કાગળો લેવા સાસરે આવેલી મહિલા પર ભૂતપૂર્વ પતિએ એસિડ ફેંક્યું
પ્રતિકાત્મક
અમદાવાદ, ખાનગી ન્યૂઝ ચેનલમાં કામ કરતી મહિલા પૂર્વ પતિએ એસિડ ફેક્યું હોવાની ઘટના પ્રકાશમાં આવી છે. આણંદની મહિલા તેના ડોક્યુમેન્ટ લેવા માટે અમદાવાદના દરિયાપુરા ખાતે તેના સાસરીમાં ગઈ હતી, જ્યાં પૂર્વ પતિએ ઝઘડો કરીને મહિલા પર એસિડ જેવું પ્રવાહી રેડવાનો પ્રયાસ કર્યો હતો. સમગ્ર મામલે આણંદની મહિલાએ તેના પૂર્વ પતિ સામે દરિયાપુર પોલીસ સ્ટેશનમાં ફરિયાદ નોંધાવતા પોલીસે ગુનો નોંધીને ફરાર પૂર્વ પતિની શોધખોળ હાથ ધરી છે.
દરિયાપુર પોલીસ સ્ટેશનમાં નોંધાયેલી ફરિયાદ અનુસાર આણંદ ખાતે રહેતી ૩૧ વર્ષી કલ્પના (નામ બદલ્યું છે)એ ૧૩ વર્ષ પહેલા દરિયાપુર ખાતે રહેતા કમલેશ સાળે લગ્ન કર્યા હતા. કલ્પનાની નાની બહેનના લગ્ન પણ તેના દિયર સાથે કર્યા હતા. લગ્નજીવન દરમિયાન કલ્પનાએ એક દીકરી અને દીકરાને જન્મ આપ્યો હતો.
આ દરમિયાન ૪ વર્ષે પહેલા કલ્પનાએ તેના પતિ સાથે અણબનાવ થતા તેણે ડિવોર્સ લીધા હતા. બાદમાં કલ્પના આણંદ ખાતે તેના બે બાળકો સાથે રહીને એક ખાનગી ન્યૂઝ ચેનલમાં કોમ્પ્યુટર ઓપરેટર તરીકે નોકરી કરતી હતી. ડિવોર્સ લીધા બાદ કલ્પનાનો સામાન અને જરૂરી દસ્તાવેજાે તેની સાસરીમાં જ રહી ગયો હોવાથી ૧૩ ફેબ્રુઆરીના રોજ તે કલ્પના અને તેની માતા દરિયાપુર ખાતે સાસરિયે આવ્યા હતા.
ત્યારે કમલેશે કલ્પનાની માતાને કહ્યું કે, તમે નીચે જાવ મારે કલ્પના સાથે એકલામાં વાત કરવી છે. જેથી કલ્પનાના માતા નીચે જતા રહ્યા હતા. ત્યારે કમલેશે કલ્પનાને પૂછ્યું કે, તારે ઘરે પાછું આવું છે કે નહીં? ત્યારે કલ્પનાએ ના પાડી દીધી હતી.
આ દરમિયાન કમલેશ ઉશ્કેરાઈ ગયો અને તેના વાળ ખેંચીને એક બોટલમાંથી એસિડ જેવું પ્રવાહી તેના મોઢા પર છાંટવા જતો હતો. જેથી કલ્પનાએ પ્રતિકાર કરતા એસિડના છાંટા તેની આંખમાં પડ્યા હતા. દરમિયાન કલ્પનાએ બૂમાબૂમ કરતા આસપાસના લોકો દોડી આવ્યા હતા અને મદદ કરી હતી. ત્યારબાદ કલ્પનાને સારવાર માટે હોસ્પિટલ ખસેડવામાં આવી હતી. આ અંગે દરિયાપુર પોલીસ સ્ટેશનમાં ફરિયાદ નોંધવામાં આવી છે.SSS
