૬૭ હજાર રિચાર્જ બોર સાથે સુરતનો જળસંચયમાં ટોપ ૧૦ શહેરોમાં સમાવેશ
જળ સંરક્ષણમાં સુરત પણ જોશભેર આગળ વધ્યુ
દેશમાં જળ સંરક્ષણ માટે વડાપ્રધાને ચિંધેલા અભિયાનમાં સુરત જોશભેર આગળ વધ્યુ છે
નવી દિલ્હી,દેશમાં જળ સંરક્ષણ માટે વડાપ્રધાને કેન્દ્રિય જળ શક્તિ મંત્રીના નેતૃત્વમાં ચિંધેલા અભિયાનમાં સુરત જોશભેર આગળ વધ્યુ છે. વરસાદી પાણીના સંચય માટે કરાઈ રહેલા રિચાર્જ બોરમાં દેશના ટોચના દસ શહેરોમાં સુરતે સ્થાન મેળવ્યુ છે. સુરતે ૬૭હજારથી વધુ રિચાર્જ બોર બનાવી દીધા છે. જળ સંચય જન ભાગીદારી અભિયાન (JSJB) જળશક્તિ વિભાગ કેચ ધ રેઇન થીમ હેઠળ ચલાવી રહ્યું છે. ભૂગર્ભજળનું સ્તર વધારી, વરસાદી પાણીનો સંગ્રહ કરવાની સાથે પાણીના સંસાધનોનું ટકાઉ સંચાલન કરવાના ઉદ્દેશ્ય સાથે કેન્દ્રિય જળ શક્તિ મંત્રી ના નેતૃત્વમાં દેશભરમાં આ અભિયાન ખૂબ ઉપયોગી સાબિત થઈ રહ્યું છે.
આ અભિયાનમાં સ્થાનિક સમુદાયો, કોર્પાેરેટ્સ, સરકારી સંસ્થાઓ અને નાગરિકોની સહભાગીદારી દ્વારા વિવિધ પ્રકારની જળ સંરક્ષણ માટે બોરવેલ રિચાર્જ સ્ટ્રક્ચર, રિચાર્જ પીટ, વેલ રિચાર્જ સ્ટ્રક્ચર, રૂફ ટોપ રિચાર્જ સ્ટ્રક્ચર, ચેક ડેમ, પોન્ડ રિજુવેનેશન, ગેબિયન વોલ અને પરકોલેશન પીટ્સ જેવા કામ થઈ રહ્યાં છે. આ કામગીરીમાં સુરત શહેર દેશમાં ૧૦ માં ક્રમે પહોંચ્યુ છે. કેન્દ્રીય જળસંપત્તિ મંત્રીએ કહ્યું કે, આ અભિયાનના લાભો વર્તમાનમાં સારા દેખાવા માંડ્યા છે. ભવિષ્યમાં વધુ સારી અસરો અનુભવાશે. કામરેજ તાલુકાના સેવણી ગામમાં નવું બોરવેલ રિચાર્જ સ્ટ્રક્ચર અને ઉમરપાડા તાલુકાના બલાલકુવા ગામમાં હયાત વેલ રિચાર્જ સ્ટ્રક્ચર જેવા કામથી સ્થાનિક લોકોની પાણીની સમસ્યાઓને ઘણે અંશે ઘટાડી છે.
હયાત બોર રિચાર્જ સ્ટ્રક્ચરનો ખર્ચ રૂ. ૬૫,૦૦૦ પ્રતિ યુનિટ, રિચાર્જ પીટ સિસ્ટમનો ખર્ચ રૂ. ૫,૩૦૦ થી રૂ. ૮,૨૦૦ પ્રતિ યુનિટ, નવું બોર રિચાર્જ સ્ટ્રક્ચર રૂ. ૫૦,૦૦૦ પ્રતિ યુનિટ, અને રૂફ ટોપ રિચાર્જ સ્ટ્રક્ચર રૂ. ૨૫,૦૦૦ પ્રતિ યુનિટ નક્કી થયો છે.બીજી તરફ આ અભિયાનમાં સેવાભાવી સંસ્થાઓ કોર્પાેરેટ કંપનીઓને સીએસઆર હેઠળ, સ્થાનિક ઔદ્યોગિક સંગઠનો, MsMe યુનિટ્સ, PSU કંપનીઓ અને કો-ઓપરેટિવ સંસ્થાઓને પણ જોડી છે. તેમણે પણ સુરત જિલ્લામાં ૨૭,૫૯૨ કામોનું આયોજન કર્યુ છે. તેમાંથી ૪,૪૩૭ કામો પૂર્ણ થયા છે અને ૨૩,૧૫૫ કામો ચાલુ છે. ઉપરાંત, મનરેગા હેઠળ ૨૦,૦૦૦ કામ, ૧૫મા નાણાપંચ હેઠળ ૫૦૦ કામ), CAMPA ફંડ હેઠળ ૭,૮૫૦ કામો અને ફોરેસ્ટ મેનેજમેન્ટ એન્ડ ડેવલપમેન્ટ હેઠળ ૨૩,૬૯૨ કામો હાથ ધરાઈ રહ્યાં છે.
