દ.ગુજરાતમાં ચોમાસાનું વિધિવત આગમન , ઉમરપાડામાં ૩.૫ ઈંચ વરસાદ

હવામાન વિભાગ દ્વારા ૧૪મી અને ૧૫મી જૂનથી વરસાદની પધરામણી થવાની આગાહી કરાઈ હતી.

ઉમરપાડામાં ૩.૫ અને આહવામાં ૩ ઈંચ વરસાદ ખાબક્યો

ઉમરપાડા, દક્ષિણ ગુજરાતમાં ખેડૂતો સહિતના લોકો જેની આતુરતાથી રાહ જોઈ રહ્યા હતા તે ચોમાસાનું વિધિવત્ આગમન થઈ ગયું છે. વાદળોના ગડગડાટ અને વીજળીના કડાકા-ભડાકા સાથે ૩.૫ ઈંચ સુધીનો વરસાદ વરસતા વાતાવરણમાં ઠંડક પ્રસરી ગઈ હતી. સૌથી વધુ સુરત જિલ્લાના ઉમરપાડામાં ૪ કલાકમાં જ ૩.૫૦ ઈંચ અને ડાંગના આહવામાં ૩ ઈંચ વરસાદ નોંધાયો હતો.હવામાન વિભાગ દ્વારા ૧૪મી અને ૧૫મી જૂનથી વરસાદની પધરામણી થવાની આગાહી કરાઈ હતી. આ આગાહી વચ્ચે રવિવારે (૧૫મી જૂન) બપોરે સુરત શહેર અને જિલ્લામાં વાદળોના ગડગડાટ અને વીજળીના તેજ લિસોટા સાથે મુશળધાર વરસાદ શરૂ થયો હતો.

બપોરે ૨થી સાંજના ૬ વાગ્યા સુધીના ૪ કલાકમાં ઉમરપાડામાં ૩.૫૦ ઈંચ, કામરેજમાં ૧.૭૫ ઈંચ, માંગરોળમાં ૧.૫૦ ઈંચ અને સુરત શહેરમાં ૧ ઈંચ વરસાદ સહિત તમામ તાલુકામાં મેઘરાજા ઓછા-વધતા પ્રમાણમાં વરસ્યા હતા.વરસાદના કારણે છેલ્લા ઘણાં દિવસોથી અસહ્ય ઉકળાટ-બફારાથી ત્રાસી ગયેલા લોકો વાતાવરણમાં ઠંડક પ્રસરતા ખુશ થઈ ઊઠ્યા હતા. ડાંગ જિલ્લામાં શનિવારે (૧૪મી જૂન) રાત્રિના અને રવિવારે (૧૫મી જૂન) બપોર બાદ વીજળીના કડાકા-ભડાકા સાથે વરસાદ વરસતા પાણીની રેલમછેલ થઈ હતી. આહવામાં ૩ ઈંચ, સુબીરમાં ૨ ઈંચ, સાપુતારામાં ૧.૮ ઈંચ અને વઘઈમાં ૧.૫ ઈંચ વરસાદ પડ્યો હતો.

નવસારી જિલ્લામાં છેલ્લા ૨૨ કલાકમાં ખેરગામમાં ૧.૨ ઈંચ, ગણદેવી, ચીખલી ૦.૫ ઇંચ અને જલાલપોરમાં માત્ર ૮ મિમી વરસાદ નોંધાયો હતો. તાજેતરમાં કમોસમી વરસાદ બાદ પાછળ ઠેલાયેલી ઉનાળું ડાંગરની કાપણી બાદ હવે ચોમાસું શરૂ થતાં ઉનાળુ ડાંગર અને પુરેટિયાને નુકસાન થયું છે. વલસાડ જિલ્લામાં રવિવારે (૧૫મી જૂન) સવારે ૬થી સાંજે ૪ વાગ્યા સુધીમાં ૧૦ કલાકમાં સરેરાશ અડધો ઈંચ વરસાદ પડ્યો હતો. જેમાં ઉમરગામમાં બપોરે ૧૨થી ૪ વાગ્યા સુધી માત્ર ચાર કલાકમાં ૨.૫ ઈંચ વરસાદ પડતા ઠેર-ઠેર પાણી પાણી થઇ ગયું હતું.

તાપી જિલ્લામાં શનિવારે (૧૪મી જૂન) સાંજે ગાજવીજ સાથે વરસાદ પડ્યો હતો. સોનગઢમાં રાત્રે ૧૨થી ૨ વાગ્યાના ૨ કલાકમાં ૧ ઈંચ વરસાદ નોંધાયો હતો.હવામાન વિભાગની આગાહી મુજબ, રાજ્યમાં આજે અમરેલી, ભાવનગર, ભરૂચ, સુરત, તાપી, ડાંગ, નવસારી, વલસાડ જિલ્લામાં ગાજવીજ સાથે ભારેથી અતિભારે વરસાદને લઈને આૅરેન્જ ઍલર્ટ જાહેર કર્યું છે. જ્યારે સાબરકાંઠા, અરવલ્લી, મોરબી, રાજકોટ, બોટાદ, જૂનાગઢ, ગીર સોમનાથ, આણંદ, વડોદરા, છોટા ઉદેપુર અને નર્મદા જિલ્લાના છૂટાછવાયા સ્થળોએ ભારે વરસાદને પગલે યલો ઍલર્ટ જાહેર કર્યું છે.

૧૭મી જૂને ભાવનગરમાં આૅરેન્જ ઍલર્ટ અને કચ્છ, મોરબી, સુરેન્દ્રનગર, રાજકોટ, જામનગર, અમરેલી, દેવભૂમિ દ્વારકા, અમદાવાદ, આણંદ, ખેડા, ભરૂચ, સુરત, તાપી, નવસારી, ડાંગ, વલસાડ જિલ્લામાં ભારે વરસાદને પગલે હવામાન વિભાગે યલો ઍલર્ટ જાહેર કર્યું છે.રાજ્યમાં ૧૮મી જૂનના રોજ કચ્છ, જામનગર, દેવભૂમિ દ્વારકા, પોરબંદર, સુરત, તાપી, નવસારી, ડાંગ, વલસાડ જિલ્લામાં અને ૧૯ જૂને ભરૂચ, નર્મદા, સુરત, તાપી, ડાંગ, નવસારી, વલસાડ, ગીર સોમનાથ, અમરેલી, ભાવનગર જિલ્લાના છૂટાછવાયા સ્થળોએ ગાજવીજ સાથે ભારે વરસાદને લઈને યલો ઍલર્ટ જાહેર કર્યું છે. જ્યારે ૨૦મી અને ૨૧મી જૂનના રોજ નવસારી, વલસાડ જિલ્લામાં ભારે વરસાદની ચેતવણી છે.SS1