આમોદ પાલિકાની ચૂંટણી માટે 4 ઉમેદવારી પત્ર પરત ખેંચાતા 24 બેઠક માટે 54 ઉમેદવારો મેદાનમાં

આમોદ નગરપાલિકા ચતુષ્કોણીય જંગ તેમજ તાલુકા પંચાયત અને જિલ્લા પંચાયતમાં ત્રિપાંખિયો જંગ

(પ્રતિનિધિ) ભરૂચ, આમોદ પાલિકામાં કુલ ૬ વોર્ડ માટે ૨૬ મી એપ્રિલના રોજ ૫૪ ઉમેદવારો વચ્ચે ચૂંટણી જંગ જામશે જેમાં ભાજપ કોંગ્રેસ અપક્ષ સહિત આમ આદમી પાર્ટીના ઉમેદવારો વચ્ચે ચતુષ્કોણીય જંગ ખેલાશે.

આમોદ નગરપાલિકાના વોર્ડ નંબર ૧ માં ભાજપના ચાર ઉમેદવારો, કોંગ્રેસના ચાર ઉમેદવારો તેમજ આમ આદમી પાર્ટીના બે ઉમેદવારો મળી કુલ ૧૦ ઉમેદવારો ચુંટણી લડશે.વોર્ડ નંબર ૨ માં ભાજપ અને કોંગ્રેસ વચ્ચે સીધી ટક્કર યોજાશે.આમોદ નગરપાલિકાના વોર્ડ નંબર ત્રણમાં કુલ ૧૩ ઉમેદવારો હતા

જ્યારે આજે ફોર્મ પરત ખેંચવાના દિવસે ચાર ઉમેદવારો અમિત દિલીપ પટેલ, દીક્ષિત કનુ પરમાર, જયાબેન નટવર પટેલ તેમજ મુકેશ મનુભાઈ વસાવાએ ફોર્મ પરત ખેંચતા કોંગ્રેસ પ્રેરીત અપક્ષના ચાર ઉમેદવારો તેમજ એક અપક્ષ અને ભાજપના ચાર ઉમેદવારો સાથે ૯ ઉમેદવારો ચૂંટણી લડશે.આમોદ પાલિકાના વોર્ડ નંબર ૪ માં કુલ ૯ ઉમેદવારો હતા જેમાં રોહિત કનુભાઈ માછીએ ફોર્મ પરત ખેંચતા કોંગ્રેસ પ્રેરીત અપક્ષના ચાર અને ભાજપના ચાર ઉમેદવારો વચ્ચે સીધો જંગ ખેલાશે.

વોર્ડ નંબર પાંચમાં ભાજપના ચાર, કોંગ્રેસના ચાર અને આમ આદમી પાર્ટીના એક ઉમેદવાર મળી કુલ નવ ઉમેદવારો વચ્ચે ચૂંટણી યોજાશે.વોર્ડ નંબર છ માં ભાજપના ચાર ,કોંગ્રેસના ચાર અને આમ આદમી પાર્ટીના બે ઉમેદવારો મળી કુલ ૧૦ ઉમેદવારો વચ્ચે ચૂંટણી જંગ ખેલાશે. આમોદ પાલિકાના વોર્ડ નંબર ત્રણ અને છ માં ચતુષ્કોણીય જંગ ખેલાશે.

આમોદ નગરપાલિકાની જાહેર થયેલી કુલ છ વોર્ડની ૨૪ બેઠક માટે ૫૪ ઉમેદવારો વચ્ચે ૨૬ મી એપ્રિલે ચૂંટણી જંગ ખેલાશે.જેમાં ભાજપ, કોંગ્રેસ,આમ આદમી પાર્ટી તેમજ અપક્ષ મળી કુલ ૫૪ ઉમેદવારોએ ચૂંટણીના મેદાનમાં ઝંપલાવ્યું છે.આમોદ નગરપાલિકામાં વોર્ડ નંબર-૧ માં ભાજપ કોંગ્રેસ અને આમ આદમી પાર્ટી વચ્ચે ત્રિપાંખિયો જંગ ખેલાશે.જોકે આમ આદમી પાર્ટી માત્ર બે બેઠકો ઉપર જ ઉમેદવાર મૂક્યા હતા.

