ભારતમાં પેસેન્જર વાહનોનું વેચાણ 24.1 ટકા વધીને 3.88 લાખ થયું

• યુટિલિટી વ્હીકલના વેચાણમાં ૧૯.૯ ટકાનો જબરદસ્ત વધારો થયો.-

• ભારતીય ઓટોમોબાઈલ નિકાસમાં ૩૪ ટકાની મજબૂત વૃદ્ધિ.

• ટુ-વ્હીલર માર્કેટમાં સ્કૂટરનું વેચાણ ૩૯.૧ ટકા ઉછળ્યું.-

• થ્રી-વ્હીલર સેગમેન્ટમાં ઇ-રિક્ષા વેચાણ ૫૨.૪ ટકા વધ્યું.

નવી દિલ્હી, 15 જુલાઈ સોસાયટી ઓફ ઈન્ડિયન ઓટોમોબાઈલ મેન્યુફેક્ચરર્સ (SIAM) દ્વારા બુધવારે જાહેર કરાયેલા આંકડા અનુસાર, જૂન મહિનામાં ઉત્પાદકોથી ડીલરો સુધીના સ્થાનિક પેસેન્જર વ્હીકલ (PV) ના ડિસ્પેચ (મોકલવામાં આવેલા વાહનો) વાર્ષિક ધોરણે 24.1 ટકા વધીને 3,88,144 યુનિટ થયા છે. આ સાથે જ દ્વિચક્રી (ટુ-વ્હીલર) અને ત્રિચક્રી (થ્રી-વ્હીલર) વાહનોના વેચાણમાં પણ બે અંકમાં મજબૂત વૃદ્ધિ નોંધાઈ છે.

ગયા વર્ષે જૂનમાં કુલ પેસેન્જર વ્હીકલ ડિસ્પેચ 3,12,851 યુનિટ રહ્યા હતા, જે સ્થાનિક ઓટોમોબાઈલ માર્કેટમાં તંદુરસ્ત માંગ દર્શાવે છે.

પેસેન્જર વ્હીકલ સેગમેન્ટમાં, યુટિલિટી વ્હીકલ (UV) ની લોકપ્રિયતા યથાવત રહી છે અને તેનું સ્થાનિક વેચાણ વાર્ષિક ધોરણે 19.9 ટકા વધીને 2,17,228 યુનિટ પર પહોંચ્યું છે.

પેસેન્જર કારનું વેચાણ 15.7 ટકા વધીને 98,610 યુનિટ થયું છે, જ્યારે વેનનું વેચાણ 9.5 ટકા વધીને 10,230 યુનિટ નોંધાયું છે.

દ્વિચક્રી વાહનોના ક્ષેત્રે પણ પોતાની મજબૂત ગતિ જાળવી રાખી છે, જેમાં જૂન મહિનામાં ડિસ્પેચ 18.6 ટકા વધીને 18,51,400 યુનિટ પર પહોંચ્યા છે, જે ગયા વર્ષે સમાન ગાળામાં 15,61,283 યુનિટ હતા.

સ્કૂટર આ કેટેગરીમાં સૌથી ઝડપથી વિકસતું સેગમેન્ટ સાબિત થયું છે, જેનું સ્થાનિક વેચાણ 39.1 ટકાના જોરદાર ઉછાળા સાથે 7,44,823 યુનિટ પર પહોંચ્યું છે.

મોટરસાયકલનું વેચાણ 6.4 ટકા વધીને 10,56,422 યુનિટ થયું છે, જ્યારે મોપેડનું વેચાણ, નીચા બેઝને કારણે, 50.4 ટકા વધીને 50,155 યુનિટ પર પહોંચી ગયું છે.

જૂન મહિનામાં ડીલરોને મોકલાયેલા ત્રિચક્રી વાહનો (થ્રી-વ્હીલર) ના ડિસ્પેચ વાર્ષિક ધોરણે 26.1 ટકા વધીને 77,951 યુનિટ થયા છે, જે ગયા વર્ષે જૂનમાં 61,828 યુનિટ હતા.

આ સેગમેન્ટમાં, પેસેન્જર કેરિયર (મુસાફરોને લાવવા-લઇ જવા વાળા વાહનો) નું વેચાણ 25 ટકા વધીને 64,181 યુનિટ થયું છે, જ્યારે ગુડ્સ કેરિયર (સામાન હેરફેર કરવા વાળા વાહનો) નું વેચાણ 29.4 ટકા વધીને 11,828 યુનિટ નોંધાયું છે.

ઇલેક્ટ્રિક થ્રી-વ્હીલર્સમાં પણ સારી વૃદ્ધિ જોવા મળી છે, જેમાં ઇ-રિક્ષાનું વેચાણ 52.4 ટકા વધીને 1,590 યુનિટ થયું છે.

આ અદ્યતન આંકડા મે મહિનાના રેકોર્ડબ્રેક પ્રદર્શન બાદ આવ્યા છે, જ્યારે ભારતના ઓટોમોબાઈલ ઉદ્યોગે પેસેન્જર વ્હીકલ, ટુ-વ્હીલર અને થ્રી-વ્હીલર કેટેગરીમાં મે મહિનાનું અત્યાર સુધીનું સૌથી મજબૂત વેચાણ નોંધાવ્યું હતું, જે સ્થાનિક બજારમાં સતત જળવાયેલી માંગને રેખાંકિત કરે છે.

SIAM ના આંકડા દર્શાવે છે કે જૂન દરમિયાન નિકાસ (એક્સપોર્ટ) પણ મજબૂત રહી હતી.

એકંદરે વાહનોની નિકાસ વાર્ષિક ધોરણે 34 ટકા વધીને 6,73,105 યુનિટ થઈ છે, જેમાં મુખ્ય ફાળો ટુ-વ્હીલર નિકાસનો છે, જે 40.2 ટકા વધીને 5,43,684 યુનિટ પર પહોંચી ગઈ છે.

થ્રી-વ્હીલરની નિકાસ 39.7 ટકા વધીને 51,950 યુનિટ થઈ છે, જ્યારે પેસેન્જર વાહનોની નિકાસ 76,601 યુનિટ સાથે મોટે ભાગે સ્થિર રહી છે.