નડિયાદ કોંગ્રેસ દ્વારા ‘કોંગ્રેસનું કમિટેમેન્ટ’ ચૂંટણી ઢંઢેરો જાહેર

શિક્ષણ, આરોગ્ય અને વિકાસના ૨૦ વર્ષના માસ્ટર પ્લાન સાથે પરિવર્તનનો દાવો

(પ્રતિનિધિ) નડિયાદ, નડિયાદમાં આગામી સ્થાનિક સ્વરાજ્યની ચૂંટણીઓનો જંગ તેજ બન્યો છે, ત્યારે શહેર કોંગ્રેસ સમિતિ દ્વારા ‘કોંગ્રેસનું કમિટેમેન્ટ’ શીર્ષક હેઠળ પોતાનો ચૂંટણી ઢંઢેરો જાહેર કરવામાં આવ્યો છે.

ખેડા જિલ્લા કોંગ્રેસ સમિતિ ખાતે ગુજરાત પ્રદેશ કોંગ્રેસ સમિતિના પ્રવક્તા ડોક્ટર અમિત નાયક દ્વારા આ મેનિફેસ્ટો પ્રસિદ્ધ કરવામાં આવ્યો હતો. આ સંકલ્પ પત્રમાં શિક્ષણ, આરોગ્ય અને પાયાની સુવિધાઓમાં ધરખમ ફેરફારો કરવાની ખાતરી સાથે શહેરના આગામી ૨૦ વર્ષના વિકાસનો રોડમેપ રજૂ કરવામાં આવ્યો છે. કોંગ્રેસના આ આક્રમક અભિગમ અને જીતના દાવાને પગલે રાજકીય આલમમાં હલચલ મચી છે.

શિક્ષણ અને આરોગ્ય ક્ષેત્રે પક્ષ દ્વારા મોટા વચનો આપવામાં આવ્યા છે. જે મુજબ નડિયાદના દરેક વોર્ડમાં આધુનિક સુવિધા ધરાવતી પ્રાથમિક શાળાઓ અને દરેક ઝોનમાં ગુજરાતી તેમજ અંગ્રેજી માધ્યમની માધ્યમિક શાળાઓ શરૂ કરવામાં આવશે. આરોગ્ય સેવાઓને પ્રાથમિકતા આપતા દરેક વોર્ડમાં આધુનિક હેલ્થ સેન્ટર બનાવી ત્યાં ૨૪ કલાક મફત ઇમરજન્સી સેવાઓ પૂરી પાડવાનું આયોજન છે.

આ કેન્દ્રો પર બ્લડ ટેસ્ટ, એક્સ-રે અને ડાયાબિટીસ જેવી તપાસ નિઃશુલ્ક કરવામાં આવશે તેવું વચન આપવામાં આવ્યું છે. પાયાની સુવિધાઓમાં રહેવાસીઓને દિવસમાં બે વાર પૂરતા પ્રેશરથી શુદ્ધ પાણી આપવાની અને અંડરગ્રાઉન્ડ સ્ટોર્મ વોટર સિસ્ટમ દ્વારા ગટરની સમસ્યાનો કાયમી ઉકેલ લાવવાની ખાતરી અપાઈ છે.

મહિલા સુરક્ષા અને સ્વાવલંબન માટે કોંગ્રેસે વિશેષ આયોજન રજૂ કર્યું છે. જેમાં શહેરમાં મહિલાઓ માટે આધુનિક એસી હોસ્ટેલ્સ અને પિંક ટોયલેટ્‌સ બનાવવા સહિત સુરક્ષા માટે ખાસ ટાસ્ક ફોર્સની રચના કરવાનું જણાવાયું છે. મહિલાઓને આર્થિક રીતે સક્ષમ બનાવવા માટે સ્વરોજગાર તાલીમ કેન્દ્રો સ્થાપવાની બાબત પણ એજન્ડામાં સામેલ છે. રોજગાર મુદ્દે યુવાનો માટે સ્કીલ ડેવલપમેન્ટ સેન્ટર અને મહાનગરપાલિકામાં પારદર્શક ભરતી પ્રક્રિયાનું વચન અપાયું છે.

આ ઉપરાંત, લારી-ગલ્લા ધારકો માટે નિયમિત ઝોન અને લાયસન્સ પ્રથા દાખલ કરી તેઓની પજવણી અટકાવવાની અને નવા ભળેલા ગ્રામ્ય વિસ્તારોના રહિશોને પ્રથમ ૫ વર્ષ સુધી ટેક્સમાં રાહત આપવાની જાહેરાત કરવામાં આવી છે.

પર્યાવરણ અને ટ્રાફિક વ્યવસ્થા માટે પક્ષે લાંબાગાળાનું આયોજન જાહેર કર્યું છે. આગામી ૨૦ વર્ષના માસ્ટર પ્લાન સાથે મજબૂત રોડ અને ર્પાકિંગ ઝોન બનાવવાની નેમ છે, જ્યારે ગ્રીન ઝોન વિકસાવી શહેરનું તાપમાન ૨ ડિગ્રી ઘટાડવાનો લક્ષ્યાંક રાખવામાં આવ્યો છે. સફાઈ વ્યવસ્થા હેઠળ ઘેર-ઘેરથી બે સમય કચરો ઉઘરાવવા, આધુનિક વેસ્ટ મેનેજમેન્ટ પ્લાન્ટ સ્થાપવા અને નદી-તળાવોના બ્યુટીફિકેશન પર ભાર મુકાયો છે.

વહીવટી પારદર્શિતા માટે ‘ડિજિટલ મહાનગરપાલિકા’ના અભિગમ હેઠળ તમામ દાખલા અને ટેક્સની કામગીરી ઓનલાઇન કરવાની તથા સુરક્ષા માટે મુખ્ય ચાર રસ્તાઓ પર સીસીટીવી અને સોલર એલઈડી લાઈટ્‌સ લગાવવાની ખાતરી આપવામાં આવી છે. આ પ્રસંગે પ્રદેશ પ્રવક્તા અમિત નાયક, શહેર પ્રમુખ હાર્દિક ભટ્ટ, ગોકુલ શાહ, સુરેન્દ્ર બારોટ, ઉરવ મૈત્રાલ, સલ્લુ કાકા અને ચીમન ઇનામદાર સહિતના આગેવાનો ઉપસ્થિત રહ્યા હતા.