દારૂ વેચતી મહિલાનો વીડિયો ઉતારી તોડબાજ પત્રકારોએ રૂ.૧.૦પ લાખ પડાવ્યા

સાતેજ પોલીસ મથકે ત્રણ સામે ફરિયાદ

ગાંધીનગર, ગાંધીનગરના સાંતેજ પોલીસ સ્ટેશન વિસ્તારમાં કથિત પત્રકાર હોવાની ઓળખ આપી એક મહિલા પાસેથી લાખો રૂપિયાની ખંડણી વસૂલવાની ઘટના સામે આવી છે. દારૂના વ્યવસાય સાથે જોડાયેલી મહિલાનો વીડિયો વાયરલ કરવાની ધમકી આપી ત્રણ કથિત પત્રકારો અને તેમના સ્ટાફે કુલ રૂ.૧,૦પ,૦૦૦ બળજબરીપૂર્વક કઢાવી લીધા હતા.

ફરિયાદી લક્ષ્મીબેન રવિભાઈ ચુનારા, જેઓ રકનપુર ગામના ઓરાઈ તળાવ કિનારે રહે છે, તેમણે નોંધાવેલી ફરિયાદ મુજબ તેઓ અગાઉ દેશી દારૂ વેચવાનો ગેરકાયદેસર ધંધો કરતા હતા. ગત ૧૦ ડિસેમ્બર ર૦રપ ના રોજ સંજય પાંડે, મિતાંશુ દરજી અને અંકિત વ્યાસ નામના ત્રણ વ્યક્તિઓ પત્રકાર તરીકે તેમની પાસે આવ્યા હતા. આ શખ્સોએ મહિલાનો દારૂની કોથળીઓ સાથેનો વીડિયો ઉતારી લીધો હતો અને તેને વાયરલ કરવાની ધમકી આપી દર મહિને રૂ.૪૦,૦૦૦ હપ્તાની માંગણી કરી હતી.

આરોપીઓએ મહિલાને ડરાવી- ધમકાવીને અલગ અલગ સમયે નાણાં પડાવ્યા હતા. પ્રથમ વખત વીડિયો વાયરલ ન કરવાના બદલામાં રૂ.૪૦,૦૦૦ રોકડા પડાવ્યા, બીજી વખત મિતાંશુ દરજી અને અંકિત વ્યાસ અન્ય બે સ્ટાફના પત્રકારોને સાથે લાવી રૂ.રપ,૦૦૦ લઈ ગયા. ત્રીજી વખત મિતાંશુ દરજીએ ફરીથી આવી રૂ.૧પ,૦૦૦ લીધા હતા.

મહિલાએ મિતાંશુના ત્રાસથી પોતાના દાગીના વેચીને પણ રૂ.ર૦,૦૦૦ આપ્યા હતા. છેલ્લે ગત ર૪ માર્ચ ર૦ર૬ના રોજ મહિલાએ રૂ.પ,૦૦૦ મિતાંશુના એકાઉન્ટમાં ઓનલાઈન મોકલ્યા હતા. મહિલાએ દારૂનો વેપાર બંધ કરી દીધો હોવા છતાં આરોપીઓએ જૂનો વીડિયો વાયરલ કરવાની ધમકી આપવાનું ચાલુ રાખ્યું હતું.

પાંચ દિવસ અગાઉ મિતાંશુના સ્ટાફના પત્રકારે ફરીથી પૈસાની ઉઘરાણી કરી વીડિયો વાયરલ કરવાનો પ્રયાસ કરતા અંતે મહિલાએ હિંમત કરી પોલીસનો સંપર્ક સાધ્યો હતો. સાંતેજ પોલીસે આ મામલે સંજય પાંડે, મિતાંશુ દરજી અને અંકિત વ્યાસ વિરુદ્ધ બી.એન.એસ.ની કલમ ૩૦૮ (૬), ૩૦૮ (ર) અને પ૪ હેઠળ ગુનો નોંધી વધુ તપાસ હાથ ધરી છે.