Western Times News

Gujarati News

ઇન્કમટેક્સના સર્વે માટે જઈ રહેલી ટીમને અકસ્માત નડ્યો, ૧૧ કર્મચારી ઈજાગ્રસ્ત

સુરેન્દ્રનગર૨, અમદાવાદથી રાજકોટ ઈન્કમટેક્સના સર્વે માટે જઈ રહેલી ટીમના વાહનનો સુરેન્દ્રનગરના સોમાસર પાસે અકસ્માત સર્જાતાં ૧૧ કર્મચારીને ઈજા પહોંચી છે. ઘાયલ કર્મચારીઓને પ્રાથમિક સારવાર માટે સુરેન્દ્રનગર ખસેડવામા આવ્યા છે, જ્યાંથી કેટલાક કર્મચારીઓને વધુ સારવાર માટે અમદાવાદ ખસેડવામા આવ્યા છે. ટેમ્પો ટ્રાવેલરના ડ્રાઈવરે સ્ટીયરિંગ પરથી કાબૂ ગુમાવતાં વાહન ઝાડ સાથે અથડાતાં અકસ્માત સર્જાયો હોવાનું જાણવા મળ્યું છે.

આજે વહેલી સવારે અમદાવાદથી રાજકોટ તરફ ઈન્કમટેક્સના સર્વે માટે અધિકારીઓ જઈ રહ્યા હતા. એ સમયે સુરેન્દ્રનગરના સોમાસર પાસે ગાડીના સ્ટીયરિંગ પરથી કાબૂ ગુમાવતાં ગાડી ધડાકાભેર ઝાડ સાથે અથડાઈ હતી.

આ ગમખ્વાર અકસ્માતની ઘટનામાં ગાડીમાં સવાર ૬ મહિલા સહિત ૧૧ કર્મચારીઓને ગંભીર ઇજાઓ પહોંચી હતી. મહિલાઓ સહિતના તમામ ઇજાગ્રસ્ત ઇન્કમટેક્સ કર્મચારીઓને લોહીલુહાણ હાલતમાં સારવાર અર્થે ૧૦૮ એમ્બ્યુલન્સ વાનમાં સુરેન્દ્રનગર હોસ્પિટલ ખાતે ખસેડવામાં આવ્યા હતા. આ ઘટનાથી હાઇવે પર ટ્રાફિકજામનાં દૃશ્યો સર્જાયાં હતાં.

આ ઘટનાની જાણ થતાં આજુબાજુમાંથી લોકોનાં ટોળેટોળાં બનાવના સ્થળે એકઠાં થયાં હતાં. આ ગોઝારા અકસ્માતની ઘટનાની જાણ થતાં સુરેન્દ્રનગરની પોલીસ ટીમે તમામ ઇજાગ્રસ્તોને અમદાવાદ હોસ્પિટલમાં રિફર કરવા માટે મદદ હાથ ધરવાની સાથે ટ્રાફિકજામ દૂર કરી ટ્રાફિક પુનઃ ધમધમતો કર્યો હતો. આ ઘટના અંગે સુરેન્દ્રનગર પોલીસે અકસ્માત અંગેનો ગુનો દાખલ કરી ધોરણસરની કાર્યવાહી હાથ ધરી છે.HS


Read News In Hindi

Read News in English

Copyright © All rights reserved. | Developed by Aneri Developers.