નરેન્દ્ર મોદીએ ભૂટાન શ્રીલંકા સહિત આ દેશોને મોકલ્યા આમંત્રણ
નવી દિલ્હી, નરેન્દ્ર મોદી પહેલીવાર ગઠબંધન સરકાર ચલાવશે. બુધવારે દિલ્હીમાં એનડીએમાં સામેલ પક્ષોના વડાઓની બેઠક યોજાઈ હતી. બેઠકમાં વડાપ્રધાને કહ્યું કે, આ સતત ત્રીજી સરકાર માટે ઐતિહાસિક જનાદેશ છે જે ભારતમાં ૬૦ વર્ષ બાદ મળ્યો છે.
આ દરમિયાન ચંદ્રાબાબુ નાયડુ અને નીતીશ કુમારે એ વાત પર ભાર મૂક્યો હતો કે કોઈ પણ સમય બગાડ્યા વિના શક્ય તેટલી વહેલી તકે સરકારની રચના થવી જોઈએ. બેઠકમાં નિર્ણય લેવામાં આવ્યો છે કે એનડીએની આગામી બેઠક ૭ જૂને મળશે અને નરેન્દ્ર મોદીને એનડીએ સંસદીય દળના નેતા તરીકે પસંદ કરવામાં આવશે. આ પછી તેઓ રાષ્ટ્રપતિ પાસે જશે અને સરકાર બનાવવાનો દાવો રજૂ કરશે.
આવી સ્થિતિમાં એવું માનવામાં આવે છે કે નરેન્દ્ર મોદી ૮ જૂને વડાપ્રધાન તરીકે ત્રીજીવાર શપથ લઈ શકે છે. આ દરમિયાન નરેન્દ્ર મોદીએ ભૂટાનના રાજા, શ્રીલંકાના રાષ્ટ્રપતિ, નેપાળ, બાંગ્લાદેશ અને મોરેશિયસના વડાપ્રધાનને તેમના શપથગ્રહણ માટે આમંત્રણ આપ્યું છે.
હકીકતમાં, લોકસભા ચૂંટણીના પરિણામો બાદ વડાપ્રધાન નરેન્દ્ર મોદીને દુનિયાભરમાંથી સતત શુભકામનાઓ મળી રહી છે. રશિયાના રાષ્ટ્રપતિ વ્લાદિમીર પુતિને બુધવારે (૫ જૂન) નરેન્દ્ર મોદીને અભિનંદન આપતા એક પ્રેસ રિલીઝ જારી કરી હતી.
તેમણે કહ્યું, “મને વિશ્વાસ છે કે ભારત અને રશિયા વચ્ચેના મૈત્રીપૂર્ણ સંબંધો આગળ વધશે. અમે દ્વિપક્ષીય અને આંતરરાષ્ટ્રીય મુદ્દાઓ પર વાતચીત અને સહયોગ દ્વારા ભારત સાથે કામ કરવાનું ચાલુ રાખીશું.” રશિયાના રાષ્ટ્રપતિ વ્લાદિમીર પુતિને પીએમ મોદીને એક્સ પર જવાબ આપ્યો અને તેમનો આભાર માન્યો.
તેમણે વધુમાં કહ્યું કે અમે ભારત અને રશિયા વચ્ચેના વિશેષ વ્યૂહાત્મક સંબંધોને મજબૂત કરવા માટે પ્રતિબદ્ધ છીએ. અમેરિકી રાષ્ટ્રપતિ બિડેન, રશિયન રાષ્ટ્રપતિ પુતિન અને ળાન્સના રાષ્ટ્રપતિ મેક્રોન તરફથી વડાપ્રધાનને અભિનંદન સંદેશ મોકલવામાં આવ્યા છે.
બાંગ્લાદેશના વડા પ્રધાન હસીનાએ પણ બુધવારે સાંજે મોદીને ફોન કરીને તેમની ચૂંટણી જીત બદલ અભિનંદન પાઠવ્યા હતા. મોદીએ વડાપ્રધાન હસીનાને તેમના શપથ ગ્રહણ સમારોહમાં હાજરી આપવા આમંત્રણ આપ્યું હતું. દેશ-વિદેશમાંથી નરેન્દ્ર મોદી અને ભાજપને શુભકામનાઓ આપતા લોકોનો ધસારો જોવા મળી રહ્યો છે, કારણ કે એનડીએ ત્રીજી વખત કેન્દ્રમાં સરકાર બનાવવા જઈ રહી છે.
નરેન્દ્ર મોદીએ અમેરિકી રાષ્ટ્રપતિ જો બિડેન, બ્રિટિશ પીએમ ઋષિ સુનક સહિત અનેક નેતાઓનો આભાર માન્યો છે. માલદીવના રાષ્ટ્રપતિ મોહમ્મદ મુઈઝો, ઈટાલીના પીએમ જ્યોર્જિયા મેલોની, શ્રીલંકાના રાષ્ટ્રપતિ રાનિલ વિક્રમસિંઘે એ વિદેશી નેતાઓમાં સામેલ હતા જેમણે મોદીને તેમના ત્રીજા કાર્યકાળ માટે અભિનંદન આપ્યા હતા.SS1MS
