મોરબીના રફાળેશ્વર ગામે દારૂ પી વારંવાર ધમાલ કરતી મહિલાની હત્યા

મોરબી, રફાળેશ્વર ગામે એક મહિલા દારૂ પીને અવારનવાર માથાકૂટ કરતી હોવાથી તેની બે સગી ભાણેજે અન્ય સાથે મળીને મહિલાને ખાટલામાં દોરડા વડે ધોકાથી માર મારતા બાંધી માથામાં જીવલેણ ઈજાઓ કરી હત્યા નીપજાવી હતી. મોરબી તાલુકા પોલીસે બે મહિલાઓ સહિત ચાર આરોપીઓ વિરુદ્ધ ગુનો નોંધી વધુ તપાસ ચલાવી છે.

મોરબીના રફાળેશ્વર ગામે રહેતા કાંતાબેન ગાંડુભાઈ સોલંકી નામના વૃદ્ધાએ આરોપીઓ હીના લક્ષ્મણ રાઠોડ, મનોજ ઉર્ફે મયુર રમેશ રાઠોડ, હુશેન ફિરોજ જુણેજા અને નર્મદાબેન લક્ષ્મણભાઈ રાઠોડ એમ ચાર વિરુદ્ધ ફરિયાદ નોંધાવી છે કે ફરિયાદીની દીકરી લક્ષ્મીને દારૂ પીવાની ટેવ હતી અને દારૂ પીને અવારનવાર માથાકૂટ કરતી હતી તેથી કંટાળી જઈને હીના રાઠોડે લાકડી વડે માથામાં મારી તેમજ શરીરે ઈજા કરી હતી અને ફરિયાદીની દીકરી લક્ષ્મી તોફાન કરતી હોવાથી તેને બાંધવા માટે દોરડું આપતા હીના અને હુશેને લક્ષ્મીને ખાટલામાં સુવડાવી દોરડાથી બાંધી લાકડાના ધોકા માથામાં મારી હત્યા નીપજાવી હતી.

બનાવમાં ઉપયોગમાં લીધેલ દોરડું નર્મદાએ સળગાવી નાખી પુરાવાનો નાશ કર્યાની ફરિયાદ નોંધાવી છે. મોરબી તાલુકા પોલીસે ચાર આરોપીઓ વિરુધ્ધ હત્યાની ફરિયાદ નોંધી આરોપીઓને ઝડપી લીધા છે.

મૃતક લક્ષ્મીબેન તેની માતા સાથે રહેતી હોવાની માહિતી પ્રાપ્ત થઇ છે. તેમજ લક્ષ્મીબેન દારૂ પીવાની કુટેવ ધરાવતા હતા. દારૂ પીને અવારનવાર તેઓ માથાકૂટ કરતા હતા. જેથી તેની સગી ભાણેજ આરોપીઓ હીના અને નર્મદા કંટાળી ગઈ હતી.

બનાવના દિવસે પણ લક્ષ્મીબેન નશામાં ધુત બનીને બેફામ બોલાચાલી કરતા હોવાથી ખાટલે દોરડા વડે બાંધી દીધા બાદ માથામાં ધોકા મારી હત્યા કરવામાં આવી હોવાનું ખુલ્યું છે. મોરબી તાલુકા પોલીસે બનાવ મામલે ધોરણસરની કાર્યવાહી હાથ ધરી છે.SS1MS