પિઝા હટ આશરે 2.7 અબજ ડોલર (આશરે રૂ. 22,400 કરોડ)માં વેચાશે
યમ! બ્રાન્ડ્સનો મોટો નિર્ણય: મુખ્ય વૃદ્ધિ બ્રાન્ડ્સ પર ધ્યાન કેન્દ્રિત કરવા પિઝા હટનું વેચાણ લૉન્ગરેન્જ કેપિટલને કર્યુ
ન્યૂયોર્ક: વિશ્વની અગ્રણી ક્વિક-સર્વિસ રેસ્ટોરન્ટ કંપની યમ! બ્રાન્ડ્સે પોતાના પોર્ટફોલિયોને વધુ મજબૂત બનાવવા અને મુખ્ય વૃદ્ધિ બ્રાન્ડ્સ પર ધ્યાન કેન્દ્રિત કરવા માટે પિઝા હટ બિઝનેસ વેચવાનો નિર્ણય કર્યો છે. કંપનીએ બે અલગ-અલગ સોદાઓ હેઠળ પિઝા હટને કુલ 2.7 અબજ ડોલર (આશરે ₹22,400 કરોડ)માં વેચવાની જાહેરાત કરી છે.
સાથે જ, કંપનીના બોર્ડે શેરધારકોને મૂડી પરત આપવાના હેતુથી 4 અબજ ડોલર (આશરે ₹33,200 કરોડ)ના શેર બાયબેક કાર્યક્રમને પણ મંજૂરી આપી છે. આ જાહેરાત બાદ ભારતીય શેરબજારમાં પણ અસર જોવા મળી હતી—પિઝા હટના ફ્રેન્ચાઇઝી ઓપરેટર્સ સેફાયર ફૂડ્સ ઇન્ડિયા લિમિટેડના શેર 1.05% ઘટીને ₹179.77 પર પહોંચ્યા, જ્યારે દેવયાની ઇન્ટરનેશનલ લિમિટેડના શેર 1.40% ઘટીને ₹112.58 પર ટ્રેડ થયા.
Yum Brands $YUM has agreed to sell Pizza Hut for $2.7 Billion – Pizza Hut outside of China goes to LongRange Capital for $1.5 billion. – Pizza Hut in China goes to Yum China $YUMC for $1.2 billion.
સોદાની વિગતો
- વૈશ્વિક પિઝા હટ (ચીન સિવાય): ખાનગી ઇક્વિટી ફર્મ લૉન્ગરેન્જ કેપિટલને આશરે 1.5 અબજ ડોલર (₹12,450 કરોડ)માં વેચાશે.
- પિઝા હટ ચાઇના: યમ ચાઇના હોલ્ડિંગ્સ દ્વારા 1.2 અબજ ડોલર (₹9,960 કરોડ)માં ખરીદાશે.
કંપનીએ જણાવ્યું છે કે તમામ નિયમનકારી મંજૂરીઓ બાદ આ ટ્રાન્ઝેક્શન 2026ના ત્રીજા ક્વાર્ટરમાં પૂર્ણ થશે. ત્યારબાદ, પિઝા હટને યમ! બ્રાન્ડ્સના નાણાકીય અહેવાલોમાં અલગ બિઝનેસ તરીકે દર્શાવવામાં નહીં આવે.
- કર અને અન્ય ખર્ચ બાદ, યમ! બ્રાન્ડ્સને આશરે 2.3 અબજ ડોલર (₹19,090 કરોડ) મળશે.
- જો ચોક્કસ વ્યાપારી શરતો પૂર્ણ થશે, તો કંપનીને 2030 સુધીમાં વધારાના 75 મિલિયન ડોલર (₹622 કરોડ) મળી શકે છે.
- આ પ્રક્રિયા પૂર્ણ કરવા માટે કંપનીને 2026 દરમિયાન 85 મિલિયન ડોલર (₹705 કરોડ)નો એક વખતનો ખર્ચ પણ કરવો પડશે.
યમ! બ્રાન્ડ્સના CEO ક્રિસ ટર્નરે જણાવ્યું કે આ પગલાં કંપનીને વધુ કેન્દ્રિત બનાવશે. સ્કેલ, ટેકનોલોજી અને પ્રતિભાનો ઉપયોગ કરીને યમ! હિતધારકોને સતત મૂલ્ય આપતી રહેશે. લૉન્ગરેન્જ અને યમ ચાઇના હેઠળ પિઝા હટ ભવિષ્યના વિકાસ માટે વધુ મજબૂત સ્થિતિમાં રહેશે.
