નોરા ફતેહીને ખોટી રીતે સ્પર્શનો આરોપ : ટેરેંસ લુઈસે સ્પષ્ટતા કરી
મુંબઈ: ડાન્સ રિયાલિટી શો ઈન્ડિયા બેસ્ટ ડાન્સરના (Dance reality show India’s best Dancer) સેટ પરથી કોરિયોગ્રાફર ટેરેંસ લુઈસ (Terrance Lewis) અને નોરા ફતેહીનો (Nora Fatehi) એક વીડિયો સોશિયલ મીડિયા પર છેલ્લા બે દિવસથી ખૂબ વાયરલ થઈ રહ્યો છે. જેના પરથી ટેરેંસે નોરાને ખોટી રીતે સ્પર્શ કર્યો હોવાનો આરોપ લાગ્યો છે. આ વીડિયો બાદ યૂઝર્સે ટેરેંસ લુઈસને ખૂબ ખરાબ રીતે ટ્રોલ કર્યો. વાત હદ્દ કરતાં આગળ વધી જતાં ટેરેંસે આ મામલે સ્પષ્ટતા કરી છે, તો નોરાએ પણ તેને સપોર્ટ આપ્યો છે.
સામે આવેલી વીડિયો ક્લિપમાં ટેરેંસ અને નોરા સ્ટેજ પર ઉભા છે અને બંને આ દરમિયાન કોઈ એક્ટ માટે પ્રશંસાના રુપ માટે ઝૂકીને સલામ કરી રહ્યા હોય તેમ લાગી રહ્યું છે. જ્યારે ટેરેંસ ઝૂકવા જાય છે ત્યારે તેનો હાથ નોરાના હિપ્સ પર અડી જાય છે. આ જોઈને યૂઝર્સ ભડકી ગયા અને ટેરેંસે ખોટી રીતે સ્પર્શ કર્યો હોવાનું કહેવા લાગ્યા. જે બાદ ટેરેંસે એક પોસ્ટ શેર કરી, જેમાં તે નોરાને ઉંચકીને લઈ જતો જોવા મળી રહ્યો છે.
તેણે સીધી રીતે કંઈ નથી કહ્યું પરંતુ એક વાર્તા દ્વારા પોતાનો પક્ષ રાખ્યો છે. જેના પર કોમેન્ટ કરતાં નોરા ફતેહીએ લખ્યું છે કે, ‘આભાર ટેરેંસ, આજના સમયમાં સોશિયલ મીડિયા પર વીડિયો મોર્ફ કરવામાં આવી રહ્યો છે અને ફોટોશોપથી ઈફેક્ટ નાખીને મીમ બનાવવામાં આવી રહ્યા છે.
મને ખુશી છે કે, તમે પોતાને પરેશાન ન થવા દીધા. તમે શાંતિ જાળવી રાખી. આ સમય પણ પસાર થઈ જશે’. નોરાએ આગળ લખ્યું છે કે, ‘તમે અને ગીતા મેમે હંમેશા મને સન્માન આપ્યું છે અને શોમાં જજ તરીકે પણ પ્રેમ આપ્યો છે.
આ મારા માટે સુખદ અને શીખવા યોગ્ય અનુભવ છે. તમારા પર આશીર્વાદ રહે’. ઉલ્લેખનીય છે કે, શોમાં ગીતા કપૂર અને ટેરેંસની સાથે મલાઈકા અરોરા પણ જજ હતી. જો કે, તેનો કોરોના રિપોર્ટ પોઝિટિવ આવ્યા બાદ હાલ તે રેસ્ટ કરી રહી છે અને તેના બદલે ગેસ્ટ જજ તરીકે નોરા ફતેહીને સ્થાન આપવામાં આવ્યું છે.
