ગોધરાઃ રાયોટિંગ કેસમાં વોન્ટેડ આરોપી ઝડપાયો
(પ્રતિનિધિ) ગોધરા, પંચમહાલ એસ.ઓ.જી. પોલીસે ગોધરા ટાઉન બી ડિવિઝન પોલીસ સ્ટેશનમાં નોંધાયેલા ચર્ચાસ્પદ રાયોટિંગના ગુનામાં વોન્ટેડ આરોપીને ઝડપી પાડવામાં સફળતા મેળવી છે.
મળતી માહિતી મુજબ, પંચમહાલ ગોધરા રેન્જના નાયબ પોલીસ મહાનિરીક્ષક વિધી ચૌધરી તથા પંચમહાલ પોલીસ અધિક્ષક ડૉ. હરેશભાઈ દુધાતના માર્ગદર્શન હેઠળ નાસતા-ફરતા અને વોન્ટેડ આરોપીઓને પકડી પાડવા માટે ખાસ અભિયાન ચલાવવામાં આવી રહ્યું છે. જેના અનુસંધાને એસ.ઓ.જી. પોલીસ ઇન્સ્પેક્ટર એમ. એ. વાઘેલાના માર્ગદર્શન હેઠળ ટીમ દ્વારા સતત પેટ્રોલિંગ અને બાતમીદારોના આધારે કાર્યવાહી હાથ ધરવામાં આવી રહી છે.
આ દરમિયાન એસ.ઓ.જી.ના પો.સ.ઇ. એ. આર. તડવી અને તેમની ટીમ પેટ્રોલિંગમાં હતી ત્યારે એ.એસ.આઈ. શંકરસિંહ સજ્જનસિંહને બાતમી મળી હતી કે ગોધરા ટાઉન બી ડિવિઝન પોલીસ સ્ટેશનમાં નોંધાયેલા રાયોટિંગ સહિતના ગંભીર ગુનામાં વોન્ટેડ આરોપી જાવેદ અબ્દુલ સત્તાર કલંદર ગોધરાના ચર્ચ વિસ્તાર નજીક હાજર છે.
બાતમીના આધારે એસ.ઓ.જી.ની ટીમે તાત્કાલિક સ્થળ પર પહોંચી ઘેરાબંધી કરી આરોપી જાવેદ અબ્દુલ સત્તાર કલંદરને ઝડપી પાડી કાયદેસરની કાર્યવાહી હાથ ધરી હતી. ત્યારબાદ આરોપીને વધુ તપાસ અને કાર્યવાહી માટે ગોધરા ટાઉન બી ડિવિઝન પોલીસ સ્ટેશનને સોંપવામાં આવ્યો હતો.
