હોટેલ રિવ્યૂ ટાસ્કના નામે ખાતામાંથી ૭ લાખ ઉપડી ગયા

(એજન્સી)અમદાવાદ, અમદાવાદના નરોડા વિસ્તારમાં રહેતા ૧૯ વર્ષીય બી.કોમ વિદ્યાર્થી સાથે ઓનલાઈન ટાસ્કના નામ પર રૂપિયા ૭ લાખથી વધુની છેતરપિંડી થયાની ઘટના સામે આવી છે. ઠગ દ્વારા ટેલિગ્રામ પર હોટેલ રિવ્યૂ ટાસ્ક કરાવવાની લાલચ આપીને વિદ્યાર્થી સાથે આ ફ્રોડ ૭ જૂનથી ૧૦ જૂન ૨૦૨૫ વચ્ચે થયો હતો.

યુવકે આ અંગે સાયબર ક્રાઇમમાં ફરિયાદ નોંધાવતા પોલીસ તપાસ શરૂ કરી છે. મળતી વિગતો પ્રમાણે, ફરિયાદી યુવકને વોટ્‌સએપ પર એક અજાણ્યા નંબર પરથી ‘વર્ક ફ્રોમ હોમ’ની ઓફર કરવામાં આવી હતી.

પોતે HR હોવાનું જણાવનાર વ્યક્તિએ ગૂગલ પર હોટેલ રિવ્યૂ આપી સારો નફો મળશે તેવી વાત કરી હતી. સાથે જ એક લિંક પણ મોકલવામાં આવી હતી, જેના દ્વારા યુવકે ટાસ્ક શરૂ કર્યા હતા. શરૂઆતના ત્રણ ટાસ્ક પૂરા કરતાં યુવકના કોટક બેંક ખાતામાં રૂપિયા ૧૫૦ જમા થયા હતા.

ત્યારબાદ તેને ટેલિગ્રામમાં જોડાવા માટે બીજી લિંક મોકલવામાં આવી, જેને ક્લિક કરતા તે લિંક્ડઈન નામના ગ્રુપમાં જોડાયો હતો. આ ગ્રુપમાં ‘શેરોન’ અને ‘મનિષકુમાર’ નામથી જોડાયેલા લોકો વિવિધ ટાસ્ક આપવા લાગ્યા હતા.

પહેલા પ્રીપેડ ટાસ્ક તરીકે યુવકને રૂપિયા ૧૦૦૦ જમા કરાવવા કહેવામાં આવ્યું, અને ટાસ્ક પુરૂ થતાં તેને રૂપિયા ૧૪૨૦ પરત મળ્યા હતા. આથી યુવકનો વિશ્વાસ વધી ગયો અને નફા કમાવાની લાલચે તેણે પોતાના, તેના માતા અને પિતાના બેંક ખાતાઓમાંથી વિવિધ રકમો મોકલવા શરૂ કર્યા હતા.

ટેલિગ્રામ પર મોકલવામાં આવેલા જુદા જુદા એકાઉન્ટમાં કુલ રૂપિયા ૭,૧૦,૧૦૦ ટ્રાન્સફર કર્યા બાદ યુવકને માત્ર રૂપિયા ૧,૫૭૦ જ પરત મળ્યા હતા. જ્યારે યુવકે મોટી રકમ પ્રોફીટ સાથે ઉપાડવા માંગણી કરી, ત્યારે ઠગોએ વિવિધ ચાર્જના નામે વધુ પૈસા ભરવા પડશે કહી નાણાં ઉપાડવા અટકાવ્યા. અંતે યુવકને સમજાયું કે તે છેતરાયો છે. આ પછી યુવકે સાયબર ક્રાઇમમાં ફરિયાદ નોંધાવી હતી.