિવારે મધ્યપ્રદેશના ઈન્દોરમાં પહોંચ્યા હતા.

ભારત જાેડો યાત્રા એ એક જનસંપર્ક પહેલ છે જે રાહુલ ગાંધી દ્વારા ૭ સપ્ટેમ્બરના રોજ તમિલનાડુના કન્યાકુમારીથી શરૂ કરવામાં આવી હતી.કોંગ્રેસ સાંસદે કહ્યું કે, તેઓ ભારત જાેડો યાત્રા દરમિયાન પોતાનામાં કેટલાક ફેરફારો જાેઈ રહ્યા છે, જેમાં વધુ ધીરજ અને અન્યને સાંભળવાની ક્ષમતા સામેલ છે. યાત્રા દરમિયાન તેમની સૌથી સંતોષકારક ક્ષણ વિશે પૂછવામાં આવતા ગાંધીએ કહ્યું કે, ઘણી બધી ક્ષણ છે, પરંતુ તેમાંથી યાદ કરુ તો યાત્રાને કારણે મારી ધીરજ ખૂબ વધી ગઈ છે.

તેમણે કહ્યું, બીજી વાત એ છે કે હવે હું ૮ કલાકમાં પણ ચિડાતો નથી, ભલે કોઈ મને ધક્કો મારે કે ખેંચે. મને કોઈ વાંધો નથી, પહેલા હું માત્ર બે કલાકમાં પણ ચિડાઈ જતો હતો. રાહુલ ગાંધીએ કહ્યું, જાે તમે યાત્રામાં ચાલી રહ્યા હોય અને પીડા અનુભવો, તો તમારે તેનો સામનો કરવો પડશે, તમે હાર માની શકતા નથી.HS1MS

Copyright © All rights reserved. | Developed by Aneri Developers