વોર્ડ નંબર -૨ ભાજપ અને કોંગ્રેસ વચ્ચે સીધી ટક્કર યોજાશે.વોર્ડ નંબર- ૩ માં ભાજપ અને કોંગ્રેસ પ્રેરીત અપક્ષ ઉમેદવારો વચ્ચે સીધી ટક્કર યોજાશે જેમાં એક અપક્ષ મહિલા ઉમેદવારે પણ ઝંપલાવ્યું છે.વોર્ડ નંબર ૪ માં ભાજપ અને કોંગ્રેસ પ્રેરીત અપક્ષ વચ્ચે સીધી ટક્કર યોજાશે

અને વોર્ડ નંબર -૫ મા ભાજપ કોંગ્રેસ અને આમ આદમી પાર્ટી વચ્ચે ત્રિપાખીયો જંગ ખેલાશે.જેમાં આમ આદમી પાર્ટી માત્ર એક બેઠક ઉપર ઉમેદવારી નોંધાવી હતી.જ્યારે વોર્ડ નંબર -૬ માં ભાજપ કોંગ્રેસ આમ આદમી પાર્ટી વચ્ચે ત્રિપાંખિયો જંગ ખેલાશે.જેમાં આમ આદમી પાર્ટીએ માત્ર બે બેઠકો ઉપર ઉમેદવારી નોંધાવી હતી.

અત્રે ઉલ્લેખનીય છે કે આમોદ નગરપાલિકા ચૂંટણી માટે આમ આદમી પાર્ટીના ઉમેદવારો ઉપર ફોર્મ પરત ખેંચવા માટે રાજકીય પક્ષોએ ભારે દબાણ કર્યું હતું.પરંતુ આમ આદમી પાર્ટીના ઉમેદવારો મક્કમ રહેતા ચૂંટણી જંગને રસપ્રદ બનાવ્યો છે.

આમોદ તાલુકા પંચાયતની ૧૬ બેઠકો ઉપર આજે ઉમેદવારી પત્ર પરત ખેંચવાના અંતિમ દિવસે આમ આદમી પાર્ટીના ઉમેદવાર તેમજ અપક્ષના ઉમેદવારે ફોર્મ પરત ખેંચતા ૩૭ ઉમેદવારો મેદાનમાં રહ્યા છે.આમોદ તાલુકા પંચાયતની આછોદ-૧, અનોર ,ભીમપુરા, ચકલાદ,દાંદા, ઈખર-૧, કેરવાડા, કોલવણા, કુરચણ,પુરસા, રોઝાટંકારીયા, સમની બેઠક માટે ભાજપ કોંગ્રેસના ઉમેદવારો વચ્ચે સીધો જંગ ખેલાશે

જ્યારે આછોદ -૨ બેઠક ઉપર ભાજપ ,કોંગ્રેસ ,આમઆદમી પાર્ટી અને અપક્ષ મળી ચતુષ્કોણીય જંગ ખેલાશે.તેમજ ઇખર -૨,માતર તેમજ સરભાણ બેઠક ઉપર ભાજપ કોંગ્રેસ અને આમ આદમી પાર્ટી વચ્ચે ત્રિપાંખિયો જંગ ખેલાશે. આછોદ-૨ બેઠક ઉપર વર્ષો જુના કોંગ્રેસી કાર્યકર ઈકબાલ ઈસ્માઈલ પટેલ (જી્‌ડ્ઢ) ને કોંગ્રેસે ટિકિટ નહીં આપતા અપક્ષમાં ઉમેદવારી નોંધાવી હતી.

ભરૂચ જિલ્લા પંચાયતની આમોદની બે બેઠકો ઈખર અને આછોદ બેઠક માટે ભાજપ કોંગ્રેસ અને આમ આદમી પાર્ટી તેમજ અપક્ષના ઉમેદવારો વચ્ચે ત્રિપાખીયો જંગ ખેલાશે. આછોદ સામાન્ય સ્ત્રી માટે ભાજપના ઉમેદવાર મીનાક્ષીબેન ધર્મેન્દ્રસિંહ રાજ, કોંગ્રેસના દક્ષા મણીલાલ પ્રજાપતિ તેમજ અપક્ષના બિસ્મિલ્લા સલીમખાન પઠાણ વચ્ચે ત્રિપાંખિયો જંગ ખેલાશે.

જ્યારે ઇખર બેઠક બિન અનામત સામાન્ય માટે ભાજપના વિમલભાઈ ઈશ્વરભાઈ પટેલ,કોંગ્રેસના નરેન્દ્રભાઈ રાજેન્દ્રભાઈ પટેલ તેમજ આમ આદમી પાર્ટીના હેમંતકુમાર લક્ષ્મણભાઈ વસાવા અપક્ષના અફસાનાબેન જીવાસા દિવાન તેમજ કાર્તિકભાઈ ડાહ્યાભાઈ પટેલ વચ્ચે ૨૬ મી એપ્રિલે ચૂંટણી જંગ ખેલાશે.