રાજ્યભરમાં સ્થાનિક સ્વરાજ્યની ચૂંટણી માટે BJPની સેન્સ પ્રક્રિયામાં દાવેદારો ઉમટી પડયા
ભાજપ દ્વારા સેન્સ પ્રક્રિયા પારદર્શક અને યોગ્ય રીતે પૂર્ણ થાય તે માટે ખાસ નિરીક્ષકોની નિમણૂક
(એજન્સી)ગાંધીનગર, આગામી ચૂંટણીઓના પડઘમ વચ્ચે અમદાવાદ તેમજ અન્ય મહાનગરપાલિકાઓમાં ભારતીય જનતા પાર્ટી દ્વારા ઉમેદવારોની પસંદગી માટેની કવાયત તેજ કરવામાં આવી છે. બીજી એપ્રિલ શહેરના વિવિધ વિસ્તારોમાં ભાજપની સેન્સ પ્રક્રિયાનો વિધિવત પ્રારંભ થયો છે. ટિકિટ મેળવવા ઈચ્છુક દાવેદારો વહેલી સવારથી જ નિરીક્ષકો સમક્ષ પોતાની રજૂઆત કરવા માટે ઉમટી પડ્યા હતા.
નિર્ધારિત કાર્યક્રમ મુજબ, શહેરના અલગ-અલગ વિસ્તારોમાં આવેલી ખેતી બેન્ક ખાતે સવારે ૯ઃ૩૦ વાગ્યાથી સેન્સ લેવાની કામગીરી શરૂ કરવામાં આવી હતી. આ પ્રક્રિયાના નિરીક્ષણ અને કાર્યકરોને માર્ગદર્શન આપવા માટે શહેર ભાજપ પ્રમુખ પ્રેરક શાહ પણ સ્થળ પર પહોંચ્યા હતા. તેમણે પ્રક્રિયાની સમીક્ષા કરી ઉમેદવારો સાથે વાતચીત કરી હતી. સેન્સ પ્રક્રિયાના પ્રથમ દિવસે જ કાર્યકરો અને દાવેદારોમાં ભારે ઉત્સાહ જોવા મળ્યો હતો.
જોધપુર, વેજલપુર, સરખેજ, મકતમપુરા, ચાંદલોડિયા, સાબરમતી અને રાણીપ વોર્ડ માટે સેન્સ લેવાની કામગીરી હાથ ધરવામાં આવી છે, જ્યારે સાંજના સમયે ચાંદખેડા વોર્ડના દાવેદારો પોતાની દાવેદારી નોંધાવી શકશે. આજે સવારથી જ સાયન્સ સિટી રોડ પર આવેલા આર.કે. હોલ અને નારણપુરા સ્થિત ખેતી બેન્ક ખાતે દાવેદારો અને તેમના સમર્થકોની મોટી ભીડ જોવા મળી હતી.
ખાસ કરીને ચાંદલોડિયા વોર્ડ માટે મોટી સંખ્યામાં કાર્યકરો વહેલી સવારથી જ પોતાની દાવેદારી નોંધાવવા પહોંચી જતાં રાજકીય માહોલ ગરમાયો છે. રાજ્યમાં સ્થાનિક સ્વરાજ્યની ચૂંટણી જાહેર કરવામાં આવી છે. રાજ્યમાં ભાજપ દ્વારા વિવિધ જગ્યાએ સેન્સ પ્રક્રિયા હાથ ધરવામાં આવી છે જેમાં મોટી સંખ્યામાં ઉમેદવારો દાવેદારી નોંધાવવા માટે ઉમટી પડ્યા છે. મહેસાણા, જામનગરમાં તો કોર્પોરેટર બનવા માટે ઉમેદવારોનો રાફડો ફાટ્યો છે.
એક વોર્ડ પર ૨૦થી ૨૫ ઉમેદવારો દાવેદારી નોંધાવી રહ્યા છે. મહત્ત્વપૂર્ણ છે કે ૧૫ મ્યુનિસિપલ કોર્પોરેશન, ૮૪ નગર પાલિકા, ૩૪ જિલ્લા પંચાયત, ૨૬૦ તાલુકા પંચાયતોની ચૂંટણી માટે આચારસંહિતા અમલી થઇ ગઇ છે.
૨૬ એપ્રિલે મતદાન જ્યારે ૨૮મીએ પરિણામ જાહેર કરવામાં આવશે. આગામી કોર્પોરેશનની ચૂંટણી માટે રાજકોટ શહેર ભાજપ દ્વારા ઉમેદવારોની પસંદગીની પ્રક્રિયા તેજ કરવામાં આવી છે. શહેરમાં બે દિવસ સુધી ચાલેલી સેન્સ લેવાની પ્રક્રિયામાં કાર્યકરોનો અભૂતપૂર્વ ઉત્સાહ જોવા મળ્યો હતો.
કુલ ૧૮ વોર્ડની બેઠકો માટે આશ્ચર્યજનક રીતે ૧૦૧૦ જેટલા કાર્યકર્તાઓએ પોતાની દાવેદારી નોંધાવી છે. સેન્સ પ્રક્રિયાના પ્રથમ દિવસે સૌથી વધુ ધસારો જોવા મળ્યો હતો, જેમાં ૬૫૬કાર્યકરોએ નિરીક્ષકો સમક્ષ પોતાની દાવેદારી રજૂ કરી હતી. જ્યારે બીજા દિવસે ૩૫૪ કાર્યકરોએ ટિકિટ માટે ઈચ્છા વ્યક્ત કરી હતી. મહેસાણા મહાનગરપાલિકા બન્યા બાદ પ્રથમ વખત ચૂંટણી યોજાવા જઇ રહી છે.
ચૂંટણી જાહેર થતા જ સત્તાધારી પક્ષ ભાજપે કમર કસી છે. કૂલ ૧૩ વોર્ડની ૫૨ બેઠકો માટે ૪૫૦થી વધુ ઉમેદવારોએ દાવેદારી નોંધાવી છે. આજે પ્રથમ દિવસે વોર્ડ ૧થી ૬ના દાવેદારોની સેન્સ લેવાઇ હતી. આવતીકાલે ૭થી ૧૩ વોર્ડના દાવેદારોની સેન્સ લેવામાં આવશે. પ્રદેશ ભાજપ દ્વારા આ સેન્સ પ્રક્રિયા પારદર્શક અને યોગ્ય રીતે પૂર્ણ થાય તે માટે ખાસ નિરીક્ષકોની નિમણૂક કરવામાં આવી છે.
જેમાં રાજ્યના કેબિનેટ મંત્રી પ્રદ્યુમન વાજા, કચ્છ જિલ્લા ભાજપના પૂર્વ મહામંત્રી જયસુખ પટેલ અને પ્રદેશ કારોબારી સભ્ય જીજ્ઞાબેન પંડ્યાને નિરીક્ષક તરીકે જવાબદારી સોંપવામાં આવી છે. આજે પ્રથમ દિવસે નિરીક્ષકોની પેનલ દ્વારા વોર્ડ નં. ૧ થી ૬ ના દાવેદારોની સેન્સ લેવામાં આવી હતી. દરેક દાવેદારને સાંભળીને તેમની કામગીરી અને લોકપ્રિયતાનો તાગ મેળવવામાં આવ્યો હતો. જ્યારે આવતીકાલે બાકી રહેલા વોર્ડ નં. ૭ થી ૧૩ ના દાવેદારોની સેન્સ લેવામાં આવશે.
