કોંગ્રેસે ચૂંટણી પહેલા વીરભદ્ર સિંહની પત્ની પ્રતિભા સિંહને પ્રદેશ અધ્યક્ષ બનાવ્યા

નવીદિલ્હી, હિમાચલ પ્રદેશમાં આ વર્ષે વિધાનસભા ચૂંટણી યોજાવાની છે, જેના માટે તમામ પક્ષો તૈયારીઓમાં વ્યસ્ત છે. દરમિયાન કોંગ્રેસ દ્વારા મોટી નિમણૂંક કરવામાં આવી છે. કોંગ્રેસે સ્વર્ગસ્થ વીરભદ્ર સિંહના પત્ની પ્રતિભા સિંહને નવા પ્રદેશ અધ્યક્ષ તરીકે નિયુક્ત કર્યા છે.

આ સિવાય કોંગ્રેસ તરફથી સુખવિંદર સિંહ સુખુને પ્રચાર સમિતિના વડા બનાવવામાં આવ્યા છે. બીજી તરફ મુકેશ અગ્નિહોત્રી વિપક્ષના નેતા રહેશે. નોંધનીય છે કે નવા અધ્યક્ષને લઈને કોંગ્રેસમાં સતત ચર્ચા ચાલી રહી હતી. વિપક્ષી દળોએ પણ આ અંગે કોંગ્રેસ પર નિશાન સાધ્યું હતું. કારણ કે પાર્ટીમાં સતત હલચલ મચી ગઈ હતી.

આ વખતે આમ આદમી પાર્ટી રાજ્યમાં ચૂંટણીને લઈને કોંગ્રેસની વ્યસ્ત સ્થિતિનો પૂરેપૂરો ફાયદો ઉઠાવવાનો પ્રયાસ કરી રહી છે. વર્તમાન પરિસ્થિતિમાં ભાજપને પણ લાગી રહ્યું છે કે તેમની મુખ્ય સ્પર્ધા આપ સાથે થઈ શકે છે.

આ જ કારણ છે કે રાજ્યમાં ભાજપે આપના પ્રદેશ અધ્યક્ષ અનૂપ કેસરી સહિત ઘણા દિગ્ગજ નેતાઓને પોતાની પાર્ટીમાં સામેલ કર્યા. કોંગ્રેસની સ્થિતિ આ વખતે વધુ સારી હોય તેવું લાગતું નથી. હિમાચલમાં પણ ઉત્તરાખંડ જેવી જ સ્થિતિ છે.

જાે કે, કોંગ્રેસ તમામ પ્રયાસ કરી રહી છે કે ચૂંટણી પહેલા રાજ્યમાં બધુ બરાબર થઈ જાય અને તેને ભાજપની એન્ટી ઈન્કમ્બન્સીનો ફાયદો મળવો જાેઈએ. આ જ કારણ છે કે હવે ૧૩ થી ૧૫ મે દરમિયાન યોજાનારી કોંગ્રેસના ચિંતન શિબિરમાં હિમાચલ પ્રદેશની ચૂંટણી માટે રણનીતિ તૈયાર કરવામાં આવશે.

કહેવામાં આવ્યું છે કે પાંચ રાજ્યોની હાર બાદ ત્રણ દિવસ સુધી ચાલનારા આ કેમ્પમાં નેતાઓ અને કાર્યકરો પાસેથી હારનું કારણ જાણવાનો પ્રયાસ કરવામાં આવશે. આ સાથે કોંગ્રેસ આગામી વર્ષે યોજાનારી ગુજરાત, હિમાચલ પ્રદેશ તેમજ કર્ણાટક, રાજસ્થાન, છત્તીસગઢ, મધ્યપ્રદેશ જેવા રાજ્યોની વિધાનસભા ચૂંટણી માટે રણનીતિ બનાવશે.HS