અમરેલી જિલ્લામાંથી ૨૨૦ લીટર નકલી દૂધ ઝડપાયું

(એજન્સી)અમરેલી, અમરેલી જિલ્લામાં લોકોના સ્વાસ્થ્ય સાથે ચેડાં કરવાનું વધુ એક મોટું અને ગંભીર કૌભાંડ સામે આવ્યું છે. ખાંભા તાલુકાના ઈંગોરાળા ગામમાં ફૂડ વિભાગ અને પોલીસે સંયુક્ત ઓપરેશન હાથ ધરીને પરા વિસ્તારના એક મકાનમાંથી ૨૨૦ લીટર શંકાસ્પદ નકલી દૂધનો જથ્થો ઝડપી પાડ્યો છે.

આ દરોડા દરમિયાન દૂધ બનાવવા માટે વપરાતો ૨૦૦ કિલોથી વધુ પાઉડર અને વનસ્પતિ તેલ પણ મળી આવતાં તંત્ર ચોંકી ઉઠ્યું હતું. મોડી રાત્રે કાર્યવાહી કરતા ફૂડ વિભાગે નકલી દૂધના સેમ્પલ લઈને સ્થળ પર જ ૨૨૦ લીટર દૂધનો નાશ કર્યો છે અને પોલીસે આ મામલે જાણવાજોગ ફરિયાદ નોંધીને કાયદેસરની તપાસ શરૂ કરી દીધી છે.

પ્રાપ્ત વિગતો મુજબ, અમરેલીના ઈંગોરાળા ગામના પરા વિસ્તારમાં કેટલાક શખ્સો નકલી દૂધ બનાવવાનો કાળો કારોબાર ચલાવતા હોવાની તંત્રને પાકી બાતમી મળી હતી. આ માહિતીના આધારે ખાંભા પોલીસ અને ફૂડ એન્ડ ડ્રગ્સ વિભાગની ટીમે રાજુ રબારી અને રાણા ભરવાડ નામના શખ્સોના તબેલા તેમજ રહેણાંક મકાનમાં ઓચિંતા દરોડા પાડ્યા હતા.

દરોડા દરમિયાન તપાસ કરતા અધિકારીઓને ત્યાંથી ૨૨૦ લીટર જેટલું શંકાસ્પદ નકલી દૂધ મળી આવતા ભેળસેળનું આખું કૌભાંડ ખુલ્લું પડી ગયું હતું. આ શખ્સો થોડા રૂપિયાના લાલચમાં લોકોના અને ખાસ કરીને બાળકોના આરોગ્ય સાથે ગંભીર રમત રમી રહ્યા હતા.