અમેરિકાને ફટકો: ઈરાને યુએસ ફાઈટર જેટ તોડી પાડ્યાનો દાવો
તેહરાન: અમેરિકા અને ઈરાન વચ્ચે ચાલી રહેલા ભીષણ યુદ્ધમાં એક મોટા અને ચોંકાવનારા સમાચાર સામે આવ્યા છે. ઈરાની મીડિયા અને સૈન્યના દાવા મુજબ, ઈરાનની એર-ડિફેન્સ સિસ્ટમે એક જ દિવસમાં અમેરિકાના ત્રણ અત્યાધુનિક ફાઈટર જેટ તોડી પાડ્યા છે. પર્સિયન ગલ્ફ (અખાત) અને ઈરાની સીમા પર એકસાથે ત્રણ વિમાનો ગુમાવવા એ અમેરિકન વાયુસેના (US Air Force) માટે અત્યાર સુધીનો સૌથી મોટો ફટકો માનવામાં આવી રહ્યો છે.
ઈરાનની સત્તાવાર ન્યૂઝ એજન્સી ‘તસનીમ ન્યૂઝ’ (Tasnim News) દ્વારા વિમાનોના કાટમાળના ફોટા અને વીડિયો સત્તાવાર રીતે જાહેર કરવામાં આવ્યા છે.
કયા ત્રણ ફાઈટર જેટ તોડી પાડ્યાનો દાવો?
ઈરાની મીડિયા અને આંતરરાષ્ટ્રીય રિપોર્ટ્સ અનુસાર, નિશાન બનાવવામાં આવેલા ત્રણ અમેરિકન ફાઈટર જેટ્સની વિગતો નીચે મુજબ છે:
-
F-15E સ્ટ્રાઈક ઈગલ (F-15E Strike Eagle): સૌથી પહેલો હુમલો દક્ષિણ-પશ્ચિમ ઈરાન પર ઉડાન ભરી રહેલા F-15E જેટ પર થયો હતો. રિપોર્ટ્સ મુજબ, આ જેટમાં બે ક્રૂ મેમ્બર્સ હતા. અમેરિકન સેના દ્વારા ચલાવવામાં આવેલા રેસ્ક્યૂ ઓપરેશનમાં એક પાઈલટને બચાવી લેવાયો છે, જ્યારે બીજા પાઈલટની શોધખોળ હજુ ચાલી રહી છે.
-
A-10 વાર્થોગ (A-10 Warthog): બીજું જેટ A-10 વાર્થોગ હોવાનું જણાવાયું છે, જેને હોર્મુઝની સામુદ્રધુની અને પર્સિયન ગલ્ફ નજીક તોડી પાડવામાં આવ્યું છે. કેટલાક અમેરિકન અધિકારીઓએ પણ સ્વીકાર્યું છે કે આ જેટ ક્રેશ થયું છે, જોકે પાયલોટે સમયસર ઈજેક્ટ કરી લેતા તેને સુરક્ષિત રીતે બચાવી લેવાયો છે.
-
F-16 જેટ (F-16 Falcon): F-15E અને A-10 બાદ હવે ઈરાની મીડિયા રિપોર્ટ્સ દાવો કરી રહ્યા છે કે તેમની એર-ડિફેન્સ સિસ્ટમે ત્રીજા વિમાન તરીકે F-16 ફાઈટર જેટને પણ નિશાન બનાવ્યું છે.
તસનીમ ન્યૂઝ એજન્સીનો દાવો અને ફોટા
તસનીમ ન્યૂઝ અને ઈરાનની ઈસ્લામિક રિવોલ્યુશનરી ગાર્ડ કોર્પ્સ (IRGC) દ્વારા દાવો કરવામાં આવ્યો છે કે અમેરિકન એરફોર્સ ઈરાનની આકાશમાં સુરક્ષિત નથી. એજન્સીએ કાટમાળ અને ક્રેશ સાઈટ પર એકઠા થયેલા લોકોના કેટલાક ફૂટેજ પણ પ્રસારિત કર્યા છે. શરુઆતમાં ઈરાને F-35 જેટ તોડી પાડ્યાનો દાવો કર્યો હતો, પરંતુ કાટમાળના ફોટા પરથી સંરક્ષણ નિષ્ણાતોએ તે F-15E હોવાની પુષ્ટિ કરી છે.
આ ઘટના બાદ પર્સિયન ગલ્ફ અને સમગ્ર મધ્ય પૂર્વમાં તણાવ ચરમસીમાએ પહોંચી ગયો છે. અમેરિકન રાષ્ટ્રપતિ દ્વારા એવો દાવો કરવામાં આવી રહ્યો હતો કે યુએસ સેનાએ ઈરાનની તમામ રડાર અને એર-ડિફેન્સ સિસ્ટમ નષ્ટ કરી દીધી છે. પરંતુ, એક જ દિવસમાં ત્રણ-ત્રણ અમેરિકન ફાઈટર જેટ્સ ક્રેશ થવાની ઘટનાએ અમેરિકાના દાવાઓ પર સવાલ ઉભા કર્યા છે. વધુમાં, પાઈલટને બચાવવા ગયેલા અમેરિકન ‘બ્લેક હોક’ હેલિકોપ્ટર પર પણ ફાયરિંગ થયું હોવાના અહેવાલ છે.
