નોકરી આપવાના બહાને બંટી બબલીની યુવક સાથે રૂ.૨૦,૭૦૦ની ઠગાઈ
(પ્રતિનિધિ) નડિયાદ, નડિયાદ નજીક કપડવંજ રોડ પર આવેલ સંતરામ વાટિકામાં રહેતા અને નગરપાલિકામાં છૂટક મજૂરી કરતા એક યુવકને સરકારી કચેરીમાં નોકરી અપાવવાની લાલચ આપી બંટી બબલી એ વિશ્વાસમાં લઈ કુલ એ ૨૦,૭૦૦ પડાવી લઈ વિશ્વાસઘાત કર્યાની ફરિયાદ નડિયાદ રૂરલ પોલીસ મથકે નોંધાઈ છે.
મળતી માહિતી મુજબ નડિયાદના કપડવંજ રોડ પર આવેલ સંતરામ વાટીકા સોસાયટીમાં રહેતા અને નગરપાલિકામાં મજૂરી કામ કરતા ૩૩ વર્ષીય યોગેશકુમાર બાબુભાઈ તુરી (બારોટ) નો ગત ૧૧ નવેમ્બર ૨૦૨૫ના રોજ નડિયાદ નગરપાલિકાના એક વોટ્સએપ ગ્રુપ દ્વારા હીરેન પ્રવિણ શ્રીમાળી (રહે. સંતરામ પાર્ક, બિલોદરા) સાથે સંપર્ક થયો હતો.
બાદ હિરેન શ્રીમાળી એ પોતે નોકરી અપાવશે તેવી વાત કરી યોગેશકુમારને વોટ્સએપ ગ્રુપમાં એડ કર્યા હતા. ત્યારબાદ હીરેન શ્રીમાળીએ પોતાની સાથે ઉર્વશી શાંતી શ્રીમાળી હોવાનું અને તે ગાંધીનગર જિલ્લા ઉદ્યોગ ભવનની શિક્ષણ શાખામાં નોકરી કરતા હોવાની ઓળખ આપી હતી પછી બંટી અને બબલી એ યોગેશકુમારને નોકરી અપાવવાનો પાકો ભરોસો આપી કુલ ૫૦,૦૦૦ રૂપિયાની માંગણી કરી હતી.
નોકરીની લાલચમાં આવી ગયેલા યોગેશકુમારે ગત ૧૪ નવેમ્બર ૨૦૨૫ના રોજ પોતાના શૈક્ષણિક દસ્તાવેજો આપ્યા હતા અને હીરેન શ્રીમાળીના કહેવાથી તેઓ એ ઉર્વશીના ગુગલ પે એકાઉન્ટમાં રૂપિયા ૧૨,૦૦૦ ટ્રાન્સફર કર્યા હતા. ત્યારબાદ નોકરીના એગ્રીમેન્ટના બહાને વધુ ૭૦૦ ઓનલાઈન હિરેન શ્રીમાળીના ખાતામાં જમા કરાવ્યા હતા.
સાથે બંટી બબલી એ નોકરીના ઓર્ડર સાથે લેપટોપ પણ આપવાનું છે તેમ કહી યોગેશકુમારના ભાઈ ભૂપેન્દ્રભાઈના ખાતામાંથી પેટીએમ મારફતે વધુ ૮,૦૦૦ રૂપિયા પણ પડાવ્યા હતા. આમ બંટી બબલી એ કટકે-કટકે કુલ ૨૦,૭૦૦ રૂપિયા મેળવી લીધા હતા.
