વિચલિત કરતી વાર્તા સાથે ‘બંદર’માં બોબીનો દમદાર અભિનય

કોર્ટમાં ગાયત્રી અને તેના વકીલ સંપૂર્ણ તૈયારી સાથે આવે છે

સુદીપ શર્મા અને અભિષેક બેનર્જીની વાર્તા સત્ય ઘટનાઓથી પ્રેરિત છે અને ખૂબ જ ચોંકાવનારી છે

મુંબઈ, ‘બંદર’ એક એવા માણસની વાર્તા છે જેના પર એવા ગુનાનો આરોપ મૂકવામાં આવે છે જે તેણે કર્યાે નથી એવો તેનો દાવો છે. સમર મહેરા (બોબી દેઓલ) ૫૦ વર્ષનો સંઘર્ષશીલ અભિનેતા છે, જે એક સમયે ટેલિવિઝનમાં કામ કરતો હતો. તેને હજુ પણ ટીવી શોઝ માટે ઓફરો મળે છે, પરંતુ તે બધાને નકારી કાઢે છે કારણ કે તે ફિલ્મોમાં પોતાનું નસીબ અજમાવવા માંગે છે. જીવનનિર્વાહ માટે તે સ્ટેજ શોઝમાં પરફોર્મ કરે છે.દિલ્હીમાં એક સ્ટેજ શો પૂરો કરીને પરત ફર્યા બાદ પોલીસ તેના ઘરે આવે છે અને ગાયત્રી (સપના પબ્બી) નામની મહિલાના બળાત્કારના આરોપસર તેની ધરપકડ કરે છે.

સમર અને ગાયત્રી વચ્ચે એક સમયે શારીરિક સંબંધ હતો, પરંતુ ગાયત્રીનું વર્તન બદલાઇ જતાં સમરે તેને અવગણવાનું શરૂ કર્યું અને પછી તેને બ્લોક કરી દીધી.કોર્ટમાં ગાયત્રી અને તેના વકીલ સંપૂર્ણ તૈયારી સાથે આવે છે, જ્યારે સમરના વકીલ તેમની દલીલોનો યોગ્ય રીતે સામનો કરી શકતા નથી. પરિણામે, સમરને ૧૫ દિવસની ન્યાયિક કસ્ટડીમાં મોકલવામાં આવે છે અને તેને તલોજા જેલમાં ખસેડવામાં આવે છે. અહીં તેને જીવનનો સૌથી મોટો આઘાત લાગે છે, કારણ કે જેલનું જીવન અત્યંત ગંદી અને રહેવા માટે અયોગ્ય પરિસ્થિતિઓથી ભરેલું છે.

વધુમાં, બળાત્કારના આરોપી તરીકે અન્ય કેદીઓ અને અંડરટ્રાયલ કેદીઓ તરફથી પણ તેને ભારે શંકા અને તિરસ્કારનો સામનો કરવો પડે છે. ત્યારબાદ શું થાય છે, તે જાણવા દર્શકોએ ફિલ્મ જોવી પડશે.સુદીપ શર્મા અને અભિષેક બેનર્જીની વાર્તા સત્ય ઘટનાઓથી પ્રેરિત છે અને ખૂબ જ ચોંકાવનારી છે. તેમની પટકથામાં અનેક રોમાંચક અને હૃદયસ્પર્શી દૃશ્યો છે, જોકે કેટલાક દૃશ્યોમાં લેખનની કમજોરી પણ જોવા મળે છે. તેમના સંવાદો વાસ્તવિક જીવનમાંથી લીધેલા લાગે છે અને કેટલીક એક-લાઇનર વાતો દર્શકોને ભરપૂર હસાવશે.નિર્દેશક અનુરાગ કશ્યપનું દિગ્દર્શન અત્યંત વાસ્તવિક અને શિસ્તબદ્ધ છે.

તેઓ એવી વાર્તા રજૂ કરે છે જે સોશિયલ મીડિયા પર વારંવાર ચર્ચાનો વિષય બને છે, પરંતુ જેને ફિલ્મી પડદા પર પૂરતું પ્રતિનિધિત્વ મળ્યું નથી. ‘બંદર’ આ શૂન્યાવકાશ ભરી દે છે. અનુરાગ પોલીસ પૂછપરછ, કાનૂની વ્યવસ્થાની ખામીઓ અને જેલ જીવનની કઠોર હકીકતોને નિર્ભયતાથી અને સંપૂર્ણ વાસ્તવિકતા સાથે રજૂ કરે છે.SS1