ફિલ્મ લક્ષ્મી બૉમ્બને બેન કરવા સુશાંતના ફેન્સની માગ
મુંબઈ: આશરે ૪ મહિનાથી સુશાંતસિંહ રાજપૂતના ફેન્સ સોશિયલ મીડિયા પર ખૂબ એક્ટિવ છે. દિવંગત એક્ટર માટે ન્યાયની વાત હોય કે મુંબઈ પોલીસથી લઈ એમ્સના રિપોર્ટનો વિરોધ, સુશાંતના ફેન્સ કોઈ કસર બાકી રાખી રહ્યા નથી. આ ફેન્સે નેપોટિઝમ વિશે પણ યુદ્ધ છેડી દીધું છે. સડક ૨થી લઈને ખાલી પિલી સુધી ખૂબ વિરોધ થયો. બીજી તરફ હવે આ જ ઘટનાક્રમમાં અક્ષય કુમારની આગામી ફિલ્મ લક્ષ્મી બૉમ્બ પણ સુશાંતના ફેન્સના ટાર્ગેટ પર આવી ગઈ છે. સોશિયલ મીડિયા પર લક્ષ્મી બૉમ્બના બૉયકોટ અને ફિલ્મને બેન કરવાની વાતો થઈ રહી છે. સુશાંતના કેસમાં ડ્રગ રેકેટમાં અત્યાર સુધી દીપિકા પાદુકોણ, સારા અલી ખાન, શ્રદ્ધા કપૂર અને રકુલપ્રીત સિંહના નામ સામે આવ્યા છે. બોલિવુડના ડ્રગ કનેક્શન પર તમામ સેલિબ્રિટીઝે પોતાના મત રજૂ કર્યા છે.
તાજેતરમાં અક્ષય કુમારે પણ એક વિડિયો શેર કરી, આ અંગે પોતાની પ્રતિક્રિયા આપી હતી. આ વિડિયોમાં તેણે કંઈક એવું કહ્યું જેનાથી સુશાંતના ફેન્સ નારાજ થઈ ગયા છે અને આની સીધી અસર એ છે કે, અક્ષયની અપકમિંગ ફિલ્મ લક્ષ્મી બૉમ્બને બેન કરવાની વાતો થઈ રહી છે. વિડિયોમાં અક્ષય કુમારે બોલિવૂડને સપોર્ટ કર્યો છે. આમાં તે કહે છે કે, એવું નથી કે, બોલિવૂડ સાથે જોડાયેલા તમામ લોકો ડ્રગ્સ લે છે. બોલિવુડના ડ્રગ કનેક્શન પર અક્ષય કુમાર વિડિયોમાં કહી રહ્યો છે કે, ઈન્ડસ્ટ્રીમાં ડ્રગ્સની પ્રૉબ્લેમ નથી. એનો મતલબ એ નથી કે, અહીં બધા લોકો ડ્રગ્સ લે છે.
અક્ષયની આ જ વાત સુશાંત સિંહ રાજપૂતના ફેન્સ ખટકી રહી છે. ટ્વીટર પર કેમ્પેઈન શરૂ થઈ ગયું છે, જેમાં લક્ષ્મી બૉમ્બને બેન કરવાની માંગ થઈ રહી છે. યૂઝર્સ રીતસર હેશટેગની સાથે ટ્વીટ કરી રહ્યા છે. યૂઝર્સનું કહેવું છે કે, અક્ષય કુમારની ફિલ્મનો બહિષ્કાર કરવો જોઈએ. જણાવી દઈએ કે, વિડિયોમાં અક્ષય કુમારે હાથ જોડીને વિનંતી કરી છે કે, ઈન્ડસ્ટ્રીને કોઈ બદનામ દુનિયાની જેમ ન જોવી જોઈએ. અક્ષય કહે છે કે, સુશાંત સિંહ રાજપૂતના મોત બાદથી એવા ઘણા ઈશ્યુ સામે આવ્યા છે જેણે અમને પણ એટલું જ દર્દ આપ્યું છે જેટલું તમને બધાને. મને સુશાંતના મોતની તપાસ પર પૂરો વિશ્વાસ છે. જે સત્ય છે તે સામે આવવું જોઈએ અને જો કોઈ દોષી છે તો તેને સજા મળવી જોઈએ.
